Versionistimik Qanoruumut

KNR-ip nutaarsiassaqartitsivia Qanoruumut nutserisumik pikkorissumik decembarip aallaqqaataani, isumaqatigiissuteqarnikkulluunniit, atorfinittussamik pissarsiorpoq. Nuummi najugaqarnissaq piumasaqaataanngilaq.

Sammisanik inuiaqatigiinnut tunngasunik saqqummiussisarneq nuannariviuk? Aamma kingusissukkut suliartortarnissat orniginartippiuk? Suliffeqarfimmilu ingerlaavartunik piffissaliussaqartitsisumi sulineq sungiusimaviuk? Taava nutserisutut atorfik soqutiginartoq ilinnut neqeroorutigisinnaavarput.

Qanorooq pikkorissumik nutserisussarsiorpoq, nutserisumik allamik suleqateqarluni Qanorooq nal. 19.00 aallakaatinneqartartoq kalaallisuumit qallunaatuunngortittassallugu, aammalu nal. 22.00 aallakaateqqinneqannginnerani qallunaatut ataatigut allagartalersortassallugu. Tamatuma saniatigut aallakaatitassiaq Kalaallit Nunaannit Nutaarsiassat sapaatit akunnerata naanerani aallakaatinneqartartoq qallunaatut ataatigut allagartalersorneqartassaaq.

Piffissat suliffiusut tassaapput nal. 12.00-imit 19.00-imut, aammalu 13.30-mit 20.30-mut.

Qanorooq pillugu:

Qanorooq nutaarsiassaqartitsiviup ataaniippoq, tassanilu aaqqissuisoqarfiit pingasuupput, tassaallutik radioaviisip, webip soorunalumi aamma Qanoruup aaqqissuisoqarfia.

Qanorooq ulluinnarni tamani nal. 19.00 aallakaatinneqartarpoq nal. 22.00-ilu aallakaateqqinneqartarluni. Qanorooq maannakkorpiaq toqqaannartumik aallakaatinneqarneq ajorpoq. Qanoruulli toqqaannartumik aallakaateqqittalernissaa pilersaarutaavoq. Taamaattumillu piffissat suliffiusut allanngornissaat naatsorsuutigineqassaaq.

Qanoruup aaqqissuisoqarfiani sulisut tamarmiutillutik tassaasarput aaqqissuisut marluk, aaqqissuisumut allatsi, tusagassiortut arfinillit kiisalu nutserisut marluk.

Suliassatit pingaarnerit tassaapput:

- Nutaarsiassatigut ilanngutassianik, toqqaannartunik, assiliartalersukkanik, telegramminik, nutaarsiassanik naatsunik, VO-nik silamillu ilimasaarutinik nutserineq, pingaartumik kalaallisuumit qallunaatuumut, aammali qallunaatuumit kalaallisuumut aammalu tuluttuumit kalaallisuumut qallunaatuumullu. Qanoruumik ataatigut allagartalersuineq.

- Nutaarsiassaqartitsivimmi sulisunik allanik oqaatsitigut ikiuisarneq

- Piffissaqarfigitillugu, knr.gl-imi Radioaviisimiluunniit nutserinermik ikiuisarneq

((Nutserisutut suleqatigisatit suliassanik pingaarnersiuineq pillugu qanittumik attaveqarfigisassavat, tamatumalu saniatigut aaqqissuisunit suliakkiissuteqartarsinnaavoq.))

Nutserisup Nuummi najugaqarnissaa piumasaqaatigineqanngilaq. Nutserisoq taamaalilluni tunngaviatigut nunarsuarmi sumilluunniit inissisimalluni sulisinnaavoq, suliassat piffissaliussap iluani naammassineqarnissaat aqqutaatillugu.

Naatsorsuutigaarput:

- Oqalutsitut/nutserisutut, tusagassiortutut assingusumilluunniit ilinniagaqarnissat

- Allaaserinninnermik allaatigisanillu nutserinermik misilittagaqarnissat

- Aaqqissuulluagaasumik suleriaaseqarnissat, oqaasilerillaqqissuunissat, oqallorissuunissat, sullerissuunissat piffissaliussallu iluanni sulinissat sungiusimassagit

Decembarip aallaqqaataani 2024-mi isumaqatigiissuteqarnikkulluunniit atorfinitsitsisoqassaaq.

Akissarsiatigut atorfeqartitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Ineqarneq

Atorfimmut matumunnga inissiamik innersuussisoqanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Atorfik pillugu paasissutissat sukumiinerusut aaqqissuisumut Pipaluk Høeghimut +299 36 45 79, pif@knr.gl. imaluunniit nutaarsiassaqartitsivimmi pisortaagallartumut Bibi Nathansenimut +299 36 45 58, bna@knr.gl saaffiginnilluni pissarsiarineqarsinnaapput.

Qinnuteqaammut ilanngunneqassapput CV aamma ilinniarsimanermut allagartat aammalu siornatigut suliffigisimasanut takussutissat.