Nuna tamakkerlugu katsorsaavik siunnersuisarfillu kontorfuldmægtigimik pissarsiorpoq

Namminersorlutit kiffartuussinissaq qitiutillugu sulisarpit? Aaqqissuussinermut piginnaasaqarluarlutillu? Nuna tamakkerlugu katsorsaavik siunnersuisarfillu saaffiginnittarfinngortussaq kontorfuldmægtigimik allattoqarfimmi suliassanik isumaginnittartussamik innuttaasunillu saaffiginnittunut siullertut attavigineqartartussamik pissarsiorpugut. 

Atorfik pillugu 

Saaffiginnittarfiup ullunnarni ingerlanneqarnerani kontorfuldmægtigitut qitiusumik inissisimassaatit. Allattoqarfimmi suliassat assigiinngitsut ataqatigiissaarlugillu aquttassavatit, ilutinganik saaffiginnittarfik innuttaasunut iserfigiuminartuunissaa pitsaasumillu misigisaqaqqaarfigineqartarnissaa isumagisassallugit. Atorfimmi allaffissornikkut suliassat toqqaannartumillu sullitanik attaveqartarnerit suliarineqartassapput, illillu innuttaasut katsorsaasartullu akornanni ataqatigiissutaasassaatit.

Atorfik siornatigut Isumaginninnermut Aqutsisoqarfimmi Inulerinermut Immikkoortortaqarfiusimasumi aammalu Nuna tamakkerlugu katsorsaavik siunnersuisarfimmi inissisimavoq. Katsorsaavimmi ilaatigut katsorsaanermut tunngatillugu innuttaasut toqqaannartumik attaveqarfigineqartassapput, ilutinganik sinerissami kommunini isumaginninnermut sulisut qanimut suleqatigineqartarsinnaallutik. Inulerinermut immikkoortortaqarfimmi tarnikkut katsorsaanikkullu sullissinerit ilaatigut tassaapput; inersimasunik katsorsaasut angalasartut, pingaarnertut inersimasunik kinguaassiuutitigut atornerlunneqarsimanerminnik kingunerlutitsisunik katsorsaasartut, meeqqanik katsorsaasut angalasartut kiisalu Klinik Killiliisa, tassani inersimasutr meeqqanut inuusuttunullu kinguaassiuutitigut kanngutsaatsuliorsimasut imaluunniit taamaaliornissamik eqqarsaateqartartut katsorsarneqarnissaminnut periarfissinneqartarput. 

Suliassat

• Allattoqarfimmi suliassat ilaatigut tassaassapput oqarasuaatikkut sianertunik oqaloqateqarneq, e-mailinik allaffigeqatigiinnernillu suliaqarneq 

• Saaffiginnittarfimmi siullertut tikilluaqqusisartuuneq, tamatumani isumaqarpoq illit innuttaasut saaffiginninnerini naapillugillu ikiortassagitit 

• Saaffiginnittarfimmi paasissutissat atortorissaarutillu pisariaqartinneqartut pisiarineqarnissaannik ataqatigiissaarineq aaqqissuussinerlu 

• Atortutigut digitaliusumillu toqqorsiviit aaqqissuuttarnissaasa paasiuminartuusarnissaasalu qulakkeertarnissaat 

• Sullitat attavigisarnissaat aammalu saaffiginnittarfiup atuisuisalu akornanni pitsaasumik attaveqatigiittoqartarnissaata qulakkeernissaa 

• Allaffissornikkut suliassat assigiinngitsut isumagisarnissaat, ilaatigut ataatsimiinnissat aaqqissuussinerillu pilersaarusiortarnissaat 

• Innuttaasunut sulisunullu sulinikkut avatangiisit pitsaasuunissaannut toqqissinartuunissaannullu suleqataanissaq 

Illit piginnaasatit

• Ukiuni marlunni allaffissornikkut suliaqarnermik misilittagaqaruit iluaqutaassaaq, kiffartuussinermik suliaqarsimaguit aammattaaq iluaqutaassalluni

• Allattoqarfimmi sulinermik misilittagaqarneq, allaffimmillu aqutsinermik paasinnissuseqarluaruit iluaqutaassalluni

• Allattariarsornikkut oqaluttariarsornikkullu kalaallisut danskisullu attaveqatiginnilluarsinnaassaatit 

• Suliassanik arlalinnik ataatsikkut ingerlataqarsinnaassaatit namminersorlutillu sulisinnaassallutit 

• Pisiniarnermik peqqumaasivimmillu aqutsineq

• Misiginneqataasinnaaneq, naammagittartuullutit inunnillu ikiuinermut pikkorissuullutit

• IT atorlugu sulinermik allaffimmilu softwaremik (assersuutigalugu Microsoft Office) atuinermik sungiusimannilluartuussaatit

Uagut neqeroorutigisinnaasavut 

• Saaffiginnittarfik nutaaq annertuumik ineriartortussaq suliffigilissavat. 

• Suleqatit nukittuut siunersiueqatigisinnaasatit suleqatigilissavatit. 

• Suliffik kiffaanngissuseqarluni suliffiusoq sulisullu atugarissaarnissaannik annertuumik pingaartitsisoq.

• Atorfik suliatigut inuttullu ineriartornissamut periarfissagissaartitsisoq. 

• Kalaallit Nunaanni nuna tamakkerlugu katsorsaavik siunnersuisarfillu ataatsimoortinneqalerneranut peqataassaatit.

• Inuit katsorsarneqarnissamik siunnersorneqarnissamillu pisariaqarititsisut tapersersornerisigut inuiaqatigiinnut pitsaasumik sunniuteqaqataanissamut periarfissaqalissaatit. 

• Sulinikkut atugassarititat pitsaasut persuarsiorpalaanngitsumillu suleqatigiinnermik qitiutitsineq.

• Suliatigut ingerlaavartumik ineriartortitsineq aammalu pikkorissarnissamut ilinniaqqinnissamullu periarfissaqarneq.

• Imaarsarneqartarnissamut periarfissaqarneq. 

Sulinermut tunngasut 

Atorfik piffik tamaat suliffiuvoq (sapaatip akunneranut akunnerit 40-t) Nuummilu Nuna tamakkerlugu katsorsaavimmi inissisimalluni. Atorfimmut atatillugu angalasinnaasarnissaq naatsorsuutigineqassaaq.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaat 

Atorfik soqutigigukku qinnuteqaatit siornatigullu suliffigisimasavit allattorsimaffiat kingusinnerpaamik 14. marts 2025 nassiuteqqullugit qinnuigaatsigit. Illit Kalaallit Nunaanni Nuna Tamakkerlugu Katsorsaavik Siunnersuisarfimmullu qanoq suleqataasinnaanivit tusarnissaa qinnuteqaativillu tigunissaa qilanaaraarput.

Attaveqarfissaq 

Atorfik pillugu paasissutissanik sukumiinerusunik pissarserusukkuit Naja Lund Kielsen oqarasuaammut uunga sianerlutit attavigisinnaavat +299 34 60 54 imaluunniit e-mailianut uunga allaffigalugu attavigiuk nalk@nanoq.gl 

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk