Visit Greenland Digital Project Managerissarsiorpoq

Kalaallit Nunaata akisussaassuseqartumik takornarissanut ornitassatut ineriartortinnissaanut peqataanissannut piareeqqavit, aamma nalunaarsuutinik misissueqqissaarinermi qarasaasialerinermilu piginnaasaqarluartuuit? Taava imaassinnaavoq illit tassaasutit ujagarput!

Visit Greenlandimi, ornitassat ataasiakkaat aammalu Kalaallit Nunaata ataatsimut nukittorsarneqarnerani, takornariaqarnikkut ineriartornerup siuarsarnissaa sulissutigisaraarput. Ilaatigullu digitaliusumik saqqummiussivigut aqqutigisarlugit. Kalaallit Nunaat angalanikkut ornitassatut nittarsaanniarlugu, digitalikkuttaaq peqataatinneqarnissaa ukkataraarput.

Kalaallit Nunaata ornitassatut soqutigineqarnera annertusiartupiloorpoq, nunallu tamalaat akornanni aammalu mittarfissuit timmisartuussinissallu nutaat periarfissanik annertuunik aamma nassataqartussaapput. Takornariaqarnerup, Kalaallit Nunaata nukittuffia immikkuullarissoq ersersinniarlugu, akisussaassuseqartumik ineriartortinnissaa Visit Greenlandimi siuarsagaraarput.

Ineriartortitsinerup tamassuma eqinnaatsumik siuarsaaqataaffiginissaanut piumassuseqarpit? Kalaallit Nunaata siunissaanut ineriartortitseqataanissannut piginnaasat eqqortut kajumissuseqarnerlu pigigukkit, taava illiorataannaavoq Content & Administraionimi suleqatigiiaani suleqatissatut ujagarput!

Suliffik pillugu

Suliniutinut aqutsisutut suleqatigiit ilannguffigisassatit tassaapput, ataatsimoorluta tunaartaqarluta anguniagaqarnitsigut ataqatigiissakkamillu suliniuteqartarnitsigut digitalikkut peqataatitsinermik qulakkeerinnittussat. Nittartakkap nittartakkanut ujarliutini ujarneqartarnerani pitsanngorsaanermik (SEO-optimering) nittartakkanillu pitsanngorsaanermik misilittagaqarpit? Taava illiorataannaavoq suleqatigiiaat nukittuunngortinnissaannut ujagarput!

Suliassat tamalaajupput, ingerlatsinikkullu unammillernartut suliarinissaat nuannarisarissavat, ilutigitillugulu periusissiaq pingaarneq malillugu sulisinnaassaatit.

Digital Project Manageritut pingaarnertut suliassatit tassaapput:

● SEO-mi najoqqutassanik ineriartortitsillunilu atuutilersitsinissaq, taamaalilluni Kalaallit Nunaat digitalikkut ersarinnerulersinneqassammat sullinniakkagullu anguneqarsinnaalerniassammata.

● Nalunaarsuutinik misissueqqissaarinissaq, kiisalu najoqqutassatut anguniagassat aalajangiiffiginissaat ikorfartorniarlugu nalunaarsuutinik katersinissaq, misissueqqissaarinissaq najoqqutassatullu anguniagassatsinnut ikorfartuutissatut nalunaarsuutinik paasisat nalituutut paasiuminartunngorsarnissaat.

● Nalunaarusiortarnissaq ataavartumillu digitalikkut saqqummiussatsinnut nalilersuillunilu pitsanngorsaasarnissaq.

● Suliffeqarfiup iluani qarasaasiaqarnikkut ikiuunneq kiisalu nittartakkanut oqartussaaffigisanut, softwarinut atuisuuffinnut il.il. allaffissuussineq.

● Ingerlatsiviup suliassaataani suliniutinut akimortumik ingerlassinermut peqataaneq

Illit pillutit

Inuttut ammasuunissat, alapernaatsuunissat attaveqaqateqarniarnikkullu piginnaasaqarluartuunissat naatsorsuutigaarput. Tamatumunnga ilutigitillugu suleqateqallaqqissuuvutit, unammilligassanik allanik suleqateqarlutit pitsaasumik aaqqiisinnaassuseqarlutit, namminersullaqqissuullutit suliassatillu tamakkiisumik akisussaasseqarfigisarlugit, pitsaanerpaamillu naammassisaqarnissat kajumissuseqarfigiuaannartuullugu.

