Qinngorneq inuunerissaasumik imaluunniit tarnip pissusiinik ilisimasalimmik misissuisartumillu pissarsiorpoq

Inuunerissaasumik imaluunniit tarnip pissusiinik ilisimasalimmik misissuisartumillu pissarsiorpugut Qinngornermut (siornatigut Ilinniartunik Siunnersuisarfiusimasumut) Nuumut. 

Qinngorneq AQQUT-mi (Nuna Tamakkerlugu Ilitsersuisarfik) immikkoortortaqarfiit marluusut aapparaat. AQQUT aaqqissuussaanikkut Ilinniartitaanermut, Kulturimut, Timersornermut Ilageeqarnermullu Naalakkersuisoqarfiup ataani inissisimavoq. Qinngornerup neqeroorutai tamanut ammasuupput ilinniarnermillu ingerlataqartunut Kalaallit Nunaanni najugalinnut akeqarani.

Inuunerissaasut aamma tarnip pissusiinik ilisimasallit misissuisartullu suliaqarfinnit arlalinneersut suleqatigiiffianni ilaassaatit. Inunnik 12-nik aamma tarnip pissusiinik ilisimasallit misissuisartullu qullersaannik ataatsimik inuttaqartussatut akuerisaavugut.

Qinngorneq 5-nik immikkoortortaqarfeqarpoq. Nunap immikkoortuini ukunaniippugut: Ilulissat, Aasiaat, Sisimiut, Nuuk aamma Qaqortoq.

Nunap immikkoortuisa akornanni Teams atorlugu qanimut suleqatigiittarpugut, aamma oqarasuaatikkut, ataatsimiittarnerit aalaakkaasut ingerlatallu assigiinngitsut aqqutigalugit, suleqatigiinni susoqartitsinerit pisortatigoortut aamma ilumoorsaarnarpallaanngitsut assigiinngitsut aqqutigalugit siunersiueqatigiittarnissanut periarfissaqartarluta (ass gruppikkartumik oqaloqatiginnilluni oqilisaassineq, mindfulness ass.).

Siunertaq

Qinngornerup siunertai pingaarnerit tassaapput: ilinniartut ilinniakkaminnik naammassinnittartut amerlassusaat annertunerulersissallugu aamma atugarissaarnerat inuunerissaaneq siunnersuinerlu aqqutigalugit pitsaanerulersissallugu.

Siunnerfigisat

Siunnerfigineqartut tassaapput inuusuttut inersimasullu Kalaallit Nunaanni ilinniarnermik ingerlataqartut. Ilanngullugit aamma ilinniartut Majoriap ataaniittut.

Suliassat

Inuunerissaasutut/tarnip pissusiinik ilisimasalittut misissuisartutullu assigiinngitsorpassuarnik suliassaqalersinnaavutit, ilanngullugit:

• Inunnut ataasiakkaanut inuunerissaaneq, tassaasoq illit suliassat pingaarneq.

• Ilinniartunik siunnersuineq annertuut annikitsullu pillugit, suulluunniit ilinniartut atugarissaarnerannik pitsaanerulersitsisinnaasut soraarummeernernilu iluatsitsilluarnissaannut pitsaanerulersitsisinnaasut taamalu ilinniakkamik naammassitillugit.

• Pisariaqassappat gruppini katsorsaaneq, ass siooralasut imaluunniit aliasuttut gruppiini.

• Ilitsersuisarfiup neqeroorutaasa inerisarneqarnissaat pitsaanerulersinneqarnissaallu siunertaralugu suliniutinik suliaqarnerit

• Suleqatigisanut assigiinngitsunut tunngatillugu saqqummiussisarnerit (ass ilinniarfiit aamma Majoriaq). Imai tassaasinnaapput AQQUT, Qinngorneq il.il. pillugit paasisitsiniaanerit. Tamakku illoqarfimmi najugaqarfigisami ingerlanneqarsinnaapput imaluunniit atorfimmi suliassaqarluni illoqarfinnut allanut angalasarnikkut.

• Ataatsimiittarnerit. Tassaasinnaapput suliffimmi namminermi ataatsimiittarnerit aalaakkaasut (ass sulisut ataatsimiittarneri imaluunniit suliariniakkamik isumaginnittussani) imaluunniit suleqatigisanik avataanniittunik ataatsimeeqateqarnerit.

• Ajornanngippat suleqatinik siunersiortitsinerit, suliatigut qanoq tunngavissaqarnersutit apeqqutaatillugu.

