Innuttaasut nukarliit siunissaannut nukittorsaaqataarusuppit? Isumaginninnermut Aqutsisoqarfik Meeqqat Ineriartornerannut Immikkoortortaqarfimmut AC-Fuldmægtigimik tunniusimasumik pissarsiorpoq

Suliniutit meeqqanut ilaqutaannullu iluaqutaasussat ingerlatissallugit nuannaraajuk? Ineriartortitsineq, ataqatigiissaarineq suliniutinillu atuutilersitsinerit atualertussanut suliassaqarfimmut nukittorsaataasussat suliarerusuppigit? Taava periarfissaq aana arajutserusunngisat!

Uagutsinni suleqatigiit eqeersimaartut sulianik, suleqatigiinnermik nutaaliornermillu ingerlatsisut suleqatigilissavatit. Ulluinnatsinni pisoqartaqaaq, pissanganartunik unammilligassaqartarpugut suliarpassuillu isumaqarluartut suliarisarlutigit, suleqataaleruit suliassaqarfimmi sunniinissannut periarfissaqassaatit aammalu meeqqat ilaqutaasalu atugaannik pitsanngorsaaqataassallutit.

Suut suliarisassavigit?

Pitsaaliuinikkut suliniutit ineriartortinneqarneranni nukittorserneqarnerannilu qitiusumik inissisimasuussaatit. Suliassatit siammasissuupput ilaatigullu makku suliarisassavatit:

• Suliniutit atualertussanut suliassaqarfimmut iluaqutaasussat ataqatigiissaarnissaat ingerlannissaallu

• Sulianik ingerlatallit akimorlugit ineriartortitsinikkut suliniutinik pillugit tapersersuinissaq suleqatiginninnissarlu

• Pitsaaliuinikkut suliniutit pillugit ilisimasanik katersineq paasissutissiinerlu

• Paasissutissat suliassanut nassuiaasiornernut, nalunaarusianut allakkianullu tunngasut suliarisarnissaat

• Sulisunik imaarsaaneq aqqutigalugu pitsaassutsimik suliatigullu ineriartornermik qulakkeerinninnissaq

• Misilittakkanik eqiterisarnissaq suliniutinillu ingerlanneqartunik malitseqartitsisarnissaq

• Sulinikkut atortorissaarutit ingerlaartumik pitsanngorsaaqataaffigisarnissaat

• Suliassat assigiinngiiaartut allat immikkoortortamut nukittorsaataasussat suliarisarnissaat

Suliat pillugit ataatsimoorussinermut nukittuut suleqatigilissavatit

Suliniutitigut suliassaqarfiit pingasut annertuut meeqqat ineriartornerannut atugarissaartuunissaannullu tunngasut immikkoortortaqarfiup aallutarai:

1. MANU – angajoqqaanik piginnaanngorsaanermik suliniut: Naartusunut ilaqutariinnullu meeraarartalinnut neqeroorut atukkanik, peqqissutsimik attaveqaatinillu pilersitsinissamut nukittorsaataasoq kiisalu angajoqqaajunermut nukittorsaataasoq.

2.  Siusissukkut iliuuseqarneq: Ilaqutariinnut marluk tikillugit ukiulinnik meerartalinnut immikkut tapersersorneqarnissaminnik pisariaqartitsisunut suliniut. Siunertaavoq sumiginnaasarneq pillugu pitsaaliuinissaq angajoqqaallu piginnaasaannik nukittorsaanissaq.

3. Ulluunerani paaqqinniffiit pillugit suliassaqarfik: Meeqqat atugarliortut siusissukkut paasisarnissaat angajoqqaanillu attuumassuteqarneq suleqateqarnerlu nukittorserniarlugit ulluunerani paaqqinniffinni sulisut piginnaasaasa qaffassarnissaannik ukkataqarneq.
   
   Kinaavit?

Sulianik aallussilluarsinnaasoq imaattoq pissarsiarerusupparput:

• Ilisimatusarnikkut attuumassutilimmik ilinniagalik (assersuutigalugu perorsaanikkut, tarnip pissusiinut tunngasutigut, peqqissutsimut imaluunniit inulerinikkut tunngasunik ilinniagalik)

• Suliniutinik ingerlataqarnermik suliatigullu ineriartortitsinermik misilittagalik

• Oqaatsit marluusut: Kalaallisut danskisullu allattariarsornikkut oqaluttariarsornikkut atorlugit attaveqatigiinnermut nukittooq

• Aaqqissuussamik angusaqarnissarlu siunertaralugu sulisinnaasoq

• Eqinnaatsoq, isumassarsiaqqortooq unammilligassallu nutaat aallunnissaannut piumassusilik

• Suliassaqarfiit akimorlugit suleqatiginnilluarsinnaasoq

• IT pillugu ilisimasaqarluartoq atortorissaarutillu digitaliusut atorlugit sulinermik sungiusimasalik

• Sulinermut atatillugu angalasarnissamut piareersimasoq

Suut ilinnut neqeroorutigisinnaavavut?

• Suliffeqarfik assut ineriartortoq pissanganartunillu suliassaqarfiusoq

• Suliffik suliatigut sulilluarfiusoq suleqatillu tunniusimasut isumasioqatigineqarsinnaasut

• Sulinikkut inuttullu ineriartornissamut periarfissat pitsaasut

• Suliffik sulisut atugarissaarnissaannik suleqatigiinnissaannillu annertuumik pingaartitsisoq

Pitsanngorsaaqataanissamut piareersimavit? Qinnuteqaatit nassiuguk suleqatigilerlutalu!

Atorfininneq: 15. marts 2025 imaluunniit qanimut isumaqatigiissuteqarnikkut.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk