Sulisoqarnermut Immikkoortortaqarfik kontorfuldmægtig-imik pissarsiorpoq

Allaffissornermi aamma ingerlatsivimmi suliassanik suliarinnissallutit piginnaasaqarpit peqatigitillugulu sulisoqarnermut atatillugu allaffissornerup iluani kommunip pisortaanik kiffartuussinissannut siunnersuisarnissamullu soqutigisaqarpit? Taava Kommuneqarfik Sermersuup Sulisoqarnermut Immikkoortortaqarfia kontorfuldmægtigimik atorfik inuttassarsiunneqarpoq.

Sulisoqarnermut Immikkoortortami suliassat assigiinngisitaartorujussuupput, atorfinittussap suliassai ilaatigut tassaapput, sulisunut tunngasunik allaffissornermi suliassat, tassunga ilanngullugu suliassat suleqatinut ingerlateqqinneqartarnissaat, atorfinitsitsinermi uppernarsaat, atorfininnermut soraarnermullu atatillugu angalanermut tunngasut, pequtit akigasuarneqartussat il.il., suliassanullu imaannaannginnerusunut ilinniartinneqarnissaq periarfissaatinneqassaaq. 

Suliassat immikkoortumi sulisut suleqatigalugit naammassineqassapput Sulisoqarnermut aqutsisoq qaninnertut aqutsisoralugu.

Qinnuteqartunut naatsorsuutigisat:

Ajornanngippat allaffissornermik sulinermik misilittagaqarsimanissaq, ilinniartitsinerli pisussaammat tamanna piumasaqaataanngilaq

Nammineq iliuuseqarusussuseqarnissaq piumassuseqarnissarlu kiisalu sullisserusussuseqarnissaq

Suliffiup iluani avataanilu pitsaasumik suleqateqarnissamut piginnaasaqarluarneq

Qinnuteqaateqartut marluinnik oqaasillit orniginartinneqarnerupput, piumasaqaataanngilarli

Allaffimmiusut ilinniagaqarsimassaatit imaluunniit assingusumik

Neqeroorutigaavut:

Suliffik unammillernartoq, qinnuteqartumut sulisunut tunngasunik allaffissornermik suliaqarnissamik periarfissalik 

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Sulisoqarnermut immikkoortortami aqutsisutmut Nuuni Ezekiassen, oqarasuaat +299 36 71 43 imaluunniit e-mail: eznu@sermersooq.gl

Pineqaatissinneqarsimannginnermut uppernarsaat: 

Atorfik una pineqaatissinneqarsimannginnermut uppernarsaammik pissarsinissamik inatsimmi pisussaatitaaffiuvoq. Inatsit naapertorlugu kommune pineqaatissinneqarsimannginnermut uppernarsaammik aatsaat pippat atorfinitsitsineq aallartinneqarsinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat aatsaat kommune pinerluuteqarsimannginnermut uppernarsaammik Politiinit pissarsereerpat.

Akissaatinut atorfinitsitaanermilu atugassarititaasut:

Akissaatinut atorfinitsitaanermilu atugassarititaasut Namminersorlutik Oqartussani aamma Sulinermik Inuussutissarsiuteqartut Kattuffiata (SIK) akornanni isumaqatigiissut atuuttoq imaluunniit Kalaallit Nunaanni Kattuffiup allap isumaqatiginninniarsinnaatitaasup isumaqatigiissutaa atuuttoq naapertorlugit atorfinitsitsisoqassaaq.

Qaammatit pingasut siulliit misiligummik atorfinitsitsisoqassaaq.

Inissaq:

Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfineqqarnermi sulisutut ataavartumik initaarnissamut innersuussisoqarsinnaanngippat, sulisumut utaqqiisaasumik ineqartinneqarsinnaasoq inimik vakantboligmik neqeroorfigineqarsinnaavoq, siuliani taaneqartoq naapertorlugu ineqarnermut, atuinermut il akiliuteqartoqartassaaq. Ineqarnermut atuinermullu akiliutigineqartartut pillugit annertunerusumik paasisaqarusukkuit www.iserit.gl qimerloorneqarsinnaavoq.

Sulilernissamut piffissaliussaq sulisutut ataavartumik initaarnissamut neqeroortoqarnissaa qaqugukkut pissanersoq apeqqutaajumaarpoq. Inatsisit atuuttut tunngavigalugit sulilernissamut atatillugu angalasoqassappat angalaneq akilerneqassaaq aammalu pisattat tikinnissaannut akiliunneqartussaalluni.

Qinnuteqaateqarneq:

Qinnuteqaat qulequtserlugu Atorfiup ilisarnaataa 206-25, ilinniagarisimasat aamma siornatigut suliffigisimasat pillugit paasissutissartalik aamma soraarummeernermi uppernarsaatit assilineqarnerannik il.il. ilalik qinnuteqaateqarnissamut killissarititaasup qaangiutinnginnerani Sulisoqarnermut Immikkoortortamit tiguneqareersimassaaq.

Ima qinnuteqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat., tassuuna CV ilinniarsimanermullu pappiaqqat ilanngullugit nassiussinnaavatit.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: marsip 20.-at, 2025

Atorfik una qinnuteqarfigiuk