Ilinniartoq saniatigut ikiorti

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Pinngortitamut Immikkoortortaqarfimmi ilisimasassarsiorluni angalanernut suliassaqarfimmi ilinniarnermik saniatigut ikiorti

Ulloq atorfiniffissaq: Isumaqatigiissuteqarnikkut piaarnerpaamik.

Ammasuuit aammalu suleqaterpassuarnut attaveqartarneq nuannaraajuk? Aamma Kalaallit Nunaanni ilisimasassarsiorluni angalanissanut qinnuteqaatit akuersissutillu ingerlanneqarnerini suliaqarnissamut kajumissuseqarpit?

Suliassatit

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Pinngortitamut Immikkoortortaqarfimmi suleqataassaatit. Suliassaqarfimmi sulisoq akisussaasuusoq suleqatigalugu angalanernut nalunaarut, Kalaallit Nunaanni ilisimasassarsiorluni angalanissanut qinnuteqaatinut akuersissutinullu sinaakkusiisoq malillugu ingerlatsinermut tunngasut suliarissavatit. Taanna sullississutaavoq pingaarutilik qitiusumillu ataqatigiissaariffiusoq, Kalaallit Nunaanni ilisimasassarsiorluni, timersorluni takornariarlunilu angalanerit pisinnaanissaannut periarfissiinissamut pingaarutilik.

Suliassatit pingaarnerit tassaassapput:

• Kalaallit Nunaanni ilisimasassarsiorluni, timersorluni takornariarlunilu angalanissanut qinnuteqaatinik akuersissutinillu suliaqarneq.

• Namminersorlutik Oqartussat Qitiusumik Allaffeqarfiani suleqatinut ataqatigiissaarineq.

• Soqutigisalinnik avataaneersunik, soorlu kommuninik, Kalaallit Nunaanni Politiinik, Issittumi Sakkutooqarfimmik, Nunatta Katersugaasivianik, Radionik Aqutsivimmik aamma Visit Greenlandimik suleqateqarneq.

• Ilisimasassarsiorluni angalanerit pillugit nittartakkamik aamma ilisimasassarsiorluni angalanerit pillugit paasissutissanik nutarterinermik aqutsinermi suliassanillu ingerlatsinermi ikiortaaneq. Ilaatigut ukiuni makkunani Sermersuup soqutigineqarnerujussuanut iluaqusiinissaq annertunerujartortumik siunertarineqarpoq.

Ilisimasassarsiorluni angalanerit pillugit suliavit saniatigut suliassanik ataasiakkaanik takkuttoqartarsinnaassaaq, politikkikkut oqallisigineqartut suliatigullu piginnaaneqarfitit apeqqutaatitsiviusunik takkuttoqartarsinnaassalluni.

Pinngortitamut Immikkoortortaqarfimmi isumagissaartuuvugut, quiasaartuuvugut aammalu suliat assigiinngitsorpassuit tunniusimaffigisorujussuusarlugit. Taamaattumik akunnitsinni ilinniagaqaqatigiittuaannarpugut – aamma tamatigut ilinniartitserusuttarpugut misilittagaqarlualernissarnullu tapertaarusulluta.

Piginnaaneqarfiit

Attaveqarnernik pitsaasunik pilersitsisarputit, unammilligassaqarlutit kajumilertarputit pisussaaffinnik naammassinnittarputit ilumoorussisuullutillu. Namminersorsinnaavutit, eqaatsumik aaqqiisinnaavutit aammalu immikkoortortaqarfimmi suleqatitut patajaatsuuvutit. Ilisimasassarsiorluni angalanerit pillugit suliaqarfimmi piffissamut killiliussat sukannersuusarput taamaattumilu suliannik paasisimaarinnilluarnissat pingaaruteqarpoq.

Siulliuniarsinnaanissat aammalu suliannik naammassinnissinnaanermik ataqqinaatitut misigisinnaanissat pingaaruteqarpoq – pingaartumillu suliavit killiffiinik nalunaaruteqarnissat aammalu ikiortariaqaruit ikiortissarsiornissat pikkoriffigissavatit. Ilisimasassarsiorlutik angalanissamut qinnuteqartunut, kiisalu suliffeqarfiup iluani avataanilu suleqatinut attaveqartarnissaq suliassavit pingaarutillit ilagaat. Piffissangaatsiaq oqarasuaatikkut oqaluussinernut atortassavat, tassani ilisimasassarsiorluni angalanissamut qinnuteqartut ilitsersortassallugit. Taamaattumik ilakkuminartuunissat, peqqissaartuunissat, ikiuukkumatussuseqarnissat aammalu pingaartumik tuluttut attaveqaqateqarnissamut pikkorissuunissat pingaaruteqarpoq.

Tamatuma saniatigut naatsorsuutigaarput:

• ilinniakkamik attuumassutilimmik ingerlariaqqiffiusumik ingerlatsissasutit

• oqaatsitigut piginnaaneqarluassasutit – ajornanngippat kalaallisut, danskisut tuluttullu oqaatsit piginnaaneqarfiginissaat piumasaqaataavoq

• namminersorlutit sulisinnaassasutit nammineerlutillu suliniuteqarsinnaassasutit

• suliassanik aaqqiinissamut akisussaaffimmik misigisimaninnik sakkortuumik takutitsisinnaassasutit

• aaqqissuussamik sulisassasutit aammalu killiliussat malinnissaannut qulakkeerinissamut piginnaaneqarluassasutit

• isumalluartuussasutit isumagissaartuussasutillu

• inuit assigiinngitsorpassuit assigiinngitsunillu suliallit suleqatigisinnaassagitit

Kikkuuvugut?

Naalakkersuisoqarfimmi sulisut 45-t missaanniipput, immikkoortortaqarfinnut sisamanut agguarsimasut (Imminut pilersornermut, Aningaasaqarnermut Sulisoqarnermullu Immikkoortortaqarfik, Pinngortitamut Immikkoortortaqarfik, Avatangiisinut Upalungaarsimanermullu Immikkoortortaqarfik aamma Nunalerinermut, Nukissiutinut Silallu Pissusianut Immikkoortortaqarfik), kiisalu aamma Aatsitassaqarnermi Avatangiisinut Immikkoortortaqarfik. Pinngortitaleriffik (Grønlands Naturinstitut), Asiaq, Nukissiorfiit aamma KNI Naalakkersuisoqarfimmut immikkoortortaqarfiupput.

Suliffeqarfimmi nuannersunik suleqateqarfiusumi, pingaartorsiorfiunngitsunik pissuseqarfiusumi aammalu toqqissisimanissamik ineriartortitsinissamillu pingaartitsiviusumi suleqataalissaatit.

Amerlanerusunik paasisaqarusuppit?

Atorfik pillugu paasissutissanik amerlanerusunik immikkoortortaqarfimmi pisortaq Mettelise Fritz Hansen, tlf. +299 34 52 57-imut, e-mail: mtha@nanoq.gl saaffigalugu pissarsisoqarsinnaavoq.

Nalunaaquttap akunneri

Sapaatit akunnerannut agguaqatigiissillugu nalunaaquttap akunnerini 20-ni sulisassaatit. Ilinnianngiffeqarninni nalunaaquttap akunnerisa amerlanerunissaat pisariaqartinneqarsinnaavoq.

Qinnuteqarnissamut killigititaq: 3. aprili.

Atorfinitsitsinissamut oqaloqateqarnerit atorfinitsitsinerillu ingerlaavartumik pisinnaapput.

Naalakkersuisut pillugit

Unammilligassanik ujartuiguit aammalu sulinikkut ulluinnarnut sunniuteqarnissat siunissamillu ilusilersuinissat kajumiffigigukku Namminersorlutik Oqartussani atorfininnissat ilinnut tulluuppoq.

Annertuumik akisussaassuseqarnissat aammalu suliatigut piginnaaneqarnissamik pingaartitsinissat, pisunik misissueqqissaartuunissat, kiisalu sulisut akornanni allannguisoqarnissaanut piareersimalluartuunissat naatsorsuutigaarput. Tamatuma saniatigut ulluinnaat ilusilersornissaannut piginnaaneqarnissat sulianillu paasisimaarinnittuunissat pingaartipparput.

Namminersorlutik Oqartussat Qitiusumik Allaffissuaqarpoq, 650-it sinnerlugit, naalakkersuisoqarfinnut assigiinngitsunut agguarsimasunik sulisulimmik, kiisalu avataani immikkoortortat arlalippassuupput. Sulisut 2500-t sinnerlugit amerlassuseqartunut Namminersorlutik Oqartussanut attuumassuteqarpugut. Qitiusumik Allaffissuup Naalakkersuisut politikkikkut aalajangiinissamut tunngavissaqarluarnissaannik, kiisalu politikkikkut aalajangiinerit piviusunngortinneqarnissaannik qulakkeerinissaq suliassaraa.

Namminersorlutik Oqartussat pillugit annertunerusumik atugaqarsinnaavutit, uani: https://naalakkersuisut.gl/da?sc_lang=kl-GL

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk