Nunatsinni Ilisimatusarnermik Siunnersuisoqatigiit Allatsissarsiorput

Atorfik pillugu

Kalaallit ilisimatusarnerat inuiaqatigiinnut iluaqutissanngorlugu siuarsarnissaanik, nukittorsarnissaanillu siunertaqarluni Kalaallit Nunaanni ilisimatusarnermik Siunnersuisoqatigiit nunap iluani, aamma arlaannaannulluunniit attuumassuteqarani ingerlatsiviuvoq. Qitiusumik suliassat marluk aqqutigalugit tamanna siunnersuisoqatigiit ingerlappaat: ilisimatusarnermut aningaasaliissutit atugassiissutigisarnerisigut, ilisimatusarnermillu suliaqarnermut aamma Ilisimatusarnermi politikkikkut apeqqutinut tunngatillugu aalajangiisartunut, soqutigisaqaqatigiinnullu siunnersuinikkut. Taassumap saniatigut ilisimatusarnermi nunat assigiinngitsut suleqatigiinnerinut Kalaallit Nunaata peqataanera siuarsassallugu, ilisimatusarnerlu pillugu ingerlatitseqqiisarnerup nukittorsarneqarnissaanut siunnersuisoqatigiit peqataassapput.

Inatsit atuuttoq naapertorlugu siunnersuisoqatigiit suliaat allatsip tapersersussavai, naalakkersuisoqarfillu susassaqartoq aqqutigalugu Naalakkersuisut ataqatigiissaareqatigalugit siunnersuisoqatigiit takorluugaat, anguniagaallu anguniassallugit.

Aaqqissuussaanikkut allatsi Naalagaaffinngornissamut Nunanullu allanut Naalakkersuisoqarfimmi Ilisimatusarnermik ingerlatsiviup ataani. Allatsip siunnersuisoqatigiit siulittaasua qaninnertut attavissaraa.

Minnerpaatut bachelorgrad-itut ilinniarsimallutit naleqquttumik ilinniarsimanissat naatsorsuutigaarput. Misilittagaqarlutik immikkut piukkunnaateqarlutik qinnuteqartunut, immikkut siunnersortitut atorfinitsitsissanerluta nalilissavarput.

Suliassat

Suliassat ilaatigut tassaassapput:

• Siunnersuisoqatigiit ataatsimiinnissaannut suliassanik piareersaasiorneq, Siunnersuisoqatigiillu aalajangigaannik malitseqartitsineq.

• Ilisimatusarnermi aningaasat pillugit saqqummiussassamik pilersaarusiorneq, saqqummiussinerlu, matumani siunnersuisoqatigiit aningaasaataannik qinnuteqaatinik suliaqarneq, qinnuteqartunullu siunnersuineq ilanngullugit

• Siunnersuisoqatigiit ataatsimiinnerani imaqarniliorneq.

• Siunnersuisoqatigiit Ilisimatusarnermi politikkikkut aamma ilisimatusarnermi suliaqarnermut siunnersuisarneranik ineriartortitseqataaneq, matumani assersuutigalugu tusarniutinut akissutit, ilisimatusarnermilu politikkikkut suliat ilanngullugit

• Nunap karsianut missingersuusiorneq kiisalu akuerineqartussanik naatsorsuusiorneq.

• Attaveqarnermi suliassat

• Ukiumoortumik nalunaarusiorneq, tusagassiorfinnut nalunaarusiornerit, allatigullu avammut attaveqarnissamut suliassat

• Siunnersuisoqatigiit oqaatsit pingasut atorlugit nittartagaannik malinnaatitsineq kiisalu nittartakkatigut inuit attaveqarfii

• Tulliuttunik suleqateqarluarnissap aaqqiissuunnissaa

• Naalakkersuisoqarfik susassaqartoq

• Nunat assigiinngitsut akornanni suliffeqarfiit Issittumi, Nunanilu Avannarlerni ilisimatusarnernut, ilisimatusarnermilu attaveqaasersuutinut aningaasaliisartut

• Ilisimatusartut

• Suleqatit, soqutigisaqaqatigiillu allat

Siunnersuisoqatigiit suliassaqarfiisa iluini allanik aamma suliassaqarsinnaavoq.

Atorfinitsitsinermi pingaartipparput

• Ilisimatusarnerup iluani piginnaasaqarneq, ilisimatusarnermilu politikkikkut apeqqutinik ilisimasaqarneq

• Kalaallit Nunaanni ilisimatusarnerup iluani systemimut aamma ilisimatusarnermi politikkimut, ajornanngippallu issittumi aamma nunani avannarlerni ilisimatusarnermik siammaseqisumik ilisimasaqarneq

• Ilisimatusarnermut aningaasaliisarnerup iluani, nalinginnaasumillu allaffissornermik piginnaasaqarneq

• Nunat assigiinngitsut akornanni ilisimatusarnikkut suleqateqarnerup iluani piginnaasaqarneq

• Oqaasiinnaakkut, allattariarsornikkullu oqaasertaliisinnaassuseqarluarneq, matumani ajornanngippat tuluit oqaasii tapertaliullugit kalaallisut, qallunaatullu

Tassunga atatillugu kissaatigineqarpoq piukkunnartoq

• Nunanik assigiinngitsunik suleqateqarnermi, ilaatigooriarlunilu ulapaarfiusinnaasumik namminersorluni, siunnerfilimmik, aaqqissuussamik, peqqissaartumillu sulisinnaassuseqassasoq

• Suleqateqarluarsinnaassuseqassasoq, suliassaminullu aamma suliat ingerlanneqartarnerinut paasisimasaqarluassasoq

Atorfeqartoq siammasissumik aamma akimortumik, suliaqarfimmilu avataani sulisinnaassasoq naatsorsuutigineqarpoq. Taassumap saniatigut Nunatsinni Ilisimatusarnermik Siunnersuisoqatigiit ingerlataat atorfinittup ilisimatusarnermi politikkimut ataqatigiissisinnaassavai, siunnersuisoqatigiillu ineriartorteqqinnissaannut siunnersuissalluni.

Neqeroorutigaarput

• Suliatigut ineriartornissamut periarfissagissaarluni qaffasissumik suliaqarfimmi atorfik unammillernartoq

• Annertuumik akisussaaffeqarneq, pitsaasumillu allanngueqataanissamut assinganik periarfissaqarneq

• Suliaqarfiup ineriartupiloortup iluani nammineersinnaassuseqarneq

• Suliaqarfik nunami, nunarsuarmilu pisunik annertuumik ukkataqartoq.

Angalasarnissaq naatsorsuutigineqassaaq.

Paasissutissat annertunerusut

Atorfik pillugu annertunerusumik paasissutissat, allaffimmi pisortamut Kunuk Holm-imut, oqarasuaammut +299 345127-mut, e-mailimut: khol@nanoq.gl-imut attaveqarnikkut pissarsiarineqarsinnaapput.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk