Visit Greenland Project Managerissarsiorpoq
Kalaallit Nunaata piujuartitsiffiusumik takornarianut ornitassatut ineriartortinnissaanut peqataarusuppit aammalu suliniutinik aqutsinermik, soqutigisaqaqatigiinnik aqutsinermik attaveqarnikkullu piginnaasaqarluartuuit? Taava imaassinnaavoq illit tassaasutit ujagarput!
Nunap immikkoortuini ornitassanut pilerisaarinermik ingerlatseqatigiiffiit aammalu najukkami takornarialerisut takornariaqarnerup ineriartortinnissaa, takornariarfiusut ataasiakkaat aammalu nunarput tamakkerlugu isigalugu nukittorsarnissa siunertaralugu Visit Greenlandimiit qanimut suleqatigisarpagut. Nunaqavissunik suleqateqarneq piginnittoqarnerlu toqqammavigalugit piujuartitsinikkut ineriartortitsinissaq - aningaasaqarnikkut, inunnik isumaginninnikkut avatangiisitigullu ukkataraarput.
Kalaallit Nunaat ornitassatut soqutigineqarnera annertusiartupiloorpoq, nunallu tamalaat akornanni aammalu mittarfissuit timmisartuussinissallu nutaat periarfissanik annertuunik aamma periarfissiilluarput. Kalaallit Nunaatsinni takornariaqarfittut nukittuffigut immikkuullarissut ersersinniarlugit, akisussaassuseqartumik ineriartortinnissai Visit Greenlandimi siuartaralugit sulissutigisarparput.
Ineriartortitsinerup tamassuma eqinnaatsumik siuarsaaqataaffiginissaanut piumassuseqarpit? Kalaallit Nunaanni takornariaqarnikkut siunissaani ineriartortitseqataanissannut kajumissuseqaruit aammalu piginnaasaqarfigigukkit, taava illioriaannaavoq Destination Development & Cruisemi suleqatissatut ujagarput!
Suliffik pillugu
Suliniutinut aqutsisutut suleqatigiit ilannguffigisassatit tassaapput, takornariarfiusunik ineriartortitsinermik aammalu umiarsuit takornariartaatit tikittartut eqqarsaatigalugit tunaartaqartumik anguniagaqarlutik, aammalu ataqatigiissaakkamik suliniuteqartarnermik qulakkeerinninniartartut. Najukkami ineriartortitassanut piukkunnaateqartunut alapernaatsuussaatit, aammalu najukkami soqutigisaqaqatigiit qanimut suleqatigalugit najukkami aaqqiissutaasinnaasunik nassaarsiullaqqissuussallutit.
Suliassat tamalaajunissai naatsorsuutigisinnaavatit, ingerlatsinikkullu unammillernartuusinnaasut suliarinissaai soqutigilluarnissai, aammattaaq periusissiaq pingaarneq malillugu sulisinnaanissat pingaaruteqarpoq.
Project Manageritut pingaarnertut suliassatit tassaapput:
● Akisussaassuseq pitsaassuserlu pingaarnertut ukkataralugit, nuna tamakkerlugu takornariarfiusunik interiartortitsinissaa suleqataaffiginissaa.
● Ineriartortitsinissamut malitassanik ineriartortitsinermi, atuutilersitsinermi nalilersuinermilu pingaarnertut ingerlatseqataaneq.
● Nunaqarfinni isorliunerusunilu takornariaqarnikkut ineriartortitsinermik siuarsaasussanik suliniutinik ingerlatseqataanissaq.
● Nunap immikkoortuini takornariaqarnikkut suliniaqatigiit najukkamilu takornarialerisut akornanni suleqatigiinnermik nukittorsaaqataanissaq
● Nunatsinni nunallu tamalaat akornanni attaveqaqatigiinnernut uummaarissumik peqataasarnissaq.
● Isumasioqatigiisitsinissat, aalajangersimasumik sammisaqartitsinissat, ataatsimeersuartitsinissat webinarertitsinissallu pilersaarusiortarnissai ingerlattarnissaanillu suliaqarneq
● Pitsaassutsinut uuttuutitut nalunaarsuutinik katersisarnissaq soqutigisaqaqatigiinnullu naleqquttunut ingerlatitseqqiisarnissaq.
Atorfik una suliniutinut aqutsinikkut piginnaasaqarluarnermik, periusissiortutut eqqarsarsinnaanermik aammalu suliniutinik aallaqqaataaniik akisussaassuseqartumik naammassinnaasumik piumasaqaateqarpoq. Sulinermut atatillugu, pingaartumillu Kalaallit Nunaatsinni angalasarnissaq atorfimmut ilaavoq.
Illit pillutit
Tunaartaqarluni anguniagaqartartutut suleqateqallaqqissuuvutit, allanillu suleqateqarlutit unammillernartut pitsaasumik aaqqiisinnaassuteqarfigalugit, tamannalu ilutigalugu namminersullaqqissuuvutit, suliassatit tamakkiisumik akisussaasseqarfigisarlugit pitsaanerpaamillu naammassisaqarnissat kajumissuseqarfigiuaannartuullugu. Suliffimmi piviusunik uuttorneqarsinnaasunillu anguniagaqartuuvutit, eqeersimaartuullutit aammalu sungiussiasuullutit, immikkuualuttunullu tappiffilik. Kalaallisut, qallunaatut tuluttullu oqallorissuullutillu allallaqqissuussaatit.
Aammattaaq naatsorsuutigaarput:
● Ammasuusutit, alapernaatsuullutit atassuteqaqatissarsiullaqqissuusutillu.
● Assigiinngitsunik ataatsikkut suliaqarsinnaasutit.
● Nikerartumik sulinissamut naleqqussallaqqissuusutit, piffissallu ilaani tamaviaarnarnerusumik sulisinnaasutit.
● Suleqatigiiaat akimorlugit suleqateqarsinnaanermik iluarisimaarinnittuusutit.
● Inuiaqatigiit kalaallit, kalaallillu piorsarsimassusaat pillugu ilisimasaqarluartuusutit.
● Allattariarsornikkut attaveqarsinnaalluartuusutit.
● Pitsaassuseq anguniakkallu tunaartaralugit suliniutinik pilersaarusiorsinnaasoq naammassinnissinnaasorlu.
Qinnuteqarneq
2025-ip aallartinnerani atorfinittussamik Project Managerissarsiorpugut. Malugiuk qinnuteqaatit ataavartumik suliarineqartassammata. Atorfinittussarli eqqortoq utaqqeqqaarusupparput. Qinnuteqaatit uunga nassiguk Head of Destination Development & Cruise, Linda Kleist linda@visitgreenland.com
Atorfimmi piumasaqaataasut atorfinittussamullu tulluarsaanerit naapertorlugit, akissarsiassat, atorfinitsitsinikkullu atugassarititaasut isumaqatigiissutigineqassapput.
Atorfik sapaatip akunneranut akunnerni 40-runi, pissutsillu apeqqutaatillugit ilaatigut akunnerni amerlanerusuni suliffiuvoq, Nuummi inissisimasoq.
Atorfimmut atatillugu inissaqartitsoqanngilaq.
Attaveqaat
Atorfik pillugu apeqqutissaqaruit, taava Head of Destination Development & Cruise, Linda Kleist, uunga attavigiuk linda@visitgreenland.com imaluunniit uunga sianerfigalugu oqar. 53 36 05 attavigisinnaavat.
Visit Greenland pillugu
Visit Greenland tassaavoq Kalaallit Nunaata takornariaqarnikkut siunnersuisoqarfia, tamakkiisumik Namminersorlutik Oqartussanit pigineqartoq. Nunat tamalaat aammalu Kalaallit Nunaanniittut Visit Greenlandip soqutigisaqaqatigiivi suleqatigalugit, aammalu pilerisaarinerit tuniniaavissanillu ineriartortitsinerit aqqutigalugit Visit Greenlandip Kalaallit Nunaat ilisimasassarsiorluni takornariagassatut nittarsaattarpaa.
Suliniaqatigiiffik pillugu paasisaqarnerugit uani.