Ulloq unnuarlu angerlarsimaffik Ivaneq Nuummiittoq pisortassarsiorpoq

Ulloq unnuarlu Inissitsiterinermullu Immikkoortortaqarfik, Isumaginninnermut Aqutsisoqarfimmiittoq, Angerlarsimaffik Ivanermut 1. maj 2025 imaluunniit immikkut isumaqatigiissuteqarnikkut aallartittussamik pisortassarsiorpoq.

Ivaneq ulloq unnuarlu meeqqanut inuusuttuaqqanullu 0-niit 18 tikillugit ukiulinnut angerlarsimaffiuvoq. Angerlarsimaffik meeqqat inuusuttuaqqanullu 28-inut inissaateqarpoq, immikkoortortanut tallimanut agguataagaallutik, assigiinngiiaartunillu taakku unamminartortaqarlutik. Sullitat tassaapput meeqqat inuusuttuaqqallu sumiginnakkat, perorsaaniarnikkullu tamanna suliniutinik annertuunik piumasaqaateqarpoq, ulluinnarnimi pisariaqartitat assigiinngitsorpassuit anguniarneqartarmata.

Angerlarsimaffik Ivanermi siunertaq perorsaaniarnikkullu anguniakkat

Ivanermi siunertaavoq toqqissisimanartumik, angerlarsimaffippalaartumik aaqqissuusaasumillu avatangiiseqarnissaq, patajaatsunik inissaqartitsisunillu inersimasoqarnissaq, meeqqat ilorrisimaarnerannut, ineriartornerannut ilinniarnerannullu akisussaaffimmik tigusisunik.

Anguniagaavoq meeqqat ulluinnarni inooriaaseq inuunermilu unamminarsinnaasunik ilinniartinneqarnissaat, taamaalillutik siunissami paaqqinniffimmiikkunnaarlutik namminiilerunik akisussaaffeqartumik inooriaaseqarnissaat sungiusarneqassammat.

Angerlarsimaffik Ivanermi sulisarpugut atassuteqaateqarluni perorsaariaaseq toqqammavigalugu, tamannalu pisarpoq inersimasoq sullissisoq, meerarlu naapinnerminni akunnerminni sunniivigeqatigiinnerat ukkatarinerani. 

Inunnik allanik atassuteqaraangatta, imminut paasinninneq ineriartortittarparput, imminut naleqassuserput kiisalu imminut tatigineq ineriartortinneqartarmat. Atassuteqaateqarnikkut akuerisaanermik tunniussisinnaasarpugut tigusisarlutalu. Taamaattumik atassuteqaateqarneq aamma ataasiakkaat ilinniarnerani qitiusarpoq.

Meeqqat inuit ataatsimoornerini takuneqarlutillu tusaaneqarnertik malugissavaat.

Taamaasiornerminni meeqqat ilikkassavaat inuit attaveqarfigisarnerini aammalu ataatsimoornermi attaveqartariaatsit assigiinngistut, soorlu paaqqinniffimmi inuuneq, atuartuuneq, sunngiffimmi inuuneq aammalu ikinnguteqarneq. Meeqqap angajoqqaaminnut imaluunniit qanigisaminnut allanut attaveqarsinnaatitaaneri najorteqarsinnaatitaanerilu Ivanermi tapersersussallugit pingaartitaraagut.

Angerlarsimaffik Ivanermi perorsaasut meeqqamut ineriartortitsinermi attaveqarnermilu qitiusumik inissisimapput.

Uku toqqammavigalugit sulivugut:

Meeqqamut toqqissisimaffeqarneq isumannaatsoq – toqqammaviusumik pingaarnertut perorsaasoq kiisalu toqqammavittut aappaattut perorsaasoq

Aaqqissuussaaneq siumungaarlu isiginninneq – ullormut aaliangersimasumik aaqqissuinerit immikkoortortanut tamanut 

Ullut tamaasa aalajaatsuuneq – meeqqat tamarmik ukiuminnut naleqquttumik sammisassanik ullut tamaasa neqeroorfigineqartassapput

Ingerlalluarnissamut ataatsimoorussamik isiginnittaaseq – Immikkoortortanut tamanut inuuniarnermut malitassat

Atorfimmut tunngasut:

Neqeroorutigaagut:

• Assigiinngiiaartunik piginnaasaqartunik aqutsisunik suleqateqarnissamut periarfissaqarneq

• Suleriaatsinik nutaanik kiisalu ulluinnarni ullup ingerlanissaanik sunniuteqarluarsinnaaneq

• Suliffeqarfik ineriartornermik ilinniartitaanermillu pingaartitsisoq

• Perorsaanikkut- aqutsinermilu unammillernartunik suliaqarneq ineriartornerlu

• Ulloq unnuarlu Inissitsiterinermullu Immikkoortortaqarfik ingerlatsinermut aqutsisuusoq peqatigalugu isummanik, siunnersuutinik il.il. avitseqatigiinneq

• Sulianut tunngatillugu avitseqatigiinneq kiisalu pisortaqatinik allanik peqateqarluni tapersersoqatigiinneq

• Pisortat forstanderit ukiumoortumik ataatsimeersuarnerini peqataanerit

Kissaatigaarput illit:

• Perorsaasutut ilinniagaqarsimanissat (ingerlariaqqiffiusumillu ilinniagaqarsimaneq)

• Sullitanut tunngasunik ilisimasaqarnissat misilittagaqarnissallu

• Inatsisinik ilisimasaqarnissat 

• Allaffissornikkut aningaasaqarnermullu aqutsinermik misilittagaqarnissat ilisimasaqarnissallu

• Pitsaasumik inuunermut isiginnittaaseqartuunissat kiisalu ineriartuutaasumik pitsaasumik attaveqalersitsisinnaasutit

• Anguniagaqarusullutit takorluugaqarlutillu sulerusussuseqarnissat

• Aqutsinermik misilittagaqarnissat suliassanillu agguataarisinnaasutit

• Namminersorlutik Oqartussat ulloq unnuarlu angerlarsimaffiutaat allat suleqatiginissaannut soqutiginnittuussasutit

• Ulloq unnuarlu Inissitsiterinermullu Immikkoortortaqarfik qanimut suleqatigalugu pitsaasumik ineriartuutaasumillu suleqateqarusussuseqarnissat

• Ulloq unnuarlu meeqqanik inuusuttuaqqanillu sullissinermik misilittagaqartutit.

Qinnuteqaat

Qinnuteqarnissamut killigititaasoq 25. marts 2025

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutit allat

Atorfimmut tunngasunik paasisaqarnerorusukkuit, Ulloq unnuarlu Inissitsiterinermullu Immikkoortortaqarfiup pisortaa attavigissallugu tikilluaqqusaavutit uunga Karina Ivalo Kleist, e-mail: kaik@nanoq.gl oqarasuaat +299 34 69 54.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk