Kommuneqarfik Sermersuumut paasissutissiisartoq

Aaqqissuussaasumik misissueqqissaartumillu suleriuseqarpit aamma ersarissumik eqqoqqissaartumillu paasissutissanik ingerlatitseqqiinissat soqutigaajuk? Innuttaasut, suliffeqarfiit aamma Kommuneqarfik Sermersuumi sulisut piffissaq eqqorlugu eqqortumik paasissutissiiffigisarnissaanik qulakkeerinneqataarusuppit? Taava immaqa tassa illit paasissutissiinermi sulisussarput nutaaq!

Kommuneqarfik Sermersuumi Attaveqaqatigiinnermut immikkoortortamit nutaamik aaqqissuussineq ingerlanneqarpoq, tassani Attaveqaqatigiinnermut Paasissutissiinermullu immikkoortortaq avissavarput. Paasissutissiisarnermi suleqatigiinnut ilaasutut kommuneqarfiup suliffiup iluani avataanullu paasissutissiisarneranik ineriartortitsinermi, aaqqissuussinermi ingerlatitseqqiinermilu pingaarutilimmik inissisimassaatit.

Atorfik pillugu

Paasissutissiinermi sulisutut paasissutissanik ingerlatitseqqiinermi siammasissumik suliaqartassaatit, digitalikkut aammali tigussaasunik atortunik. Suliassatit ilaatigut makkuussapput:

∙Innuttaasunut, suliffeqarfinnut kommuneqarfimmilu sulisunut paasissutissanik suliaqarneq nutarterillunilu suliaqarneq

∙Kommuneqarfiup nittartagaani aamma paasissutissiisarfiini allani imarisanik aaqqissuussineq pitsanngorsaanerlu

∙Kommuneqarfiup imminut kiffartuunnermut aaqqiissutaani ersarissumik pissarsiarineqarsinnaasunillu paasissutissaqarnissaanik qulakkeerinninneq

∙Ilitsersuutinik, apeqqutigineqakulasunik (FAQ) paasissutissiinermilu atortunik allanik ineriartortitsineq

∙Kommuneqarfiup allattariarsornikkut paasissutissiissutaanik pitsaassusermik qulakkeerinninneq, taamaasillutik paasiuminarniassammata atuisunullu ajornannginnerussammata

∙Paasissutissat assigiit eqqortullu qulakkeerniarlugit Kommuneqarfiup ingerlatsiviinik suleqateqarneq

Naatsorsuutigaarput:

∙Naapertuuttumik ingerlaqqiffiusumik ilinniagaqarsimasutit (ass. attaveqaqatigiinnermut, inuiaqatigiilerinermut imaluunniit paasissutissanik ilisimatusarnermut tunngasumik)

∙Paasissutissiilluni sulinermik misilittagaqartutit, ajornanngippat pisortat suliffiuteqarfiinik

∙Allattariarsornikkut piginnaasaqarluartutit aamma sammisanik ajornakusoortunik ersarissumik paasiuminartumillu ingerlatitseqqiisinnaasutit

∙Digitalikkut attaveqaqatigiinneq aamma naqiterinermik suliaqarneq ilisimasaqarfigigitit, tassunga ilanngullugu nittartakkamik allanngortiterineq

∙Aaqqissuussaasumik sulisinnaasutit, immikkuualuttunik pingaartitsisuuvutit aamma sullinniakkat pisariaqartitaannik tamakkiisumik isiginnilluarsinnaasutit

∙Kalaallisut qallunaatullu allattariarsorsinnaassaatit oqalussinnaallutillu imaluunniit ilinniarusussinnaassavatit

Neqeroorutigaavut

∙Aaqqissuussami ineriartorfiusumi suliffik pissanganartoq tamatigoortorlu

∙Suliatigut inuttullu ineriartornissamut periarfissat pitsaasut

∙Suliffik tunniusimaffiusoq aamma sulianut paasisimasaqarluarfiusoq pikkorissunik sulisulik

∙Aningaasarsiatigut atorfinitsitaanermilu atugassarititaasut isumaqatigiissut atuuttoq naapertorlugu pissapput

Pineqaatissinneqarsimannginnermut uppernarsaat:

Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Immikkoortortami Aqutsisoq Rasmus Christiansen, oqarasuaat +299 55 04 94 imaluunniit e-mail: rach@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 405-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: maajip 16.-at, 2025

Atorfik una qinnuteqarfigiuk