Suliassamut pikkoriffiit ujartukkagut:

● Inernerusunik takussutissanik pingaartitsisoq eqeersimaartorlu: Tunaartaqarlutit eqaatsumik eqeersimaartumillu suliniutinik ingerlatsiniartartoq.

● Misissueqqissaarnikkut piginnaasaqarluartoq: Nalunaarsuutinik

misissueqqissaarinermi suliffeqarfimmillu misissueqqissaarinermi misilittagaqartutit nalunaarsuutillu najoqqutassaliornikkut paasisassanut nalituunut paasiuminartunngortinnissaat piginnaasaqarfigigit.

● SEO-mi immikkut ilisimasalik: Nittartakkat nittartakkanut ujarliutini ujarneqartarneranut pitsanngorsaanermut tunngaviinik (SEO-principper) periutsinillu ilisimasaqartutit, digitalikkut ersarissutsitsinnut inernerusunillu aalajangersimasunut pilersitsiniarnitsinnut nukittorsaataasussamik.

● Qarasaasiaqarnikkut ikiuunnermik misilittagalik: Helpdeskeqarnikkut suliassanut patajaatsumik misilittagaqartutit, suliamut pikkorissuseqarlutit sukkasuumik teknikkimut unamminartumik sukkasuumik aaqqiisinnaassuseqartutit.

● Softwarenik ineriartortitsinermik ilisimasaqarluartoq: Programmeriinermi aammalu ineriartortitsinikkut atortorissaarutinik assigiinngitsunik atuisinermi misilittagalik, pisariaqartitsisoqartillugulu teknikkikkut ilisimasalittut ikiuussinnaasoq.

● Suleqateqarsinnaasoq: Suleqatigiiaat akimorlugit suleqateqarsinnaanermik iluarisimaarinnittoq, ataatsimoorluni pitsaanerpaanik aaqqiissusiornissamut peqataarusuttoq.

Pitsaassaaq kalaallisut, qallunaatut tuluttullu oqalussinnaallutillu allassinnaaguit.

Qinnuteqarneq

2025-ip aallartinnerani atorfinittussamik Digital Project Managerissarsiortoqarpoq. Atorfinittussarli eqqortoq utaqqeqqaarusupparput. Malugiuk qinnuteqaatit ataavartumik suliarineqartassammata. Head of Content & Administrationimut helene@visitgreenland.com-mut, ajornanngippat piaartumik qinnuteqaatit nassiuguk. 

Atorfimmi piumasaqaataasut atorfinittussamullu tulluarsaanerit naapertorlugit, akissaateqartitsinikkut atorfinitsitsinikkullu atugassarititaasut isumaqatigiissutigineqassapput.

Atorfik sapaatip akunneranut akunnerni 40-runi, pissutsillu apeqqutaatillugit ilaatigut akunnerni amerlanerusuni suliffiuvoq, Nuummi inissisimasoq.

Atorfimmut atatillugu inissaqartitsoqanngilaq.

Attaveqaat

Atorfik pillugu apeqqutissaqaruit, taava Head of Content & Administration, Helene Lyberth Steffensen uunga allaffigalugu helene@visitgreenland.com imaluunniit uunga sianerfigalugu oqar. 53 36 10 attavigisinnaavat.

Visit Greenland pillugu

Visit Greenland tassaavoq Kalaallit Nunaata takornariaqarnikkut siunnersuisoqarfia, tamakkiisumik Namminersorlutik Oqartussanit pigineqartoq. Nunat tamalaat aammalu Kalaallit Nunaanniittut Visit Greenlandip soqutigisaqaqatigiivi suleqatigalugit, aammalu pilerisaarinerit tuniniaavissanillu ineriartortitsinerit aqqutigalugit Visit Greenlandip Kalaallit Nunaat, ornitassatut nuna nunallu isikkua pillugu ilisimasassarsiorluni takornariagassatut, nittarsaattarpaa.

Suliniaqatigiiffik pillugu paasisaqarnerugit uani.