Nunatta Eqqumiitsulianik Saqqummersitsivianut aggersumut suliniummut pisortaq

Nunatta Eqqumiitsulianik Saqqummersitsiviata pilersinneqarniarnera ukiuni 20-ni ingerlasimavoq suliniullu maanna imatut siuarsimatigilersimalluni Namminersorlutik Oqartussanit Kommuneqarfik Sermersuumiillu ataatsimut aningaasaliissuteqarnikkut pilersinniakkap inaarutaasumik piviusunngortinneqarnissaanut suliniummut pisortatut atorfiup inuttalerneqarnissaanut allagarsiussisoqarluni.

Nunatta Eqqumiitsulianik Saqqummersitsivianut siulersuisut taamaalillutik 2012-imi illussanik titartaasartunik unammisitsereernermikkut Nuummi qitiusumik pilerinartumillu inissisimasussamik Nunatta Eqqumiitsulianik Saqqummersitsivissaanut illussanik titartaasarfimmit BIG-imit siunnersuut ajugaatippaat, kiisalu Nunatta Eqqumiitsulianik Saqqummersitsiviata sananeqarnissaanut 200 mio. kr.-inik akeqartussatut missingerneqartumut sanaartornissamut pilersaarut Nuummi TNT-mit suliarineqarsimasoq akueralugu.

Nunatta Eqqumiitsulianik Saqqummersitsivia suli pilersikkiartuaarneqarpoq Nunatta Eqqumiitsulianik Saqqummersitsiviatalu siulersuisui suliniummut pisortanngortussaq suleqatigalugu sanaartugassap piiviusunngortinneqarnissaanut aningaasaliisussarsiornerup ingerlaqqinnissaata aaqqissuunneqarnissaa suliareqqissallugu.

Suliffeqarfik imminut pigisoq

Nunatta Eqqumiitsulianik Saqqummersitsivia suliffeqarfittut imminut pigisutut ingerlanneqassaaq, ingerlatsineq Namminersorlutik Oqartussanit Kommuneqarfik Sermersuumillu aningaasalersorneqassalluni. Saqqummersitsivik Nuummi inissisimassaaq. 

Nunatta Eqqumiitsulianik Saqqummersitsiviata siulersuisui Namminersorlutik Oqartussat Kommuneqarfik Sermersoorlu suleqatigalugit Nunatta Eqqumiitsulianik Saqqummersitsivissaanut aggersumut suliniummut pisortassarsiorput.

Suliniummut pisortaq atorfeqartitat siullersarissavaat, pineqartorlu Nunatta Eqqumiitsulianik Saqqummersitsiviata siulersuisui suleqatigalugit aningaasaateqarfinnut qinnuteqaasiornernut sanaartugassallu sukumiinerusumik pilersaarusiorneqarneranut ikiuutissalluni. Suliap tamatuma ingerlanerani Kalaallit Nunaanni nunanilu assigiinngitsuni katersugaasivinnut suleqatigisanullu ulluinnarni attaveqartarneq isumagisussaassavaattaaq.

Suliniummut pisortatut katersugaasiviup ingerlanneqarneranut tamarmiusumut aningaasatigut sulianullu tunngatillugu qulliunerusumik akisussaasuussaatit. Ineriartortitserusussuseqassaatit sanaartugassallu pivisunngortinneqarnissaanut peqataanissannut piumassuseqarlutillu piginnaaneqassallutit. Suliamut tamatumunnga atatillugu taamatuttaaq Kalaallit Nunaanni nunanilu allani katersugaasivinnut suleqatigisanullu ulluinnarni attaveqarneq isumagisassarissavat.

Katersugaavisiup ineriartortinneqarneranut sunniuteqarnissannut periarfissaqassaatit eqqumiitsuliallu asseqanngitsut inuiaqatigiinnut kalaallinut pingaarutillit siunissami qanoq atorneqarnissaasa aqunneqarnissaat qularnaassallugu. Naatsorsuutigineqarpoq ulluinnarni ingerlatsineq aallutiitigalugu paasisimasaqarluarlutit siumut isigalutit sulisinnaassasutit.

Ukiuni aggersuni katersugaasiviup suliassai pingaarnerit tassaassapput:

· Nunatta Eqqumiitsulianik Saqqummersitsivianut sanaartukkatigut killiliussat piviusunngortinniarneqarnerinut peqataaneq

· Soqutigisaqartunik avataaneersunik peqateqarnerit aqqutigalugit saaffigisanut nutaanut anngunnissaq sulissutigissallugu.

· Katersugaasiviup katersugaateqarfiini katersugaasiviup katersugaataasa qularnaarneqarnissaat paarineqarnissaallu, katersugaatit aamma siunissami saqqummersissallugit, siammartissallugit ilisimatusarfigissallugillu orniginartuunissaat siunertaralugu.

Illit pillutit

Saqqumisumik inissisimaneq nuannarisarivat, takorluukkat, ilioriusissat anguniakkallu pingaartillugit isummanik oqaasertaliillutillu piviusunngortitsisinnaallutit. Suliniutinik annertuunik aqutsinermit misilittagaqarputit, taamatullu aamma kajumissisitsinissannut malinneqarnissavillu qularnaarneqarnissaanut piginnaaneqarlutit, soorlu aamma saqqummersitsivik suliffeqarfittut aggersutut pitsaasutut orniginartutullu pilersissinnaassagit. Kalaallit Nunaanni nunanillu tamalaanit soqutigisaqartunut suleqateqarnikkut attaveqaatinik nukittuunik pilersitsisinnaallutillu ineriartortitseqqiisinnaassuseqarputit, soorlu aamma pisortat suliffeqarfianni suliaqarnermik paasinnillutillu paasisimasaqarluassasutit.

Tamatuma saniatigut pingaartipparput:

• Attuumassutilimmik ilinniagartuutut ilinniagarsimassasutit, ajornanngippat katersugaasiveqarnerup iluani.
• Ajornanngippat sanaartornermi suliassanik misilittagaqassasutit, ajornartorsiutit suussusersisinnaassallugit, nalilersorsinnaassallugit, piffissallu ingerlanerani ajornartorsiutit aaqqinniarlugit isumaliutigilluakkanik aalajangiisinnaassuseqassasutit.
• Aqutsisutut milittagaqarlutillu pimoorussisuussasutit, oqaloqatigiinnermik pitsaasumik pilersitsisinnaassuseqassallutit sullivimmilu pissutsinik pitsaasunik pilersitsiniarlutit timitalimmik peqataassasutit.
• Aningaasaliisussarsiortarnermik tapersersuisunillu suleqateqarnermik annertuumik misilittagaqassasutit.
• Minnerpaamik oqaatsit pingaarnerit arlaannik oqalussiinnaassasutit, kalaallisullu oqalussinnaanngikkuit ilinniarnissaannut piumassuseqassasutit.

Akissarsiat atorfeqarnermilu atugassarititaasut

Atorfik piffissaq tamaat atorfiuvoq atorfinitsitsinerlu piaartumik pissalluni. Qinnuteqarfissaq ulloq 1. april 2025 killeqarpoq. 

Atorfinitsinneqarneq akissarsiaqartinneqarnerlu isumaqatigiissut qaqugukkulluunniit atuuttoq malillugu pissapput.

Atorfimmut atatillugu inissaqartitsisoqarsinnaavoq.

Atorfeqarfik tassaassaaq Nunatta Eqqumiitsulianik Saqqummersitsivia Nuuk suliffiussalluni.

Suliniummut pisortatut atorfininnissamut sillimaniarneq eqqarsaatigalugu akuerineqarsinnaanissat tamatumalu atorfeqarneq tamaat attanneqarnissaa piumasaqaataavoq.

Paasissutissat sukumiinerusut

Qinnuteqaatit qarasaasiakkut uunga nassiunneqassapput: atorfiknationalgalleri@gmail.com. Paasissutissat sukumiinerusut siulersuisut siulittaasuannut Josef Motzfeldtimut oqarasuaat +299557641 saaffiginnilluni pissarsiarineqarsinnaapput.