Sulinermi atugassat aamma suliatigut pikkorissuseq

Ataatsimuussuseq, atugarissaarneq aamma suliatigut pikkorissuseq annertuumik salliutippavut. Taamaattumillu katsorsaanerup il.il. qanoq toqqammaveqarnissaa pillugu najoqqutassianik erseqqissunik inerisaasimavugut - ilaatigut pisuni assigiinngitsuni qanoq iliuuseqarnissaq nalunnginneqassammat ilaatigullu tunngavigisavut aallaavigalugit qanoq iligaangat naammaginartumik suliaqarsimalluni nalunnginneqassammat. Tamakku tamarmik ataatsimut taama suliaapput uippakajaarneq nukeerunnerlu pinaveersaartinniarlugit.

Anguniagaraarput sulisoq kinaluunniit sullitat amerlanerpaamik 20 paarisassagai (piffissat ilaanni ikinnerusut) inuunerissaallunilu oqaloqatiginninnerit ullormut taamaallaat 3.

Tamatuma saniatigut soorunami sulinerup nalaani ilinniarnissamut siunersiorneqarnissamullu piffissaqartitsivugut.

Suleqatigiit pitsaalluinnartut iluanni ataatsimuussusermik misigisimaneq paariinnarumallugu ilaatigut ataatsimiittarnernik aalaakkaasunik pilersitsisimavugut suleqatigiit iluanni ilisimasanik avitseqatigiinnertalinnik, suleqatigiit iluanni siunersiornertalinnik, atuarsimasanik sammisaqartitsinernik taavalu atugarissaarfiusartussanik (sapaatip akunnera allortarlugu ullaakkut ataatsimoorussamik sammisaqartitsineq).

Tamakkua saniatigut Kalaallit Nunaannit tamaneerlutik suleqatigiiusut tamarmik ataatsimut naapeqatigiittarput, tassanilu suliniaqatigiiffiup ineriartortinneqarnissaa sammisarlutigu sulisuusugullu angalaatsiartarluta. Taamatuttaaq aamma immikkoortortaqarfiit ataasiakkaat tamarmik ukiumut ataasiarlutik sulisuullutik angalaatsiartarput.

Sulisut tamarmik Qinngornermi tarnip pissusiinik ilisimasallit misissuisartullu qullersaannut akisussaasarput.

Suliffik neqeroorutigaarput

• sullitanut ataasiakkaanut annertuumik isumaqartoq inuiaqatigiinnullu aamma annertuumik sunniuteqartoq.

• Suliffik pissanganarlunilu uummaarissoq amerlasuunik assigiinngitsunik suliassaqarfiusinnaasoq ajornartorsiutit tarnip pissusaanut tunngasut assigiinngitsut amerlasuut siumorneqarsinnaallutik

• Suleqatit gruppiusut ataqatigiilluartut suliatigut tunngasuni inuttullu imminnut ikorfartuillutillu ikioqatigiissut

• Suliffimmi avatangiisit pitsaasut

• Illuatungeqarluni sungiusarneq, siunersiortitsineq pikkorissarnerillu aqqutigalugit suliatigut ineriartornissamut periarfissat pitsaasut

• Atorfigisavit sunniuteqarfiginissaanut periarfissaqarneq, soorlu ingerlanneqartussanik aallartitsinikkut siunertatsinnik pingaarnermik isumaginnittunik

• Suleqatigiit pitsaalluinnartut pitsaalluinnartunik pimoorullugulu suliniartunik suleqateqarfiusoq.

Iluaqutaassaaq kalaallisut paasisinnaaguit aamma/imaluunniit oqalussinnaaguit, imaanngilarli pisariaqartoq oqalutseqartitsisinnaagatta.

Naatsorsuutigaarput

• Inuunerissaasutut imaluunniit tarnip pissusiinik ilisimasalittut misissuisartutullu ilinniarneq naammassisimagit

• Nutaanik sammisaqarusuttutit suliassanillu nutaanik suliaqarnissaq merserinngikkit

• Alapernaatsuusutit pissutsillu kulturimut inuiaqatigiinnullu tunngasut soqutigisarigitit

• Kiinneraartuusutit inooqatigiinnikkullu pitsaasunik pisinnaassuseqartutit

• IT-ip atornissaa ammaffigigit, ilanngullugu internetsikkut oqaloqateqartarnernut Teamsip atornissaa

• Kalaallit Nunaat aamma kalaallit kulturiat nalunngisaqarfigigitit. 

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk