Ilaqutariinnik sullissinerup iluani ineriartortitsinermut / pilersaarusiornermullu siunnersortimik Isumaginninnermut Aqutsisoqarfik pissarsiorpoq

Nunatsinni meeqqanut / inuusuttunut ilaqutariinnullu atugarissaannginnerusunut sullissiniarnermi Isumaginninnermut Aqutsisoqarfimmi Ilaqutariinnut siunnersueriaatsip atuutsilernissaa ineriartortinnissaalu nukittorsaaqataaffigerusuppiuk? Atuartitsisinnaavit? Paasiuminaatsullu paasiuminarsitillugit ingerlatsinermik aallussillaqqippit aammalu tamalaanik suleqateqarnerup pingaaruteqassusaa ukkassinnaaviuk? Taava immaqa illiuvoq ujartugarput!

Atorfik pillugu

Atorfik suleqatigiiaani ilaqutariinnik siunnersuinermik ukkasseqatigiiusuni atorfiuvoq, nunalu tamakkerlugu Meeqqanik – Inuusuttunillu sullissinermi ilaqutariinnik siunnersuinermik kommunenut sullissinerulluni.

Ineriartortitsinermut / pilersaarusiornermullu siunnersortitut sulinermi namminersorlutit sulissaatit, Kalaallit Nunaatalu sineriaani ilaqutariinnik siunnersueriaatsip atuutilersinnissaa pillugu atuartitsinikkut paasiuminarsaallutit suliaqassallutit. Kommuninik qanittumik suleqateqassaatit, matumani pingaartumik ilaqutariinnik sullissinermi qitiusoqarfiit suleqatigilluinnassallugit taamalu angalangaatsiartassallutit.

Ilaqutariinnik siunnersueriaatsimik kommunet atuutsitsilernissaasa nukittorsarneqarnissaat matumani pingaaruteqarpoq, soorlu sumiiffimmi aqutsisoqatigiinnik aallarnisaasussanik – aammalu aallarnisaasussat attaveqaatissaannik aammalu ilinniartitseqatigiittartussanik pilersitsinerit pilersinneqassapput.

Suliassat ilaatigut makkuussapput:

• Kommunet suleqatiginerisigut atuartitsinerit – aammalu periutsip atuutsilernissaanut sinaakkutissanik suliaqarneq

• Ineriartortitsineq, sungiussiniarneq aammalu ilinniartitsissutissanik ingerlatitseqqiineq

• Pilersaarusiorneq atuartitsinernillu ingerlatsineq

• Piuminarsaaneq aammalu kommunep atuutsitsiartuaarneranut tapersersuineq

• Aallarnisaasunut aammalu ataatsimut aaqqissuussisunut supervisionertitsinernik ingerlatsinerit

• Nalunaarsuinerit qulakkeerneqarnissaat nalilersuinernilu peqataalluartarnissaq

• Website-tsinnut aaqqissuineq allannerlu, quppersagaaqqanillu suliaqarneq il.il.

• Ilaqutariinnut sullissinermut tunngasunik pilersaarusioqataaneq soorlu ataatsimiinnernut piuminarsaaneq, workshopinut aammalu ullunut immikkut sammisaqarfiusunut

• Ad-hoc – mut tunngasumik suliassat

Ilinnut tunngasut

Sulisortaarerusutarput tassaavoq; ilaqutariinnut katsorsaanermi terapi-mulluunniit tunngasumik ilinniarsimanermigut tunuliaqutarissaartoq, aammalu ineriartortitsinermut suliniutinulluunniit ingerlatsinermut paasisimasaqarluartoq misilittagaqartorlu.

Ataani immikkoortukkuutaat amerlanerit ilisarisinnaassagitit naatsorsuutigaarput:

• Isumaginninnermut siunnersortitut ilinniagalik, perorsaasutut ilinniagalik imaluunniit ilaqutariinnik katsorsaanermut ilinniaqqissimanermigut allagartalik terapeutitulluunniit ilinniagalik.

• Ilaqutariinnik katsorsaanermik misilittagalik ilaqutariinnik siunnersueriaatsinik misilittagaqarneq iluaqutaassaaq

• Atuartitsinermik misilittagalik, aammalu kommuneni siunnersortitut piuminarsaalluni atuutsitsilernernillu misilittagalik.

• Suliamut ilisimasaqarluartut peqatigalugit ataatsimoorluni pilersitseqatigiinnernik misilittagalik

• Sammisami ataatsimi suleqatit allaneersut peqatigalugit aammalu kulturikkut allaanerussuteqaraluartut suleqatigisinnaaneri, ataatsimoorussamik aaqqiissuteqarnissaq anguniarlugu ataasiakkaatut tunniussaqarsinnaaneq

• Suliassanut nutaanut eqaatsumik ammasumillu pissuseqarluni ineriartortitsisinnaaneq

• Namminersorluni sulisinnaaneq, akisussaaffimmik aammalu aallarnisaasinnaanermik sapiissuseqarneq

• Atassuteqaatigisanut attassillaqqissuuneq

• Sulianut tamalaanut ukkassillaqqissuuneq, aaqqissuussamik sulisinnaasoq, aaqqiissuteqarsinnaasoq aammalu ineriartortitsisinnaassuseqartoq

• Kalaallit Nunaanni pissutsinut patajaatsumik ilisimasaqarluartoq, pingaartumik inunnik isumaginninnermut tunngasunut.

• Kalaallisut danskisullu oqalussinnaasoq

Neqeroorutigaagut

Suliami imaqarluartumi Kalaallit Nunaanni ilaqutariinnik siunnersueriaatsimik atuutsitsilernermi nukittorsaaqataassaatit. Tamatigoortumik atuuffeqarnikkut tamalaanik suliaqartassaatit suleqatigiikkuutaat suliamut ilisimaarinnilluartut nukittuut misilittagartuullu immikkoortortaqarfitsinni suleqatigiit illallaqqissut peqatigalugit

Saniatiguttaaq misigisassaapput:

* Anersaaq nukittoqatigiiffiusoq, suut tamarmik pitsaanerulersinnissaat anguniarlugu ikioqatigiilluarfiullunilu siunersioqatigiiffiulluartoq

• Aqutsisoq illit piginnaasannut tatiginnittoq, piviusorsiortumik piumasaqartoq aammalu illit ineriartornissannut salliutitsisoq

• Suleqatit pitsaasut, peqatigiilluarnissamik pingaartitsisut, aamma ulapiffiusumi.

• Persuarsiunngitsumi suliamut sunniuteqarsinnaaneq

• Suliamut atatillugu angalasinnaaneq, nunarpullu tamaat misigalugu

Uagut pilluta

Atorfik pineqartoq Isumaginninnermut Aqutsisoqarfiup iluani isumaginninnermut suliaqartunut siunnersuisoqarfimmiippoq.

Sullissisunik Siunnersuisarfimmi Immikkoortortaqarfik assigiinngitsunik suleqatigiikkuutaaqarpoq, taakku kommuneni isumaginninnermut suliassanut aammalu Meeqqanut, Inuusuttunut tunngatillugu, innarluutilinnut angajoqqaarsiaqartitsinermut, Meeqqat – ilaqutariillu qitiusoqarfiannut aammalu ilaqutariinnut siunnersuinermut tunngasunut tapersersortaapput. Tamatuma saniatigut Pissassarfik immikkoortortaqarfimmut aamma atavoq.

Aaqqissuussaanerup allanngornissaanut atatillugu Ajutuulernermi Upalungaarsimasut qitiusoqarfianni siunissami aamma ataqatigiissaarisuussaagut.

Isumaginninnermut Aqutsisoqarfik Meeqqanut, Inuusuttunut Ilaqutariinnullu Naalakkersuisoqarfiup ataani aqutsisoqarfiuvoq.

Isumaginninnermut aqutsisoqarfik arfineq-marlunnik immikkoortortaqarfeqarpoq: Pitsaaliuinermut immikkoortortaqarfik Paarisa, Aningaasaqarnermut immikkoortortaqarfik, Ulloq Unnuarlu Inissitsiterinermullu Immikkoortortaqarfik, Meeqqanut Inuusuttunullu Immikkoortortaqarfik, Sullissisunik Siunnersuisarfimmi Immikkoortortaqarfik, Inulerinermut Immikkoortortaqarfik.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Ulloq atorfiniffissaq

1. Maj 2025 isumaqatigiissuteqarnikkulluunniit

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Attaveqarfissaq 

Atorfik pillugu paasissutissanik sukumiinerusunik pissarserusukkuit Immikkoortortami pisortaagallartoq Ellen Bækgård oqarasuaammut uunga sianerlutit attavigisinnaavat 520319 imaluunniit e-mailianut uunga allaffigalugu elba@nanoq.gl

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk