UNESCO Kujataa-ni nakkutilliisoq

Nunarsuup ilaani UNESCO-p Nunarsuarmi eriagisassatut nalunaarsugaasa ilaanni nakkutilliisoorusuppit? Innovation South Greenland Site managerimik - UNESCO Kujataani – nakkutilliisussamik pissarsiorpoq.

Kujataa pillugu

UNESCO Kujataa, nunap ilaa, qangaaniilli qallunaatsiaat kalaallillu nunaateqarfigisaraat, nunarsuarmi imaannaanngitsunik silaannaap qanoq issusii aallaavigalugit atugassaqarfiusumi. Nunaminertaq tamanna 2017-mi UNESCO-p nunanik eriagisassanik allassimaffiutaanut ilanngunneqarpoq, assigiinngitsunillu tallimanik immikkoortortaqarluni, Illukoqarfiit, ullumikkut nunaateqarfiusut nunalu piorsarsimassutsikkut oqaluttuarisaanermullu immikkut oqaluttuassartaqarfiusut.

UNESCO-Kujataa Innovation South Greenlandimiit aqunneqarpoq, aqutsisoqatigiit Kommune Kujalleq, Naalakkersuisut, Nunatta Katersugaasivia savaatillillu peqatigiiffiat suleqatigalugit.

Atorfik pillugu

UNESCO Kujataata ulluinnarni nakkutigineqarnera Site Manageritut akisussaaffigissavat. Nunaminertap eriagisassatut nalunaarsugaasup piujuartussatut qulakkeerneqarnissaa akissussaaffigissavat, paasisitsiniutigalugu, nunaminertamilu pineqartumi najugaqartut peqatigalugit, ingerlatsinermullu akisussaasut Pisortallu suleqatigalugit tamanna akisussaaffigisassarissavat.

Suliassatit makkuussapput:

- Nakkutilliisoqarfiup pilersaarutaanik piviusunngortitsinissaq – UNESCO Kujataata piujuarnissaata qulakkeernissaa aammalu aalajangersagaareersut malillugit sulianik ineriartortitsiuarnissaq.

- Aningaasaliissutinik allaffissornikkullu aqutsineq – aningaasaliissutit aqunneqarneri, aningaasaliisussarsiortarneq aningaasaliissutinillu aqutsineq, aningaasaliisutillu aqunneqarneri.

- Ataqatigiissaarineq suleqateqarnerlu – ISG-p iluani ataqatigiissaarineq, kommunemut, Namminersornerullutik Oqartussanut, ilisimatusartunut, Takornarialerisunut kiisalu Savaatilinnut attaveqaataaneq.

- Paasisitsiniaaneq saqqumilaarnerlu – attaveqarfigisanik annertusaaneq, ilisimasanik siammarterineq kiisalu takornariaqarnermut tunngasortaanik ilisimatitsineq.

- Nakkutiginninneq ingerlatsinerlu – nunaminertap nakkutigineqarnera tamatumunngalu atasumik malitassat eqqortumik malinneqarnissaannik qulakkeerinninneq.

- Unesco-p Qullersaqarfianut nalunaarusiortarneq - ukiut arfinilikkaarlugit nalunaarusiortarneq.

Atorfimmut pineqartumut piumasaqaatit:

- Piorsarsimassutsimut, nakkutiginninnermut, takornarialerinermut nunaminertanillu nakkutiginninnermut tamatumunngaluunniit assingusumik ilinniagaqarsimaneq.

- Allaffissornermut misilittagaqarneq, pilersaarutinik aqutsineq kiisalu aningaatigut aqutsisinnaanermik piginnaaneqarneq.

- Suleqateqarluarsinnaaneq kiisalu attaveqallaqqissuuneq.

- UNESCO-p nunaminertanik eriaginninnermut piumasaqaataanik ilisimasaqarneq, piorsarsimassutsimut immikkut ilisimasaqarneq iluaqutaassaaq.

- Sulianut sunulluunniit nammineersinnaassuseqarneq, ulluinnarnilu sulinermi aalajangiisinnaassuseqarneq.

- Kalaallisut, qallunaatut tuluttullu oqalussinnaaneq allassinnaanerlu.

Neqeroorutigaagut:

- Piginnaasat misilittakkallu naapertorlugit akissarsiat

- UNESCO-mut tunngasunik suliaqarneq nakkutiginninnerlu

- Suliamut tunngasunik tamatigoortuuneq sunniuteqaqataanerlu

- Najukkami innuttaasunik, Naalagaaffimmi innuttaasunik nunarsuarmioqatinillu suleqateqarluarsinnaaneq

- Kujataani ineriartortitsinerup qulakkeerneqarnissaanut periarfisseeqataaneq

Inissaqartitaaneq

Atorfinitsinneqanermut atatillugu inissaqartitsisoqarsinnaavoq, malittarisassat atuuttut najoqqutaralugit ineqarnermut akiliutit allallu akilerneqartartussamik.

Qinnuteqaat

Qinnuteqaatit, ilinnut tunngasunik takussutissartalik uunga nassiuguk; mj@isg.gl, kingusinner-paamik 1. marts 2025. Apeqqutissaqaruit uunga saaffiginninnissannut tikilluaqqusaavutit mj@isg.gl / +299 64 71 31