Tasiilami ukioqatigiinngitsunut meeqqerivimmut Pingajeqqad'nut aqutsisussarsiorneq

Aqutsineq aamma meeqqat inuunerissut pingaartippigit? Tamakkiisumik isiginnittariaaseqarpit aamma nammineq allalluunniit "suliai arlallit" tigummisinnaavigit sulilu qungujulallutit - taava immaqa ILLIT tassaavutit, Tasiilami meeqqerivimmi aqutsisussatut pissarsiarerusutarput.

Ukioqatigiinngitsunut meeqqerivik Pingajeqqad meeqqanut 88-inut 0 – 6 ukiulinnut inini 6-ini agguataaqqasuni inissaqarpoq. Meeqqerivik Tasiilamiippoq aamma 22-nik sulisoqarluni, aqutsisoq ilanngullugu. 

Ammarsarfiit: Ataasinngornermiit tallimanngornermut nal: 7:00 – 17:00.

Inunnut pitsaasumik attaveqarneq aqqutigalugu meeqqat ulluinnarni ataqatigiissunik toqqissisimanartunillu misigisaqarnissaat uagutsinnut pingaaruteqarpoq. Taamaattumik suliffiup anguniagaanut sinaakkutissanik aqutsisutut pilersitseqataassasutit taakkununngalu tapersersuissasutit naatsorsuutigaarput.

Paaqqinnittarfitsinni immikkut ilisarnaativut naleqartitavullu ukuupput:

∙Angajoqqaanut ammasuuneq

∙Meeqqanut alapernaassuseqarneq

∙Ulluunerani paaqqinnittarfimmi meeqqap ineriartorneranut toqqissisimanartunik avatangiiseqarneq

Meeqqat alapernaatsut, tatitussusillit, peqqissut nuannaartullu pilersinnissaat Meeqqanut Atuarfeqarnermullu Ingerlatsiviup anguniagaraa. Anguniakkat anguneqarnissaannut illit aqutsisutut ukkataqarnissat naatsorsuutigineqarpoq.

Qinnuteqarninni apeqqutit tulliusut ilinnut akeqquagut:

∙Perorsaanermi suleriaatsit suut ilinnut pingaaruteqarpat?

∙Taakku perorsaanermi suleriaatsit qanoq ilillutit ingerlateqqikkusuppigit ukununnga:

∙Sulisunut – ilinniarsimasunut aamma ilinniarsimanngitsunut

∙Angajoqqaanut

Aqutsisumit nutaamit naatsorsuutigaarput/kissaatigaarput:

∙Perorsaasutut ilinniagaqarsimassaatit aamma aqutsinermik misilittagaqarlutit, ulluunerani paaqqinnittarfinniusinnaasumik

∙Politikkikkut iliuusissat anguniakkallu aallaavigalugit sulisinnaaneq

∙Paasiuminartuuneq aamma ersarissuuneq, peqatigitillugu perorsaanermi aqutsinermik, suleqatigiinni suleqatigiinnermik, sulisunillu suliatigut ineriartortitsinermik pingaartitsineq.

∙Tusarnaarsinnaaneq akuersaartuunerlu

∙Suleqatiginnilluarsinnaaneq tamakkiisumillu isiginnittuarsinnaaneq

∙Meeqqerivinni allani aqutsisunik perorsaanikkut siunersiuisinnaaneq kiisalu suleqateqarsinnaaneq

∙IT/qarasaasiamut piginnaasaqarneq

∙Allaffissornikkut aningaasaqarnikkullu aqutsisutut suliaqarsinnaasoq

∙Aqutsisutut tullersortimik ulluinnarni qanimut suleqateqarsinnaaneq

∙Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.

Neqeroorutigaavut:

∙Suliffeqarfik kajumissusilinnik tunniusimasunillu sulisulik.

∙Atorfik soqutiginartoq, akisussaaffeqarnissamik allannguutinullu piareersimanissamik piumasaqaatitalik.

∙Perorsaanikkut sulisunik aqutsinissamut periarfissaq saniatigullu peqatigitillugulu inini ataasiakkaani toqqaannartumik meeqqanik suliaqarneq.

∙Suliffimmi avatangiisit pitsaasut, quianarsinnaasunut illarnermullu inissaqartitsisut.

Meeqqanut Atuarfeqarfimmullu Ingerlatsivik ulluunerani neqeroorutinut aqutsisoqatigiinnullu naleqqussarsimasunik ingerlaavartumik pikkorissaanernik neqerooruteqartarpoq.

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Atorfiniffissamut angalanissaq:

Atorfinitsinneqarnermilu, atorfeqarfissamut angalatinneqarnermut atasumik, pequtinik atorfeqarfissamut nutserinermi, atorfinittoq akiliunneqassaaq. Aammalu atorfimmiit tunuarnermi, angalanissamut/nutsernissamut akiliunneqarneq aatsaat pisinnaavoq, ukiuni pingasuni imaluunniit amerlanerusuni atorfeqareersimanerup kingorna.

Inissaq:Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfineqqarnermi sulisutut ataavartumik initaarnissamut innersuussisoqarsinnaanngippat, sulisumut utaqqiisaasumik ineqartinneqarsinnaasoq inimik vakantboligmik neqeroorfigineqarsinnaavoq, siuliani taaneqartoq naapertorlugu ineqarnermut, atuinermut il akiliuteqartoqartassaaq. Ineqarnermut atuinermullu akiliutigineqartartut pillugit annertunerusumik paasisaqarusukkuit www.iserit.gl qimerloorneqarsinnaavoq.

Sulilernissamut piffissaliussaq sulisutut ataavartumik initaarnissamut neqeroortoqarnissaa qaqugukkut pissanersoq apeqqutaajumaarpoq. Inatsisit atuuttut tunngavigalugit sulilernissamut atatillugu angalasoqassappat angalaneq akilerneqassaaq aammalu pisattat tikinnissaannut akiliunneqartussaalluni.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Fagchef Marianne Schmidt Lund, oqarasuaat +299 36 73 09 imaluunniit e-mail: mslu@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 262-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: apriilip 7.-at, 2025

Atorfik una qinnuteqarfigiuk