Allagarsiuteqqitaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Avatangiisinut Upalungaarsimanermullu Immikkoortortaqarfimmi pisortaq

Atorfimmi aqutsinermik, suliatigut piginnaaneqarluarnermik politikerinillu kiffartuussinermik ataatsimoortitsiffiusumi atorfeqarnissat kissaatigaajuk? Aammalu atorfimmi, avatangiisinut upalungaarsimanermullu oqartussaasutut ineriartortitsinermillu sulianik annertuumik ilisimasaqarnissamut, piginnaaninnillu attaveqarnermik, suleqatigiinnermik soqutigisalinnillu akuutitsinermik piumasaqaateqarfiusumi sulilernissamut? Taamaappat imaassinnaavoq immikkoortortaqarfimmi pisortarileritsigit!

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi piujuartitsineq politikkikkut suliani salliutitanut ilaavoq, aammalu mingutsitsinngitsunut allannguiniarnerni tamani anguniagarerusutagut annertupput, suliassaqarfimmilu suliniutissanut pilersaarutigut periusissiagullu pimoorullugit ingerlallugit.

Atorfik pillugu

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Avatangiisinut Upalungaarsimanermullu Immikkoortortaqarfimmi pisortassamik, Kalaallit Nunaanni piujuartitsiffiusumik ineriartornermik inuiaqatigiinnilu isumannaallisaanerup qulakkeerneqarnissaanik akisussaaffeqartussamik pissarsiorpugut. Naalakkersuisoqarfimmi pisortaaneq toqqaannartumik qullersarissavat, aammalu suleqatigiit tunniusimasut pikkorissullu 15- it (avatangiisinut 11-t, upalungaarsimanermut sisamat),eqqagassalerineq, imeq imerneqarsinnaasoq, imartami sinerissamut qanittumi avatangiisit, imeq errortuutikoq, ASN, poortuutissat upalungaarsimanerlu pillugit suliassanik qitiusumik suliaqartuusut aqutarissallugit.

Immikkoortortaqarfimmi pisortatut avatangiisinut upalungaarsimanermullu suliassaqarfinni ineriartortitsinermi qitiusutut inissisimassaatit. Tassunga ilanngullugu Kalaallit Nunaanni avatangiisinik illersuinerup upalungaarsimanerullu mingutsitsinngitsumik allannguiniarnerat nunanilu tamalaani isumaqatigiissutinut naleqqussarneqarnissaat qulakkiissavat. Politikkikkut suliallit, kommunit innuttaasullu qanillugit suleqatigissavatit. Ulluinnarni piffissat suliassanut avatangiisinut attuumassutilinnut atortassavat.

Akisussaaffeqarfissatit

• Avatangiisinut Upalungaarsimanermullu Immikkoortortaqarfimmik, 15-inik sulisulimmik aqutsineq ineriartortitsinerlu.

• Immikkoortortaqarfimmi oqartussaasutut ineriartortitsinermilu suliassat pitsaassusiinik sunniutaannillu qulakkeerinninneq, taakkununngalu eqqagassat, imeq errortuutikoq, upalungaarsimaneq avatangiisinillu illersuineq pillugu suliassaqarfiit ilaatinneqarput.

• Mingutsitsinngitsunut allannguinissamut periusissiorneq, aammalu Kalaallit Nunaata avatangiisinik illersuinermut nunani tamalaani isumaqatigiissutinik malinninnissaanik qulakkeerinninneq

• Innuttaasut isumannaatsuunissaannut inuiaqatigiillu ajutoornernik ajunaarnersuarnillu isumaginninnissamut upalungaarsimanermut pilersaarutinik ataqatigiissaarinermut naammassinninniarnissamullu akisussaaffeqarneq.

• Upalungaarsimanermut Ataatsimiititaliarsuup allatseqarfimmi suliassaataanik isumaginninneq.

• Aaqqissuussaaneq avataaniillu sullissisut akimorlugit pitsaasumik attaveqaqatigiinnissamik, suleqatigiinnissamik soqutigisalinnillu akuutitsinissamik qulakkeerinnittarneq

Ilinnut tunngasut

• Ilinniakkat: Attuumassutilimmik ingerlaqqiffiusumik ilinniagaqarputit, aammalu pisortat namminersortulluunniit sullissivianni ukiuni arlalinni allaffissornermik misilittagaqarputit.

• Aqutsinermik misittagaqarneq: Aqutsinermik misilittagaqarluarputit, suliffiullu iluani isumagissaarnermik naammassisaqarsinnaanermillu pilersitsisinnaassuseqarputit, tamatumalu peqatigisaani ulluinnarni ulapaarfiusuni uummaarissunilu sulianik paasisimasaqarluarputit.

• Sulianik ilisimasaqarneq: Kalaallit Nunaanni avatangiisinik upalungaarsimanermillu suliassaqarfik paasisimalluarpat, aammalu suliassanik pisariusunik, suliassaqarfinnik akimuiffiusunik suliaqarneq misilittagaqarfigaat.

• Attaveqaqatigiinneq: Allakkatigut oqaluinnarnikkullu attaveqaqatigiinneq piginnaaneqarfigilluarpat, aammalu qulequttat unammillernartut ersarissumik eqqortumillu oqaasertalerlugit politikkikkut aalajangiisartunut sulianilu suleqatinut ingerlateqqissinnaanissaat piginnaaneqarfigaat.

• Suleqateqarneq: Ammasuuvutit, suleqateqarnissaq pingaartippat, aammalu aaqqissuussaanerit qaffasissutsillu akimorlugit attaveqalersinnaaneq piginnaaneqarfigaat.

• Sunniisinnaassuseqarneq: Allanut pitsaasumik sunniisinnaaneq, taamaalillutillu attaveqaqateqarnerit iliuutsitillu aqqutigalugit allanut angusaqartitsisinnaaneq, allannguisinnaaneq tunniusimatitsilersinnaanerlu piginnaaneqarfigaatit.

• Kulturimik ilisimasaqarneq: Kalaallit Nunaanni pissutsinik ilisimasaqarneq, aammalu kalaallisut, danskisut tuluttullu oqaatsinik piginnaaneqarneq iluaqutaassapput.

Neqeroorutigaavut

• Atorfik pissanganartoq unammillernartorlu, Kalaallit Nunaanni mingutsitsinngitsunik allannguinissamut upalungaarsimanermullu annertuumik sunniuteqarfiusussaq.

• Sullivimmi avatangiisit uummaarissut tunniusimaffiusullu, inuttut sunniuteqarnissannut inissaqartitsiffiusut.

• Aqutsisoqatigiit misilittagallit ingerlalluartullu, aammalu suleqatigiittut ataatsimoortut qanillugit suleqateqarneq.

• Suliffeqarfik tatigeqatigiiffiusoq, ataqqeqatigiiffiusoq toqqissisimanarluartorlu.

Akissarsiat atorfininnermilu atugassarititaasut

Atorfik massakkut aaliangersimasumik inissisimavoq LR 38 -imi.

Akissarsiat aaliangersimasumillu ilanngussat LR 38 -imiippoq ulloq. 1. april 2022 qaammammut 56.910 kr. Ukiumut 682.930 kr. Aqutsisutut nutaamik isumaqatigiissuteqarneq isumaqatigiissusiorneqalerpoq naatsorsuutigineqarporlu piaartumik naammassineqarnissaa.

Isumaqatigiissutit naapertorlugit aallaqqaammut atorfinitsitsineq pissaaq, kisianni qinnuteqartoq tjenestemandioreersimasuussaaq tjenestemanditut atorfeqarnermi Kalaallit Nunaanni tjenestemandinut inatsisit naapertorlugit, tjenestemanditut atugassarititaasut naapertorlugit atorfinitsitsisoqarsinnaavoq.

Sapaatip akunneranut suliffissaq akunnerit 40-put.

Atorfimmut atuuppoq atorfeqarnissap sivisussusissaa aaliangiiffigineqarsimanngilaq aamma suliaqarnerunermut ajunngitsorsiassaq aaliangersarneqarsimanngilaq, nalliuttuni sulinngiffeqarsimanermut ajunngitsorsiassat ilanngunneqanngillat. 

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Namminersorlutik Oqartussat kattuffiullu isumaqatigiinniarsinnaatitaasup akornanni isumaqatigiissutaasut naapertorlugit ingerlanneqassapput.

Isumannaallisaanermi akuerineqarneq

Atorfimmut piukkunneqarnissamut ‘Isertuussat’ pillugit suliaqarsinnaanermut isumannaallisaanermi akuerineqarnissaq, aammalu isumannaallisaanermi akuersissut piffissap atorfeqarfiusup tamaat atuutsinneqarsinnaanera piumasarineqarpoq.

Inissiaq

Atorfinittussaq sulisunut inissiamut pequsersorneqanngitsumut, maleruagassat sukkulluunniit atuuttut naapertorlugit innersuunneqarsinnaatitaavoq. Inuit sulisunut inissiami, imaluunniit inissiami allami, kommunimit imaluunniit Namminersorlutik Oqartussanit pigineqartumi najugaqareersut sulisunut inissiamut innersuunneqarsinnaanngillat.

Ineqarnermut akiliutit qularnaveeqqusiissullu inissiamut innersuunneqartumut maleruagassat sukkulluunniit atuuttut naapertorlugit akilerneqartassapput. Sulisunut inissiaq atorfeqarnermut atasuuvoq, aammalu atorfeqarunnaarnermi qimanneqartussaalluni. Ineqarnermut akiliutit inissiallu pitsaassusia pisoqaassusialu piginnittoqarneranut apeqqutaallutik allanngorarsinnaapput. Sulisunut inissiamut najugarilivitassamut innersuunneqarnissamut utaqqisoqarsinnaavoq, taamaattumillu inissinneqarallarnissaq pisinnaalluni, taakkununngalu najugaqatigiiffiit minnerit imaluunniit akunnittarfiit inissiaataat akileraarnikkut akilerneqartussat ilaatinneqarput. Sulisunut inissiani inissianiluunniit inissiiviugallartuni annerusunik uumasuuteqarnissaq, soorlu qimmeqarnissaq qitsuuteqarnissarluunniit ajornartinneqarpoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik pillugu

Naalakkersuisoqarfimmi sulisut 47-t missaanniippugut, taakkunanngalu immikkoortortaqarfimmi pisortaq ilanngullugu 16-it Avatangiisinut Upalungaarsimanermullu Imikkoortortaqarfimmi sulisuupput, taakkulu amerlanersaat avatangiisinut suliassaqarfimmi sulisuullutik. Tamatuma saniatigut pisortat pilersuisoqarfii Nukissiorfiit, Innaallagissiornermut Oqartussaasut, Pinngortitaleriffik aamma Asiaq Naalakkersuisoqarfimmi immikkoortortaqarfittut inissisimapput. Naalakkersuisoqarfimmi inuiaqatigiinnut sullissinerit pingaarutillit, Kalaallit Nunaannut iluaqutissat isumagisaraagut. Pitsaasumik ataqatigiinneq aammalu inuit namminneerlutik angusassanut sunniuteqarnissamut inissaqartinneqarnissaat pingaartipparput. Ineriartortitsinermi suliassat pissanganartut suliaraagut, aammalu suliffinni ineriartorsinnaallutit misigisimanissat uagutsinnut pingaaruteqarpoq. Naalakkersuisoqarfimmi aqutsisut suliffimmi atugarissaarnerup attatiinnarnissaa pingaartippaat. Naalakkersuisoqarfimmi ingerlaarnerput, tunniusimanerput akisussaaqatigiinnerpullu ilisarnaatigaarput. Naalakkersuisoqarfimmi ataatsimoorpugut, assigiinngissutsivut nukigalugit. Taamaattumik toqqissisimaffigisannik avatangiiseqarnissat, tamatumunngalu sulianut tapertaanissat piareersimaffigisinnaassavat.

Qinnuteqarnissamut killigititaq

Atorfik pillugu allanik apeqqutissaqaruit naalakkersuisoqarfimmi pisortaaneq Natuk Lund Meire, tlf. +299 34 64 76-imut imaluunniit e-mail: natl@nanoq.gl aqqutigalugu attaveqarfigisinnaavat.

Qinnuteqaat, CV-mik aamma soraarummeernermut uppernarsaatinik ilaqartinneqartoq kingusinnerpaamik 10.03.2025-imi linki matuma kinguliani allassimasoq aqqutigalugu nassiunneqassaaq.

E-mail-ikkut qinnuteqaatinik tigusineq ajorpugut

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk