Aalisarnermut akuersissutilerisoqarfimmi allaffik nutaaq pilersinneqaqqammersoq, , Aalisarsinnaanermut akuersissutinut inuussutissarsiutinullu tapiissutit allaffiat, piffissami killimmi allaffimmi pisortassarsiorpoq

Aalisarnermut Piniarnermullu Naalakkersuisoqarfimmi Aalisarnermut immikkoortortami allaffimmi pisortaq tamatigoortunik suliaqarsinnaasoq, aqutsinermik suliaqarfiillu assigiinngitsut suleqatigiinnerinik misilittagalik suliat suliarineqarnerinik inerisaanermut siuttuusussaq kiisalu Aalisarsinnaanermut akuersissutinut inuussutissarsiutinullu tapiissutit allaffianni (ESU) pilersinneqaqqammersumi ulluinnarni aqutsisussamik sulisussarsiorpoq. Atorfik ukiunut marlunnut sivisussusilikkamik atorfiuvoq.

Allaffimmi pisortassarsiortoqarpoq, taassuma suliassai pingaarnerit tassaassallutik allaffiup ulluinnarni suliassaanik ingerlatsineq matumanilu eqaallisaaneq, pilersaarusiorneq, ineriartortitsineq sullissinerlu. Tamatumap saniatigut allammi pisortap allaffiup aamma Aalisarnermut immikkoortortaqarfiup, Kalaallit Nunaanni Aalisarsinnaanermut Piniarsinnaanermullu Nakkutilliisoqarfimmik (KANUAPNA) kommunillu akornanni suleqatigiinnerup ataqatigiissaarneqarnera. Aalisarsinnaanermut akuersissutit inuussutissarsiutinullu tapiissutit allaffeqarfiat Aalisarnermut immikkoortortaqarfiup ataaniippoq aamma ingerlatsinermut suliassat arlallit suliarisarpai, ilaatigut akuersissutinik tunniussineq, pisassiissutinik niuerutaasunik suliaqarneq kiisalu sinerissap qanittuani aalisarnermut tunngasunik kommuninik suleqateqarnerit. Taakku saniatigut inuussutissarsiutinut tapiissutinik suliassaqarfik suliassanut ilanngunneqaqqammerpoq, taamaalillunilu allaffik aalisartunut piniartunullu tapiissutitut aaqqissuussat assigiinngitsut arlallit aqqutigalugit inuussutissarsiutaannut tapiissutinik aamma tapiissutinik suliarinnillunilu tunniussuisalerpoq. 

Allaffik aalisarneq pillugu inatsisip nutaap atuutilersinneqarneranik, kommuninik suleqateqarnermik nalilersuinermik kiisalu tapiissuteqartarneq pillugu inatsimmik nutarsaanermik ilaatigut inerisaalluni pissanganartumik suliaqartussaavoq. Taamaattumik allaffiup pisortartaassaa immikkoortortami pisortamik sulisunillu qanimut suleqatiginnilluni sulianik taakkununnga akisussaaffilik pisariaqartinneqarpoq. Taakku saniatigut allaffimmi pisortap immikkoortortami suliassat suliarineqarneri ulluinnarnilu aqutsineq akisussaaffigissavai, matumani Naalakkersuisumut Naalakkersuisunullu kiisalu immikkoortortami pisortamut akuerisassanngortitassat inassuteqaatillu atuuttunngortinneqarneri ilanngullugit.

Allaffik piffissami matumani sisamanik sulisoqarpoq, piffissallu ilaani ilinniartoqartarluni. Suliassanut tunngatillugu Aalisarnermut Piniarnermullu Naalakkersuisoqarfiup immikkoortortaqarfiinik allanik, Qitiusumik allattoqarfik, kommunit aammalu aalisarnermik ingerlatsisut qanimut siunnersueqatigiinnermik suliaqartarpoq. Allaffimmi pisortatut Naalakkersuisoqarfimmi qitiusumillu allaffeqarfimmi akimortumik suleqatigiinnerup ataqatigiissaarnissaa akisussaaffigissavat. Kommunit aamma Aalisartunut Piniartunullu Siunnersuisarfiup (AAPISI)-p suleqatiginerinut kiisalu aalisartut kattuffiisa suleqatiginerinut ilaatigut aamma akisussaaffeqartitaassaatit.

Avatangiisini pissanganartuni suliatigullu unammillernartuni, suliatigut ineriartornissamut periarfissalimmi, sulisoqassaaq. Taamaalilluta suliffik nutaaliornermik nutaamillu eqqarsarnermik samminnittoq neqeroorutigaarput; sulineq, politikkikkut aalajangiisarnermut qanittoq; sullivimmi avatangiisit persuarsiorfiunatillu ammasut pimoorussissunik sulisullit; inuttut pissanganartut suliatigullu unammilligassat.

Suliassat

Allaffimmi pisortap Aalisarsinnaanermut akuersissutinut inuussutissarsiutinullu tapiissutit allaffiup ulluinnarni suliarineqartartut akisussaaffigissavai, makkua ilanngullugit:

• Aqutsisoqatigiit tunngaviusumik periusaat malillugu allaffimmik aqutsinissamut akisussaaffeqarneq
• Allaffimmi ingerlatsineq matumanilu sulianik agguaassineq, suliassanik suliaqarnerit pingaarnersiuinerlu.
• Akuersissutinik tunniussineq pillugu kommuninik suleqatigiinnerup ataqatigiissaarneqarneranut ineriartortinneqarneranullu akisussaaffeqarneq
• Aalisarnermut immikkoortortamik, immikkoortunillu allanik avataanilu suleqatigisartakkanik qanimut suleqateqarneq immikkoortortami pisortamik suleqateqarluni ataqatigiissaarinninneq
• Sulianut atatillugu allattorsimaffiup ineriartortinnissaanut akisussaasuuneq matumanilu sullissivik.gl-mi qinnuteqarnermi immersugassat imarisai aamma Aalisarneq pillugu paasissutissaasivimmi LULI-mi paasissutissat immikoortukkaartut aammalu
• Allaffiup suliassaasa allattorsimaffiannut tunngasunik, kisitsisinik suliaqarnermut nutarterinermullu akisussaaffeqarneq
•  Allaffimmi sulianut atatillugu kisitsisinik nalunaarsuineq
• Allaffiup inuttaqartitaaneranut aamma sulisut pillugit
• Inatsisit malittarisassallu atuuttut naapertorlugit aqutsinermut akisussaaffeqarneq
• Allaffiup pisortaata sulianik suliaqarnermi sulianillu aaqqiissuteqarnermi ikiuuttarnissaa naatsorsuutigineqarpoq
• Naalakkersuisoqarfimmi allaffissornikkut najoqqutassat, periutsit, pitsaassutsimullu piumasaqaatit nalinginnaasut atuutilersinneqarnerini peqataaneq
• Politikkikkut aqutsisut aalajangiinissaannut tunngavissaannik suliat pitsaassusaannik qulakkeerinneqataaneq aamma suliassat allaaserineqartut iluini politikkikkut aalajangikkanik atuutilersitsinerit
• Aalisarnerup iluani Inuussutissarsiutinillu tapiisarnermut ataatsimiititaliap suliaqarfiata iluani inatsisiliorneq taakkunanngalu atuutilersitsineq

Piginnaasassatut piumasaqaatit:

Tamatigoortumik aqutsisumik sulisussarsiortoqarpoq attuumassutilimmik ilinniarsimasumik kiisalu uppernarsaasikkamik aqutsinermik misilittagalimmik. Tamatuma saniatigut ilaatigut makkua piginnaasaqarfigineqassapput:

• Aqutsinermut misilittagaqarneq soqutigisaqarnerluunniit
• Kalaallisut aamma danskisut piginnaasaqarluarnissaq,
• Pitsaasumik tuluttut piginnaasaqarneq iluaqutaassaaq,
• Naalakkersuisoqarfiup Namminersorlutillu Oqartussat akisussaaffii tamakkerlugit ilaannakortumilluunniit suliamut tunngasutigut misilittagalik
• Aqutsinermik suliassanik misilittagaqarneq, ajornanngippat tapiissuteqartarnermut aamma/ imaluunniit akuersissutinik tunniussisarnermik,
• Excel, XAL aammalu toad-imik misilittagaqarnerit iluaqutaassapput
• Attaveqaqatigiinnermik/paasissutissiinermik aamma kattuffiit assigiinngitsut suleqatiginerinik misilittagalik
• Aaqqissuussaasumik suleriaasilik aamma sulianik tamanik malinnaallaqqissuuneq
• Suleqatiginnillaqqisoq, ammasoq aamma sungiussiasoq
• Aalajaatsuuneq aamma qiimasuuneq

Piffissamik killilikkamik atorfik pineqarmat ineriartortitsinermut anguniagassat ukiut marluk ingerlaneranni angoriigassanik suliassartalerneqassaaq.

Suliffiup sumiiffia Aalisarnermut, Piniarnermullu Naalakkersuisoqarfik, Nuuk Atorfik piaartumik inuttalerneqarusuppoq imaluunniit atorfimmut inuk tulluuttoq isumaqatigiissusiorfigalugu inuttaliisoqarusulluni. Angalasarnissaq naatsorsuutigineqarsinnaavoq.

Atorfik pillugu paasissutissat annertunerusut pissarsiarineqarsinnaapput Immikkoortortaqarfimmi pisortaq Katrine Kærgaard, katk@nanoq.gl -mut saaffiginninnikkut 

Akissarsiat atorfeqartitaanermilu atugassarititaasut:

Atorfik akissaateqarfiit immikkoortuani LR 36-mi massakkut inissisimavoq.

Aningaasarsiat aalajangersimasunik aningaasarsianut immikkoortuini LR 36-mi 1. april 2022-miit qaammammut 47.777 Kr.-upput ukiumullu 573.321.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.

Akissarsianut atorfeqartitaanermullu piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput. Naalagaaffimmi tjenestemandit aamma AC-nut isumaqatigiissutit arlallit, ilaatigut DJØF-ip Finansministereqarfiullu akornanni isumaqatigiissutit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput. Nunamut namminermut ministereqarfiup aammattaaq kommuninut immikkoortortanullu Kalaallit Nunaanni Namminersorlutik Oqartussani atorfinitsinneqarnermi aningaasarsiaqarani sulinngiffeqarnissamut qinnuteqaatit tigulluarneqartarnissaannik innersuussutigisimavaa.

Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut katissimasaannut /aappaannut aamma atuupput.

Aallaavittut sapaatip akunneranut sulineq akunnernik 40-nik sivisussuseqarpoq, aamma ukiumut akunnerni 320-ini qaammatillu pingasuugaangata akunnerni 80-ini suliartoqquneqarsinnaaneq atorfininnermut attuumapput, ullullu sulinngiffiusussat annaaneqarsimasut ajunngitsorsiassaqarfiginissaat pillugu aalajangersakkat atuutinngillat.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk