Arctic Hub Nuummi 1-2 Siunnersortinik suleqatissarsiorpoq

Arctic Hub Nuummi 1-2-nik suleqatissarsiorpoq

Kalaallit Nunaanni ilisimatusarneq soqutiginartippiuk? Suliniutinik aqutsineq allaffissornerlu misilittagaqarfigaagit? Aamma attavigisartakkanut attaveqartuartarneq pikkoriffigaajuk? Taamaappat imaalluarsinnaavoq Arctic Hubimi suleqatigileritsigit.

Nuummi allattoqarfimmi ataatsimik marlunnilluunniit ilisimatusarnerup inuiaqatigiinni inissisimaneranik nalimmassaaqataasussanik suleqatissarsiorpugut. Kalaallit Nunaanni ilisimatusarnermut iluaqutaasumik sulilluarumasunik tulluartunillu suleqatissarsinissarput pingaartipparput. Suliassat akisussaaffissallu illit piginnaasannut misilittakkannullu naleqqussarneqarsinnaassapput.

Atorfiit pillugit

Arctic Hubimi suleqataanikkut ilisimatusarnerup Kalaallit Nunaanni, Danmarkimi nunanilu allani inuiaqatigiinnut atassuserniarnerani pingaaruteqarluinnartumik inissisimassaatit. Arctic Hubimi suleqatigisartakkavut tassaasarput ilisimatusartut ataasiakkaat, innuttaasut sulilluarumasut nunanilu allani ilisimatusarnermik ingerlatsiviit.

Piginnaaneqarfitit misilittakkatillu apeqqutaallutik suliassatit ilaatigut makkuusinnaapput:

• Suliniutinik aaqqissuussanillu ineriartortitsineq, aallarnisaaneq ingerlatsinerlu, ilisimatusarnerup, ilinniartitaanerup, qullersaqarfiit, inuussutissarsiornerup innuttaasullu suleqatigiilluarnerulissutissaannik
• Arctic Hubip EU-p Green Growthimik suliniutaanut atatillugu ingerlatsinera immikkut ukkataralugu suliniutinik aqutsinermut namminersorluni akisussaasuuneq – isumassarsiarineranniit atulersitsinermut nalunaarusiornerlu ilanngullugu – ilaatigut missingersuusiornermut nalunaarusiornermullu
• Suliffeqarfiup iluani avataanilu allaffissornikkut suliassanik ataqatigiissaarineq aammalu allattoqarfimmi pisortamut siulersuisunullu allakkiortarneq
• Ilisimatusartunik, suleqatigisartakkanik soqutigisaqaqatinillu allanik siunnersuisarneq ilisimatusarnermi Kalaallit Nunaanni atugassarititaasut ilisimatusarnerullu inuiaqatigiinni atorneqarfii pillugit
• Arctic Hub sinnerlugu naleqquttunut ataatsimeersuariarneq, ataqatigiissaarluni suleqateqariartorneq ataatsimiigiartarnerlu – nunatta iluani avataanilu.
• Aningaasaliisussarsioqataaneq aningaasaliiffissatullu periarfissanik allanik ineriartortitseqataaneq

Allattoqarfimmi pisortaasoq naalagarissavat suleqatigiinnullu ikittunnguanut suliaminnut tunniusimasunut ilaalissallutit.

Illit piginnaanitit

Takorloorparput illit…

• naleqquttumik universitetimi ilinniagaqartutit – aammali angusaqarluassutigisassannik alapernaassuseqarlutillu eqqortunik misilittagaqartutit
• ulluinnarni assigiinngiiaaqisunik – ilaatigut allaffissornermik aammalu Kalaallit Nunaanni, Danmarkimi nunanilu allani sinniisuunermik – suliassaqarfiusuni sulilluarsinnaasutit
• suliniuteqaqataanermi aamma/imaluunniit suliniutinik ingerlatsinermi misilittagaqartutit
• oqaatsit ukua arlaat minnerpaamik marluk atorlugit attaveqateqarsinnaalluartutit: kalaallisut, danskisut tuluttullu
• issittumi ilisimatusarneq aammattaaq Kalaallit Nunaanni inuiaqatigiinni politikkikkullu pissutsit ilisimasaqarfigigitit – imaluunniit taakku pillugit ilikkagaqarusuttutit

Inuttut piginnaasat

Neriuppugut illit…

• tunniusimasuusutit eqeersimaartuusutillu
• aaqqissuussilluarsinnaasutit, suleriutsinik pingaartitsisuusutit assigiinngiiaartunillu suliaqarsinnaalluartutit
• isumassarsiorsinnaassuseqartutit nutaanillu ilinniarneq nuannarigit
• suleqatitut akisussaassuseqartutut imminut isigisutit – aamma namminersorlutit suliaqaraangavit
• attaveqalillaqqissuusutit attavigiuarumallugillu suliniuteqallaqqissutit
• teknikkilerineq paasisimasaqarfigigit atortunillu digitaliusunik atuillaqqissutit (Office-pakkip saniatigut ilaatigut atortarpavut Microsoft Planner, Canva, Podio aamma WordPress)

Arctic Hub pillugu

Arctic Hub issittumi ilisimatusarnermi katersuuffiuvoq Kalaallit Nunaat qitiutinneqarluni. Kalaallit Nunaat Danmarkilu suleqatigiillutik Nuummi allattoqarfimmik pilersitsipput, Arctic Hubimullu atatillugu anguniakkat amerlallutillu annertupput. Allattoqarfimmi ilisimatusarnerup inuiaqatigiinnut atassusiineq suliarisaraarput. Arctic Hub pillugu uani atuarnerusinnaavutit: www.arctichub.gl. Suleqatigiinnissamik isumaqatigiissut uaniippoq. 

Allaffik Pikialaarfimmi alianaatsunik avatangiisilimmi inissisimavoq. Tamaaniippoq suliffik inissaqarluartoq kaffeqarluartorlu, illoqarfimmi pitsaanerpaanik ulloqeqqasiorfiusinnaasoq ataqatigiilluarfiusorlu. Suleqatissavit suliffitsik eqinnaatsumik, tamatigoortunik siunertaqarluartumillu suliaqarfiusoq suliatsigullu ineriartornissamut akisussaaffeqarnissamullu periarfissaqarluartoq nuannaraat.

Atorfininnermi atugassarititaasut

Arctic Hubip allattoqarfia Pinngortitaleriffiup ingerlatsiviisa ilaanni inissisimavoq. Taamaattumik Pinngortitaleriffimmi atorfinissaatit, Arctic Hubilli allattoqarfiani pisortaq naalagarissavat. 

Atorfik siulleq Danmarkimi Kalaallillu Nunaanni aningaasanut inatsit aqqutigalugu aningaasaliiffigineqartassaaq. Taamaalilluni aalajangersimasumik atorfiuvoq, aningaasanut inatsisikkoortumik aningaasaliiffigineqartarnissaa naatsorsuutigalugu. Atorfiit aappaat suliniummut atatillugu ukiuni pingasuni atorfinitsitsiffiussaaq.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Atorfinitsitsinerup ingerlarnga

• Qinnuteqarnissamut killigititaasoq: 9/5-2025
• Naatsorsuutigaarput oqaloqatiginnittassalluta sap. ak. uani 21.
• Ulloq sulilerfissaq:1/7-2025 isumaqatigiissutigineqartorluunniit naapertorlugu.
• Apeqqutissaqaruit allattoqarfimmi pisortaq Jula Maegaard-Hoffmann maana allaffigiuk: jula@arctichub.gl

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk