Ilisimatusarfimmi uumassusilerinermi SILA Bachelorimi studieadjunkti, adjunkti/adjunkti ph.d-nngorniaq imal. lektori

Ilisimatusarfimmi ilinniartitaanermi nutaami uumassusilerinermi SILA Bachelorinngorniarfimmi suleqatigiinnut ikittunut tunniusimallutik qanimut suleqatigiinnut peqataarusuppit?

2025-imi februaari qaammat uumassusilerinermi SILA bachelorinngorniat siulliit aallartipput. Ilinniartitaaneq ullumikkut uumassusilerituunik/biologinik sisamanik atorfeqavissunik sulisoqarpoq aqqaneq marlunnillu ilinniartoqarluni. Maanna Ilisimatusarfimmi ilinniartitsisunut ilisimatusartunullu atorfiit aaqqissuussaanerat pillugu isumaqatigiisut 1. november 2010-meersoq innersuussutigalugu, suleqatissatsinnik SILA bachelorinngorniarnermi ilinniartitsisussamik, 2025-imi majip ulluisa aallaqqaataanni – immikkulluunniit isumaqatigiissuteqarnikkut sulilersussamik, pissarsiorpugut.

Qinnuteqartoq ph.d.-nngorsimappat piffissap suliffiusup 45%-ia ilisimatusarnermut atorneqarsinnaavoq. Qinnuteqartoq kandidatiuppat studieadjunktitut imal. adjunktitut ph.d.-nngorniartutut atorfinittoqarsinnaavoq.

Suliassat:

• Suliassat pingaarnerit tassaapput SIKU aamma QILALUGAQ qulequtsiullugit pikkorissaanerni, silap pissusaata allanngorneranik ingerlatsinermillu pingaarnertut sammisaqarfiusuni ilinniartitsineq. Tamatumunnga atatillugu, ilinniartitsisoqatigiit atorfeqavissut suleqatigalugit, ilinniartitsinernik ataqatigiissaarineq.
• Ilinniartitsisoq uumassusilerinermi SILA bachelorinngorniarnermi, pingaartumik SIKU aamma QILALUGAQ qulequtsiullugu pikkorissaanernik pilersaarusiornermi peqataassaaq.
• Suliassanut ilaassapput, immikkoortortami aqutsisoq qanimut suleqatigalugu ataqatigiissaarineq, ataatsimiittarnerit, malitseqartitsineq, ingerlanera pillugu - ilaatigut nittartakkakkut, nutaarsiassiissutitigut tusagassiivitsigullu allatigut- attaveqatigiinneq.
• Pisariaqartitsinermi ilaatigut ilinniartitaanerup immikkoortortallu inerisarnerat ilinniartunillu siunnersuineq.

Qinnuteqartunit naatsorsuutigisat:

• Silap pissusaanut pissuussutinillu uumassusilinnik nakkutilliinermut tunngatillugu fagimi naapertuuttumi ilinniakkamik tunngavilimmi kandidatinngorsimaneq imal. ph.d.-nngorsimaneq
• Nunatsinnik nunatsinnilu ilinniartitaanernik qanimut ilisimaarinninneq.
• Ilinniartitsinermik misilittagaqarneq
• Pinngortitamik ilisimatusarnermut tunngasumik ilinniartitaanermut periutsimik nunatsinni kisiartaasumik inerisaaqataarusunneq, nunatsinni ilinniartitaanermik iluatsilluartumik, inuusuttunut suliffinnullu naleqqussakkanik periarfissanik nukittoqutinillu pilersitseqataasinnaasunik takunnissinnaaneq.
• SILA immikkoortortami Peqqissaanermut Pinngortitamullu Ilisimatusarfimmi sulinermi ilinniarnermilu naleqartitanik pitsaasunik pilersitsiqataanissamut piumassuseqarneq.
• Kalaallisut oqalussinnaaneq imal. ilinniartitaanermi atorsinnaasanik tunngaviusumik naapertuuttunik kalaallisut oqaatsinik atorsinnaasanik inerisaasinnaaneq.
• Silap pissusaa pillugu isumaqatigiinniarnernik, nunap inoqqaavinik ingerlatsinermillu misilittagaqarneq iluaqutassaaq.

Neqeroorutigisinnaavagut:

• Sullivimmi avatangiisit pitsaasut, sulisut ilinniartullu iluarisimaarinninnissaannik ukkassiviusut.
• Suleqatit kajumissusillit, qanimut suleqatigiissut siunersioqatigiinnissamut tapersersuinissamullu periarfissiisut.
• Suliffik sunniuteqarnissamut annertuumik periarfissalik.
• Ilinniagaqassutsikkut ilinniartitsinikkullu ineriartornissamut periarfissalik.

Qinnuteqaat:

Qinnuteqaat saniatigut makkunannga ilaqassaaq:

Ilanngussaq 1: Curriculum Vitae

Ilanngussaq 2: Bachelorinngorsimanermut kandidatinngorsimanermullu immaqalu phd-nngorsimanermut uppernarsaat.

Ilanngussaq 3: Ilanngussinnaasat allat

Attavissaq/paasissutissat:

Atorfik annertunerusumik paasisaqarfigerusukkukku, Institutip pisortaa Anna Kleist Egede ankl@uni.gl imal. immikkoortortami pisortaq Aviâja Lyberth Hauptmann alha@uni.gl attavigisinnaavatit.

Peqqissaanermik Pinngortitamillu ilisimatusarfimmi SILA bchelorinngorniarnerup saniatigut; peqqissaasunngorniarneq, sulinermik sungiusaasutut ilinniartitaaneq pikkorissaanerillu ataasiakkaat ingerlanneqarput. Instituttimi ilaapputtaaq Peqqissutsimut Ilisimatusarfik eqeersimaartoq ineriartortorlu. Institutti aalajangersimasumik atorfilinnik arfineq marluk qulillu akornanni amerlassusilinnik- ilisimatuunik ilisimatusarfimmut atassutilinnik arlalinnik, lektorit ilisimatusartunillu sulisoqarpoq. Maanna Instituti tamakkerlugu 45-50 missaannik bachelorinngorniartoqarpoq, qulillu aqqaneq marlullu akornanni Ph.d.-nngorniartoqarluni. Institutimi ilisimatusarnermi avatangiisit ilinniakkat akimorlugit suleqatigiiffiupput, peqqinnerup pinngortitallu akornanni attavimmik aallaaveqarlutik.

Ilisimatusarfik, Peqqissaanermik Pinngoritamillu Ilisimatusarfik aamma uumassusilerinermi SILA Bachelor uani annertunerusunik paasisaqarfigisinnaavatit, www.uni.gl

Naliliisarneq atorfinitsitsisarnerlu, adjunktinut lektorinullu atorfinnut

Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.

Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorit naliliinerat tunngavigalugu studielektoritut atorfittut aalajangersimasunngorlugu atorfinitsinneqarsinnaavoq.

Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq.

Adjunktitut sulineq ph.d.-mik ilalik: Atorfik adjunktitut atorfiusinnaavoq ukiut 6-it tikillugit, atorfininnermi ph.d.-mik sammisaqarnissamik isumaqatigiissusiortoqarsimappat. Adjunktitut atorfinitsitsineq ph.d.-mik ilalik pisinnaavoq ph.d.-mik ilinnialerniarluni nalunaarnermi malittarisassat atuuttut malinneqarsimappata.

Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut aqqaneq marluupput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik
• Inuiaqatigiilerinermik, Aningaasaqarnermik Tusagassiornermillu Ilisimatusarfik
• Kulturimik, Oqaatsinik Oqaluttuarisaanermillu Ilisimatusarfik
• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk