Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik Nunamut Namminermut Immikkoortortaqarfimmut AC-fuldmægtigissarsiorpoq/immikkut siunnersortissarsiorpoq

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik Nunamut Namminermut Immikkoortortaqarfimmut AC-fuldmægtigissarsiorpoq/immikkut siunnersortissarsiorpoq

Nunamut Namminermut Immikkoortortaqarfiup Naalakkersuisut nunamut namminermut politikkiat pillugu ulluinnarni allaffissorneq piviusunngortitsinerlu isumagisarai. Immikkoortortaqarfik amerlasuunik suliassaqarpoq, naalakkersuinikkut isummernissamut tunngavissiat suliarineqarneranniit nunamut namminermut suliassaqarfimmik ineriartortitsineq, allattoqarfiuneq aamma kommuninik nakkutilliinermut.

Suleqatissamik tunniusimasumik suleqatitsinnut pissarsiorpugut, Naalakkersuisut nunamut namminermut politikkiat pillugu allaffissornermik aamma ineriartortinneranik isumaginnilluta. Naalakkersuinikkut aalajangiisarnermut tunngasut soqutigisarigukkit aamma Kalaallit Nunaanni qanimut oqartussaanermik nukittorsaanissamut peqataarusullutit, peqatigalugu kommuninut tunngasunik apeqqutinik suliaqarnissaq soqutigalugu, taava allannguinissamut manna illit periarfissarivat. Allaffeqarfitsinni suliassanik soqutiginartunik assigiinngitsorpassuarnik suliaqarnissamut periarfissaqarputit suleqatigiinnullu tunniusimasunut ilaalerlutit.

Atorfiup nassuiarnera

Nunamut Namminermut Immikkoortortaqarfimmi suleqatitut immikkoortortaqarfimmi ingerlatsinerup sunniuteqarluarnissaanut ineriartortitsinermilu suliniutinik siuarsaanermut pingaaruteqartumik inissisimassaatit. Suleqatitit peqatigalugit Naalakkersuisorput sullinneqarneranut peqataassaatit aamma suliniutit assigiinngitsut amerlasuut nunamut namminermut politikkip ineriartortinneranut sunniuteqartussat suliarissavatit.

Immikkoortortaqarfipput mikisunnguuvoq, peqatigiilluni kivitsiffiusoq aamma suliamut pikkorissuseq naleqartitaasoq kiisalu qiimasumik eqaatsumillu pissuseqarfiusoq. Suliassat assigiinngitsorpassuit isumagisarpagut, amerlasuutigut ataqatigiissaartariaqartut, suliniutit aqunneqartariaqarlutik misissueqqissaarinermilu piginnaasaqarfiusariaqartut.

Illit suliassatit pillugit immikkoortortaqarfimmi pisortaq erseqqinnerusumik isumaqatigiissuteqarfigalugu aaqqissuunneqassapput. Piffissami maannakkut siunissamilu qaninnerpaami immikkoortortoqarfiup suliassat tulliuttut isumagissavai:

• Kommunit aaqqissugaanerat pillugu siunnersuusiorneq

• Kommunini qanimut oqartussaataqaanermut atatillugu suliassat

• Inatsisartunut kommuninullu qinersinissamut piareersarneq piviusunngortitsinerlu

• Kommunit inatsisitigut immikkut pisinnaatitaasut pillugit misileraanermik ineriartortitsineq piviusunngortitsinerlu

• Kommunalbestyrelsimut ilaasortanik pikkorissaanermik pilersaarusiorneq ingerlatsinerlu

• Kommunalbestyrelsimut ilaasortanut paasissutissanik atugassaannik suliaqarneq

• Allaffissornikkut suliassat suliarineqartarnerat

• Suliffeqarfiup iluani avataanilu soqutigisaqaqatigiinnik attuumassuteqartunik ataqatigiissaarineq suleqatigiinnerlu

• Nunamut Namminermut Naalakkersuisup sullinneqarnera

• Pinasuartumik suliassat allat

Piginnaasat:

• Ingerlaqqittumik ilinniagaqarneq attuumassuteqartoq

• Naalakkersuinikkut aqunneqartumik aaqqissuussap iluani misilittagaqarneq iluaqutaassaaq, kisianni ilinniakkaminnik naammasserlaat pimoorussisut aamma qinnuteqarnissamut kaammattorneqarput

• Suleqatikkuminartoq akisussaaffigiumannittorlu

• Ulluinnarni ulapaarfiusinnaasuni aaqqissuussisinnaasoq, pingaarnersiuisinnaasoq ataatsimullu isiginnissinnaasoq

• Suliassat aaqqiviginissaannut eqaassuseqartoq

• Allakkatigut oqaatsitigullu erseqqissuliorsinnaasoq

Neqeroorutigaarput:

• Naalakkersuinikkut aalajangiisarneq qanimut suliffiginissaanut periarfissatsialak

• Suliffimmi avatangiisit pingaartorsiorfiunngitsut qanittuaqqamik attaveqaqatigiiffiusut suleqatillu tunniusimasut

• Ullormiit ullormut suliassat pissanganartut allanngorartullu

• Inuttut suliamullu tunngatillugu ineriartornissamut periarfissaqartoq

Suliassaqarfimmi misilittakkatit killeqarpata, sakkortuumik ilinniartinneqarnissaq naatsorsuutigineqarsinnaavoq. Ilinniakkaminnik naammasserlaat qinnuteqarnissaat tikilluaqqusaapput.

AC-fulgmægtigitut imaluunniit immikkut siunnersortitut atorfinitsitaanermut piginnaasat apeqqutaatinneqassapput.

Qinnuteqaatit tigunissaanut qilanaarpugut aamma Naalakkersuisunut sullissineq, Nunamut Namminermut Immikkoortortaqarfiup suliassai suliffeqarfippullu ulapaarfiusoq pillugit annertunerusumik paasissutissat pillugit piareersimalluta.

Atorfik pillugu paasisaqarnerorusukkuit, immikkoortortaqarfimmi pisortaq Aka Grønvold mailikkut akgr@nanoq.gl-ikkut piareersimavoq. Qinnuteqaatit ingerlaavartumik suliarineqassapput, kisianni kingusinnerpaamik 31. marts 2025-mi naalakkersuisoqarfimmeeriissallutik. Atorfinitsitaaneq isumaqatigiissuteqarnikkut pissaaq.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk