Sammisassaqartitsinermut Kulturimullu Immikkoortortaqarfimmi fagchefi

Meeqqanut Atuarfeqarnermullu Ingerlatsivik sammisassaqartitsinermut kulturimullu suliassaqarfimmik paasisimasalimmik, misilittagalimmik soqutigisalimmillu aqutsisumik misilittagalimmik tunniusimasumillu pissarsiorpoq.

Meeqqanut Atuarfeqarnermullu Ingerlatsivimmit anguniakkat ersarissut aamma meeqqanut isiginnittariaaseq nukittooq tunngavigalugit suliniutigineqartarpoq, taamatuttaaq suliffinnut avatangiisit pingaartinneqarput, matumani qungujunnartunik nuannarisaqarnermik, siunersiueqatigiinneq, suliatigut ineriartorneq suleqatigiillu ataqatigiilluartut inissaqartinneqarput.

Angusaqarusussusilimmik isumassarsiorfiusinnaasumillu, sulisut ataatsimut anguniakkap angunissaanut kajumissuseqalerfigisinnaasaannik pitsaasumik nutaaliorfiusumillu silaannarmik pilersitsisinnaasumik aqutsisumik pissarsiorpugut. Suleqatinnik tunniusimalersitsillaqqissuussaatit, suliassanut pisussaaffimmik qulakkeerinnissinnaassaatit aamma piffissaq eqqorlugu qaffasissumillu pitsaassusilimmik naammassineqarnissaannut akisussaaffeqassallutit.

Aqutsisutut periusissiugaasumik nukissaqarlutillu suleriuseqarputit aamma avatangiisit allanngorartut unammillernartullu suliffigisinnaavatit. Akisussaaffeqarputit, inernernik pilersitsisarputit aamma siunissaq qaninnerusoq ungasinnerusorlu eqqarsaatigalugit anguniakkat oqimaaqatigiissaarsinnaavatit. Iliuuseqarlutit suleriuseqartarnerit sulinermi pimoorussinermik sukkassutsimillu pilersitsisarpoq, pisuni peqataasinnaassuseqarputit anguniakkat anguneqarnissaat qulakkeerniarlugit.

Fagchefitut atorfimmut piukkunnaateqaruit atorfik pilerinarluinnartoq suliatigut inuttullu unamminartulik neqeroorutigaarput, suliassaqarfigisanni annertuumik ineriartortitsinermut sunniuteqaqataaffigisinnaasannik.

Suliffik pillugu:

Sammisassaqartitsinermut Kulturimullu Immikkoortortaqarfimmi fagchefitut sammisassaqartitsinermut kulturimullu suliassaqarfik tamakkerlugu pingaarnertut akisussaaffeqarfigissavat. Tassunga ilanngullugit kommunimi tamarmiusumi suliffeqarfinni immikkoortortaqarfinnilu ataaniittunik aqutsisunik aqutsisuuneq ineriartortitsinerlu. Ingerlatsivimmi sulisut allat kiisalu suliassaqarfimmi ulluinnarni najukkami ingerlatsinermut akisussaaffeqartuusut Tasiilami Paamiunilu Nunap immikkoortuani chefit qanimut suleqatigalugit sulineq ingerlanneqassaaq.

Suliassaqarfimmi ilaatigut sunngiffimmi atuartitsineq, peqatigiiffinnut aamma kulturikkut suliniutinut tapiissutit, klubbit, eqqumiitsuliortut, kulturimut isumassarsiorfik, Suialaa Arts Festival allallu innuttaasunut aaqqissuussat suliarineqartarput. Tamatuma saniatigut kommunimi tamarmiusumi immikkoortortaqarfiup ataaniittunik suliffeqarfeqarpoq, soorlu naluttarfik, nipilersornermik ilinniarfiit, timersortarfiit, katersortarfiit, katersugaasiviit, ammeriviit allarpassuillu. Taamaattumik siammasissunik inissaqartitsisinnaassaatit suliassaqarfiillu assigiinngitsut akornanni suleqatigiinnikkut periarfissanik takunnissinnaallutit.

Immikkoortortaqarfik, ingerlatsinerup saniatigut, arlalinnik soqutiginarluinnartunik ineriartortitsinermut tunngasunik suliassaqarpoq. Tassunga ilanngullugit kulturimut sammisassaqartitsinermullu periusissamik suliaqarneq aamma klubbinut immikkoortumut pilersaarusiorneq, taakku Ineriartortitsinermut immikkoortortaqarfik aamma immikkoortortat pineqartut qanimut suleqatigalugit suliarineqassapput. 

Fagchefitut ingerlatsivimmi aqutsisooqatigiinnut ilaassaatit, tassani pisortap saniatigut ilaapput Stabschefi, Ineriartortitsinermut pisortaq, Atuarfeqarnermut MISI-mullu fagchefi aamma Ulluunerani neqeroorutinut fagchefi. Aqutsisooqatigiinni matumani suliatigut aqutsinikkullu siunersiueqatigiinnermik pitsaasumik atorluarneqarsinnaasunillu tunniussaqarnissat naatsorsuutigineqarpoq.

Akisussaaffeqarfiit:

∙Suliassaqargimmi immikkoortortaqarfimmi aqutsisunut suliffeqarfinnilu ataaniittunut aqutsisunut aqutsisuuneq, tassunga ilanngullugu piginnaanngorsaanermik suliffimmilu avatangiisit pingaartinneqarneri.

∙Immikkoortortaqarfimmi suliassanut, tassunga ilanngullugit ingerlatsinermut ineriartortitsinermullu suliassanut pingaarnertut akisussaasuuneq.

∙Aningaasaqarnermik pilersaarusiorneq malitseqartitsinerlu

∙Immikkoortortaqarfimmi suleriaatsinik paasinninneq naammassiuminarsaanerlu aamma pitsanngorsaaneq.

∙Suliassaqarfimmi qinikkanik sullissineq

∙Ingerlatsivimmi immikkoortortaqarfiit sinnerinik suleqateqarneq, suliffeqarfimmi assigiinngitsut akornanni kiisalu avataaneersunik suleqatinik

Inuttut piginnaasat:

Qinnuteqartoq piukkunnarnerpaaq suliatigut patajaatsumik ilisimasaqarpoq, ajornanngippat pisortani aqutsinermi misilittagaqarpoq kiisalu attuumassuteqartumik ilinniagartuutut ilinniarsimalluni. Periusissiorsinnaassuseqarluassaatit, suleqatikkuminartuullutit kiisalu oqaluttariarsornikkut allattariarsornikkullu attaveqateqallaqqittuullutit.

Kulturimut sammisassaqartitsinermullu neqeroorutini nutaalianik isumassarsianillu ineriartortitsinermik ingerlatsissaatit aamma inuiaqatigiinni eqimattat assigiinngitsut, pingaartumik meeqqat inuusuttullu, kulturimut sammisassaqartitsinermullu sammisassaqartitsinerni tunniusimalersitsinissaq sulissutigissavat. Aaqqiissutissarsiorlutit sulisarputit aamma suleriaatsit pitsannguuteqarnissaannut pisariinnerulersinnissaannullu periarfissanik takunnissinnaavutit taamaalilluni immikkoortortaq pitsaasumik nutaaliorlunilu sulisinnaassammat. Kalaallisut, qallunaatut tuluttullu oqaatsitigut piginnaasaqarnikkut attuumassuteqarnernik nukittuunik pilersitsisarputit aamma kulturini assigiinngitsuni peqataatitsilluni suleriuseqarnermik qulakkeerisarlutit.

Aqutsisutut attuumassuteqarnerit suliarisinnaassavatit aamma pisut ajornakusooraluarpata. Tatigeqatigiiffiusumik kulturimik pilersitsissaatit, suleqatigiit iluanni, ass. aalajangiiniarnerni sulisunik peqataatitsinikkut aamma avataanit allanit suleqateqarnermi. Suleqativit nukittuffiinik akuersaarnerisigut kajumissaarnissaata pingaaruteqassusaannik paasinnissinnaassuseqarputit peqatigitillugulu suliassaqarfiit ineriartortitassat pitsanngorsaaviginissaannut aqqutissiuutissallugit.

Anguniakkat missingersuutillu isumaqatigiissutaasut angunissai ukkatarissavatit aamma piffissaliussat malinnissaat inernerillu kissaatigineqartut tunniunnissaat isumagissavatit. Aningaasaqarnikkut piginnaasaqarluarputit aamma missingersuutinik, pingaarnersiuinernik aamma pitsanngorsaanermut periarfissanik misissueqqissaaralutit sulisinnaavutit taamaasilluni immikkoortortaqarfimmi nukiit pitsaanerpaamik atorneqassapput.

Pisariaqartillugu suliassat malinnaavigineqartarnissaannik kiisalu ajornartorsiutaasinnaasut pitsaasumik sukkasuumillu aaqqiivigineqartarnissaannik qulakkeerinissamut akisussaaffeqarsinnaassaatit pisinnaatitaasinnaassaatit.

Ersarissumik, akuersaartumik toqqaannartumillu attaveqateqarsinnaavutit aamma oqaasinnguinissamut, paarlaasseqatigiinnissamut isummallu nutaat misilittarnissaannut tunuarsimaartuunngilatit, taamaasillutik suleqatigiit unammilligassanut pitsaanerpaanik aaqqiissutissarsiorsinnaassapput.

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Pisortaq Lone Nukaaraq Møller, oqarasuaat +299 36 73 01 imaluunniit e-mail: lnm@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 219-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: marsip 24.-at, 2025

Atorfik una qinnuteqarfigiuk