Ujarassiornermut Immikkoortortaqarfik immikkoortortaqarfimmut pisortassarsiorneqarpoq
Aatsitassanut suliassaqarfimmi paasisimasaqarpit aammalu immikkoortortaqarfimmi nunani tamalaani sunnersimaneqartumi siuttuunissaq piumassuseqarfigalugu? Peqatigisaanik sulisunik kajumissuseqalersitsisumik aammalu ineriartorneq atugarissaarnerlu qulakkeerlugit, sulisoqarnermi aqutsineq pikkoriffigaajuk? Taava Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmi ujarassiornermut immikkoortortaqarfimmut pisortatut atorfik immaqa ilinnoortuuvoq.
Atorfimmut nassuiaat
Ujarassiornermut Immikkoortortaqarfimmi immikkoortortaqarfimmut pisortatut eqeersimaartumik aatsitassanut suliassaqarfimmi ineriartortitseqataassaatit. Immikkoortortaqarfimmi periusissatut ilisimatusarnermi aqutsinissaq akisussaaffigissavat, aammalu Namminersorlutik Oqartussani ujarassiornermi ilisimatuussutsikkut suleqatigiinneq sammivilissavat. Misissuinerit aatsitassarsiorluni suliffissuarnut attuumassuteqartut ataqatigiissaassavatit, aammalu suliffiup iluani avataanilu ilisimatusarnermi suliniutini, assersuutigalugu nunap assiliornermi, suleqatigiinnissamut isumaqatigiissutinik suliaqassallutit.
Naalakkersuisoqarfimmut pisortaanerup ataaniillutit Ujarassiornermut Immikkoortortaqarfimmut pingaarnertigut missingersuusiorneq aqutsinerlu akisussaaffigissavatit, aammalu immikkoortortaqarfiup allaffissornikkut aqutsinera isumagisarissallugu. Immikkoortortaqarfimmi sulisunut suliassatigut isumasioqataasassaatit, aammalu Naalakkersuisoqarfimmi immikkoortortaqarfiit akimorlugit pitsaasumik taperseeqataassallutit.
Suliassat:
- Ulluinnarni sulisunik aqutsineq.
- Immikkoortortaqarfiup akisussaaffeqarfiinut tunngatillugu Naalakkersuisup, naalakkersuisoqarfimmi pisortaanerup allallu immikkoortortat siunnersorneqartarnerat.
- Missingersuutinik ukiumoortumillu pilersaarutinik suliaqarneq.
- Qulequttat geofysiskininut, geologiskinut aatsitassarsiorlunilu misissuinermut tunngasut pillugit apeqquteqaatinut akissuteqaatinik ataqatigiissaarineq.
- Ujarassiornermi ilisimatuussutsikkut ilisimatusarluni suliniutinik ataqatigiissaarineq.
- Paasissutissanik nalunaarsukkanik nalunaarutiginnittarnermut, uninngasuutiginninnermut, paasissutissiisarnermut pitsaassusaannillu qulakkeerisarnermut suleriaasissanik qulakkeerineq
- Politikkikkut isummernissamut tunngavissianik, allakkianik, ujarassiornermut nalunaarusianik il.il. pitsaassutsitigut qulakkeerineq ataqatigiissaarinerlu.
- Avataaneersunut suleqatigisartakkanut ataqatigiissaarineq isumaqatigiissuteqartarnerillu
Aatsitassanik peqarfinnut, CCS-inut, Qaqqat sisoornerinut, qarasaasiatigut paasissutissaasivinnut, paasissutissiisarnermut politikerinillu sullissinermut tunngatillugu suliassat ataqatigiissaartassavatit, aammalu periusissianut akuerineqareersunut tunngatillugu ilisimatusarfissat nassuiartassavatit. Aamma Kalaallit Nunaata aatsitassaqarsinnaaneranik nittarsaasseqataassaatit aammalu suleqatigiissitaliani assigiinngitsuni peqataassaatit. Kalaallit Nunanni aammalu Kalaallit Nunaata avataani angalasarnissat naatsorsuutigisariaqarpat.
Ilisarnaatit
Naleqquttumik ilinniagartuutut ilinniagaqarsimavutit, aqutsinermullu tunngasut misilittagaqarfigalugit. Illit
- minnerpaamik pinngortitalerinermi ilinniagartuutut allagartaqarputit
- allaffissornikkut aqutsinermik misilittagaqarputit
- ineriartortitsisartumik misigittartumillu aqutseriaaseqarputit, suleqatigiinnermillu pingaartitsillutit
- ineriartortitsinissaq suliniutillu eqqarsaatigalugit suliassanik aaqqissuussisarnermik annertuumik misilittagaqarputit
- suliassanik suliarinninnissamut piffissamullu killigititanik naammassinninnissamut sakkortuumik akisussaassuseqarlutit misigisimasarputit
- suliaqartunik assigiinngitsunik suleqateqarnissamik piumassuseqarputit piginnaaneqarfigalugulu, kiisalu
- tuluttut allattariarsorluni oqaluinnarlunilu piginnaaneqarluarputit
Politikkip, ingerlatsinerup ineriartortitsinerullu akornanni ajornartorsiutiginagu sulisarputit, aammalu politikkimik suliaqartunik qanoq siunnersuisoqartarnersut ilisimaaraat. Aatsitassanut suliassaqarfiup iluani allaffissornikkut aaqqissuussaanermi sulinermit misilittagaqaruit, kiisalu aaqqissuussaanermi politikkikkut aqunneqartumi misilittagaqaruit, iluaqutaassaaq.
Kalaallit oqaasii kulturiallu ilisimasaqarfigigukkit iluaqutaassaaq. Qinnuteqartunut Kalaallit Nunaata avataaneersunut sungiusimasanit allaanerusuni kulturikkut atugaqarluni sulinissap inuunissallu piginnaasaqarfiginera, piumassuseqarfiginera kajumigineqarneralu pingaartinneqassaaq.
Uagut pilluta
Ujarassiornermut Immikkoortortaqarfiup Naalakkersuisoqarfimmi inissisimanerani pingaarnermi ilaatinneqarput:
- Kalaallit oqartussaasuinut ujarassiornermi ilisimatuussutsikkut siunnersuineq
- Ujarassiornermi aatsitassarsiorluni misissuineq aamma paasissutissanik nalunaarsukkat qaffasissumik pitsaassusilinnik peqalersitsinissaq
- Kalaallit Nunaanni aatsitassanut periarfissaqarfiusunut nittarsaassineq
Naalakkersuisoqarfimmi sulisut 42-t missaanniippugut. Naalakkersuisoqarfiup aatsitassanut suliassaqarfimmi pingaarnertigut pilersaarusiorneq isumagisaraa. Aatsitassanut tunngasunik suliaqarnerit pillugit politikkikkut oqallinnissanut ilisimasassanut tunngavissat suliarineqarneranni peqataasarpugut aammalu aalajangiinerit atuutsilertarpagut. Tamatuma saniatigut Naalakkersuisoqarfiup ataani immikkoortortat marluupput: Aatsitassanut Ikummatissanullu Aqutsisoqarfik aamma Atuisartoqarnermut Unammilleqatigiinnermullu Aqutsisoqarfik.
Atorfik aaqqissuussaanermi Ujarassiornermut Immikkoortortaqarfimmiippoq, tassaniillutik immikkoortortaqarfimmi pisortaq 1 aammalu ilisimatuussutsimi sulisut 11. Ujarassiornermut Immikkoortortaqarfiup Aatsitassanut Ikummatissanullu Aqutsisoqarfik, De Nationale Geologiske Undersøgelser for Danmark og Grønland (GEUS), allallu Kalaallit Nunaanni nunanilu allani kattuffiit qanimut suleqatigai. Ujarassiornermut Immikkoortortaqarfik pillugu annertunerusut atuarsinnaavatit uani.
Atorfininnermi atugassarititaasut
Atorfik maannakkut akissaateqarfimmut 38-mut inissinneqarsimavoq.
Aningaasarsiat, LR 38-mi aningaasarsianut aalajangersimasumik ilaatinneqartut ilanngullugit 1. april 2022 qaammammut kr. 56.910,-nik ukiumullu kr. 682.930,-nik annertussuseqarput.
Aallaaviatigut sulisartunut isumaqatigiissutini atugassarititaasut tunngavigalugit atorfinitsitsisoqassaaq, tassani qinnuteqartoq Kalaallit Nunaanni pisortani tjenestemandinut inatsit naapertorlugu tjenestemanditut atorfeqareersimassappat, tjenestemandinut atugassarititaasut tunngavigalugit atorfinitsitsisoqarsinnaassalluni.
Atorfimmut tunngatillugu piffissaq suliffiusussaq annerpaaffilimmik aalajangigaanngilaq aammalu qaangiuttoornermut ajunngitsorsiassanik tunniussisarneq pillugu aalajangersakkat aamma ullunut sulinngiffiusussanut annaaneqartunut ajunngitsorsiassat pillugit aalajangersakkat atuutinngillat, aallaaviatigut sapaatip akunneranut nalunaaquttap akunneri 40-t suliffiusussaapput.
Aningaasarsiat atorfininnermilu atugassarititaasut, ilanngullugit atorfininnermi soraarnermilu angalanermut pequtillu nuutinneqarnerannut akiliunneqarsinnaatitaaneq, piffissap atorfiniffiusup nalaani Namminersorlutik Oqartussat aamma kattuffiup isumaqatiginninniartussaatitaasup pineqartup akornanni isumaqatigiissut naapertorlugu pissapput.
Ineqarneq
Atorfimmut atatillugu sulisunut inissiamut pisatsersugaanngitsumut, maleruagassat sukkulluunniit atuuttut malillugit innersuussisoqarsinnaavoq. Inunnut sulisunut inissiameereersunut imaluunniit inissiami allami kommunimit imaluunniit Namminersorlutik Oqartussanit pigineqartumi ineqareersunut inissiamik innersuussisoqarsinnaanngilaq. Ineqarnermut akiliut aamma qularnaveeqqut, inissiamut innersuunneqartumut maleruagassat sukkulluunniit atuuttut malillugit akilerneqassapput. Sulisunut inissiaq atorfeqarnermut atatinneqarpoq, aammalu atorfeqarunnaarnermi qimanneqassalluni.
Ineqarnermut akiliut aamma inissiap pitsaassusaa, inissiap pisoqaassusaa, piginnittoqarnera il.il. apeqqutaallutik assigiinngissinnaapput. Ataavartumik sulisunut inissiamut innersuussinissamut utaqqisoqarsinnaavoq, taamaattumik utaqqiisaasumik inissiineq pisinnaalluni, ilanngullugu aamma najugaqaqatigiiffinni minnerusuni imaluunniit akunnittarfiup inissiaataanni, taakkununngalu akitsuusiisoqassaaq. Sulisunut inissiami imaluunniit utaqqiisaasumik inissiami, assersuutigalugu qimmimik imaluunniit qitsummik, anginerusumik uumasuuteqartoqarsinnaanngilaq.
Qinnuteqaat
Qinnuteqaat, CV, ilinniarsimanermut imaluunniit pikkorissarsimanermut uppernarsaatit, kiisalu uppernarsaatit allat attuumassuteqartut ”Qinnuteqaat nassiuguk” toorlugu nassiutikkit.
Qinnuteqaatit e-mail-ikkut tigusanngilagut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job