Allattoqarfimmi aqutsisussarsiorpugut

Sulisunik aqutsinermik kiisalu kiffartuussinermik allaffissornermillu piginnaasaqarluarpit misilittagaqarluarlutillu? Innarluutilinnut tunngasunik, suliniutilerinermik politikkikkullu isumaqatissarsiornermik soqutigisaqarpit? – Taava immaqa suliffik una ilinnut tulluassaaq!

Inuit innarluutillit oqaaseqartartoqarfiata Tiliup Naalagaaffiit Peqatigiit (NP-it) Inuit Innarluutillit pillugit Isumaqatigiissutaat tunngavigalugu, ulluinnarni inuit innarluutillit inuiaqatigiinni soqutigisaasa isumannaarnissaat siuarsarnissaallu suliarisarpai. Kalaallit Nunaata tamanit inuuffigineqarsinnaanerunissaa anguniarlugu allannguiniarluta annertuunik anguniagaqarpugut. Tunniusimasumik kiffartuusserusuttumillu aqutsinerup iluani pikkoriffilimmik misilittagalimmillu allattoqarfimmi aqutsisussarsiorpugut.

Suliassat suuneri

Allattoqarfimmi aqutsisup misilittakkani tunuliaquttanilu tunngavigalugit Inuit innarluutillit oqaaseqartartuannut allattoqarfiullu ulluinnarni ingerlaneranut tunuliaqutaalluinnarpoq. Allattoqarfimmi aqutsisoq ulluinnarni Inuit innarluutillit oqaaseqartartuanut tapersersuissaaq allattoqarfimmilu suliassat ilusilersornerinut akisussaasuussalluni. Allattoqarfimmi aqutsisoq Inuit innarluutillit oqaaseqartartuannut nalunaaruteqartassaaq, allattoqarfimmilu sulisut ulluinnarni aqutsinerannut allattoqarfimmilu suliassat aaqqissuunneqarnerannut akisussaasuussalluni. Tilioq NP-it Inuit Innarluutillit pillugit Isumaqatigiissutaat tunngavigalugu inuit innarluutillit soqutigisaasa, periarfissaasa nunatsinnilu naligiissitaanerisa qularnaarnissaat siuarsarnissaallu suliarisarpai. Suleqatit allat suleqatiginerisigut inuit innarluutillit pillugit tigussaasunik naammassisaqarniartarpugut. Illit - Inuit innarluutillit oqaaseqartartuat qanimut suleqatigalugu – Tiliup periusissiaata anguniagaasalu akuerisaasut naammassinissaat akisussaaffigissavat.

Suleqatigiit ikittunnguuvugut, immikkullu suliassaqarlutalu suliniuteqarpugut, taamaattorli pisariaqartitsinermi immitsinnut nukittorsaqatigiillutalu isummersoqatigiittarpugut. Inuit innarluutillit oqaaseqartartoqarfiani allattoqarfimmi aqutsisoq ilanngullugu maanna inunnik sisamanik sulisoqarpoq, 2025-milu sulisut ilanissaannik pilersaaruteqartoqarpoq.

Tilioq Sisimiuni inissisimavoq, tassanilu Allattoqarfimmi aqutsisoq pingaarnermik suliffeqassaaq. Atorfimmut atatillugu angalasoqarnissaa naatsorsuutigineqassaaq.

Suliassat pingaarnerit 

• Sulisut ulluinnarni aqunneqarnerat allattoqarfiullu suliassaanik aqutsineq, matumunnga ilanngullugu Tiliumi sulisut suliamut tunngatillugu ineriartornissaat siunersiueqatiginissaallu.

• Inuit innarluutillit oqaaseqartartuat qanimut suleqatigalugu Tiliup suliaasa ineriartortinnissaat.

• Aningaasaqarnerup aqunneqarnera, missingersuusiorneq missingersuutinillu nangitsineq, matumunnga ilanngullugu sulisunik akissarsianillu aqutsineq.

• Suliniutinik ataqatigiissaarineq pilersaarusiornerlu, ilaatigut NP-mut nalunaarusiornerit suliniutinillu suliaqarneq.

• Ukiumoortumik nalunaarusiaq aqutsinermullu nalunaarusiaq inuit innarluutillit oqaaseqartartuat suleqatigalugu suliaqarneq.

• Inuit innarluutillit oqaaseqartartuat suleqatigalugu tusarniaanermut akissutit piareersarneqarnerat.

Ilinnut tunngasut

Ersarissumik aqutseriaaseqarputit inuillu ineriartornissaannik atugarissaarnissaannillu soqutigisaqarlutit. Naammassisaqarusuttuuvutit, aaqqissuulluakkamik suleriaaseqarputit suleriaatsillu ilisimasaqarfigalugit. Suleqatitit kaammattullaqqippatit suleqatigiillu ingerlalluarnissaannut peqataalluartarlutit, politikkikkullu aqunneqartumik suliffeqarfimmit misilittagaqarsinnaavutit Kalaallit Nunaannilu inuiaqatigiit kulturilu pillugit ilisimasaqarlutit.

Kalaallit Nunaanni innarluutillit pillugit, ass. isumaginninnermut, ilinniartitaanermut imaluunniit peqqinnissaqarfimmut tunngasunik ilisimasaqarnerit pitsaaqutaassaqaaq, piumasaqaataananili.

Suliffeqarfiugatta anginngitsoq, ilaatigullu inuiaqatigiinnit politikerinillu piumaffigineqangaatsiartarsinnaasoq, pingaaruteqarpoq pisoqarfiungaatsiartumi ulapaarfiusumilu sulinissat nuannaralugulu sapissanngikkit.

Taamaattumik neriuutigaarput illit

• Sivikinnerpaamik ukiuni marlunni aqutsisutut misilittagaqartutit inunnillu aqutsinerup iluani ilinniagaqarsimasinnaallutit.

• Inuiaqatigiilerinermi imaluunniit allamik tulluartumik tunuliaqutaqartutit..

• Sulisunik aqutsinermi, allattoqarfimmi sullissinermik aamma aningaasaqarnermik aqutsinermik misilittagaqartutit.

• Aaqqissuulluakkamik suleriaaseqartutit annertuumillu pisoqartillugu akisussaaffeqarnissat sungiusimagit.

• Tusagassiuutitigut, inuit attaveqaqatigiittarfiini oqarasuaatikkullu ersarissumik oqariartuuteqarsinnaasutit.

• Kalaallisut, danskisut ajornanngippallu tuluttut piginnaasaqartutit.

Uagut tunniussinnaasavut

Atorfik pissanganartoq, allanngorartoq annertuumik akisussaaffimmik tigusiffiusoq, inuttut suliamullu tunngatillugu ineriartornissamut periarfissaqarluartoq. Ineriartornerup sunniuteqarfiginissaanut periarfissaqarputit atorfimmilu suliassavit qanoq piviusunngortinnissaat nammineq aalajangeeqataaffigingaatsiarsinnaavat. Tiliumi suleqatigiilluta suliatsinnut tunngatillugu isummersornarfiusumik suleqatigiippugut, suleqatitillu tunniusimasuupput nutaaliorsinnaassusiliullutillu suliassavullu pingaarutiliupput, pissanganartut allanngorartorujussuillu. Inuit innarluutillit tigussaasunik naammassisaqarfigineqartarnissaat innarluutilinnullu tunngasut suliamut tunngatillugu qaffassarnissaannik suliffeqarfiuvugut.

Suliffeqarfitsinni suleqatigiilluarnissarput pingaartitaraarput. Tiliumi sulinermi suliffiullu avataatigut inuunerup oqimaaqatigiinnissaat peqataaffigerusupparput, ilaatigut angerlarsimaffimmi sulisinnaaneq suliassallu eqaatsumik aaqqissuunneqarsinnaaneri aqqutigalugit. Suliffeqarfimmi assigiinngissitaarneq naleqartinneqarpoq suleqatigiilluarnissarlu pingaartillugu – inuillu inuunerannut annertuumik illit sunniuteqarsinnaavutit.

Akissarsiat atorfeqarnermilu atugassarititat

Akissarsianut atorfinitsitsinermilu piumasaqaatinut, matumunnga ilanngullugu sulilernermi soraarnermilu angalasinnaatitaaneq pisattanillu nuussinermut tunngatillugu, tassani Namminersorlutik Oqartussat isumaqatigiinniarsinnaatitaasullu akornanni atorfininnermi isumaqatigiissut atuuttoq tunngavigineqassaaq.

Atorfik sapaatip akunneranut akunnerit 40-t suliffiuvoq.

Ineqarneq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutik Oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uumasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.

Paasissutissat allat

Atorfik pillugu paasisaqarnerorusukkuit Inuit innarluutillit oqaaseqartartuat Qivioq Løvstrøm, tlf. +299 262871 imaluunniit E-mail: qilo@tilioq.gl attavigisinnaavat.

Qinnuteqaat

Qinnuteqaatit CV ilanngullugu pappiaqqallu allat pingaaruteqarsinnaasut qilo@tilioq.gl-imut kingusinnerpaamik

Pingasunngorneq 26. marts 2025 nassiutikkkit

Kinaluunniit naleqquttoq soqutiginnittorlu qinnuteqarnissaanik kaammattorparput, innarluut, ukiut, suiaassuseq, upperisaq, arnanoortuuneq/angutinoortuuneq sumiuunerlu apeqqutaatinnagit.

Tilioq pillugu nittartakkatsinni paasisaqarnerusinnaavutit uani: https://tilioq.gl/kl/

Tilioq pillugu

Tilioq – Inuit Innarluutillit oqaaseqartartoqarfiat politikkikkut attuumassuteqanngilaq Namminersorlutik Oqartussat ataanni inissisimasuulluni kiisalu Inuit innarluutillit oqaaseqartartuannit aqunneqarluni.

Tiliup suliassai inatsisitigut tunngaviligaapput ilaatigullu siunnersuinernik ilitsersuinernillu imaqarlutik, paasissutissanik katersineq paasissutissiinerlu, Naalagaaffiit Peqatigiit (NP-it) Inuit Innarluutillit pillugit Isumaqatigiissutaat tunngavigalugu inatsisinik periutsinillu nakkutiginninneq, minnerunngitsumillu inuit innarluutillit atugarisaasa oqallisigineqarnissaat, suliat saqqumilaartut ilaatigut tunngavigalugit ilisimasallu Tiliumi katersorneqartut tunngavigalugit.

Tilioq Sisimiuni inissisimavoq Meeqqanut aamma Inuusuttunut Naalakkersuisoqarfiup ataani immikkut inissisimasuulluni. Tilioq pisoqarfiulluarpoq politikkikkullu anguniakkat tusagassiuutilluunniit sammisaat allanngoraangata piaartumik iliuuseqarnissaq pisariaqartarpoq. Sungiussiasuusariaqassaatit inuillu innarluutillit atugaasa pitsanngorsarnissaannut suliaqarnissamut tunniusimalluinnartariaqarlutit. Pisinnaatitaaffiit Tiliullu inuit tamarmik assigiimmik periarfissaqarnissaannik takorluugaqarnera pingaartinneqangaarluni.

Qinnuteqaat nassiuguk