Teknikkikkut ingerlatsivimmi pisortaq
Avannaata Kommunia inummik piginnaasaqarluatumik Teknikkikkut Ingerlatsivimmi pisortatut atorfimmut pissarsiorpoq, qinnuteqarfiup naanerata kingunnia imaluunniit ersarinnerusumik isumaqatigiissuteqarnikkut atorfinittussamik.
Atorfik qitiusumik allaffeqarfimmi inissisimassaaq, qaninnertullu pisortarissavat allaffissornikkut pisortaaneq, kiisalu ingerlatsivinni pisortanut allanut qanittumik suleqateqarnissaq piumasarineqarpoq.
Pisortaqatigiinnut ilaassaatit, taakku ataatsimoorullugu ukiuni aggersuni suliassaraat, allaffissornikkut aaqqissuussaanerup atuutilersinneqarnissaa, politikerit takorluugaasa politikkiliuunneqarnissaannut aamma periuusiliuunneqarnissaannut siunnersuusiorneq, politikerit aalajangigaasa tigussaasumik iliuuseqarfigineqarnissaannik, inerisarneqarnissaannik aamma allaffissornermik suliaqarnermut malittarisassiuunneqarnissaannik suleriaasissaliuunneqarnissaanik qulakkeerinninnneq, innuttaasut, inuutissarsiortut sulisullu teknikkikkut atortorissaarutit atorlugit paasissutissanik ataatsimoorussamik pissarsiaqar-tarnissaannik qulakkeerinninneq, kiisalu sulisut atorfinitsinneqarneri ilinniaqqinnerilu aqqutigalugit pisariaqartinneqartumik piginnaasassaannik qulakkeerinninneq.
Suliffimmi aqutsisutut misilittagaqarnissaq pingaartinneqarpoq. Ingeniøritut imaluunniit teknikeritut ilinniaqarsimasuusariaqanngilatit, teknikimulli tunngassuteqartut eqqarsaatigalugit oqaatsit tamanit paasineqarsinnaasut atorlugit oqariartuuteqarsinnaanissat attaveqartarsinnaanissallu pisariaqartus-saavoq.
Avannaata Kommunia, 10.690-t missaani inuttussuseqarpoq taakku illoqarfinni sisamani nunaqarfi-nilu 23-ni najugaqarput.
Avannaata Kommuniata qitiusumik allaffeqarfia Ilulissaniippoq. Ilulissat kangerluat nunarsuarmi ilisimaneqartoq, UNESCO-p kingornussassatut allattorsimaffiutaani allassimavoq aamma nunaminertaq taanna ukiut tamaasa takornariarpassuarnit takusarneqartarpoq. Ilinniarfiit ukua illoqarfimmiipput: perorsaasunngorniat ilinniarfiat aamma Majoriaq.
Atorfeqarnermi akisussaaffiit aamma pingaarnertut suliassat:
- Politikkikktu aaqqissuussinermut tapertaaneq:
- Teknikkimut ataatsimiititaliamut allattaaneq.
- Suleqatit suliffeqarfiup avataaniittut, kiffartuussinermik isumaqatigiissuteqarlutik aqunneqartut, attaveqarfigineqartarnerinut akisussaasuuneq.
- Ataatsimiititaliamut ataavartumut, sanaartornermut avatangiisinullu ataatsimititaliamut, politikkinik periusissanillu siunnersuusiorneq akisussaaffigalugu.
- Politikerit aalajangernissaannut pisinnaatitaaffinnik pilersaarusiorneq aaqqissuinerlu.
- Aqutsisoqatigiinnut tapertaaneq:
- Aqutsisoqatigiit ulluinnarni sulineranni peqataasarneq aamma aqutsisoqatigiit ingerlaavartumik ataatsimiittarnerini peqataasarneq.
- Borgmesterimut, ataatsimiititaliami siulittaasumut aamma aqutsisoqatigiinni allanik akisussaaffilinnut isummersoqataaneq siunnersortaanerlu.
- Akisussaaffigisamik immikkut ittumik aqutsineq.
- Akisussaaffigisami missingersuusiornermut akisussaassuuneq.
- Sulisunut innutaassunillu sullissinermut tapertaaneq:
- Atorfillit tamarmiusut sulisinneqarnerinut akisussaasuuneq.
- Akisussaaffigisamut inatsisit atuuttut malinneqarnissaannut akisussaaffeqarneq.
- Periusissiat politikkikkut akuerineqartut piviusunngortinneqarnissaannut akisussaasuuneq.
- Innuttaasunik sullissiveqarfiit aamma suliffeqarfiit kiffartuussinermik isumaqatigiissuteqarlutik aqunneqartut piginnaasaqarluartumik eqqortumillu siunnersorneqartarnissaannik qulakkeerinninneq.
Taakku saniatigut atorfeqarnermi akisussaaffiit atorfillu pillugu allaaserisaq sulisoqarnermut immikkoortortaqarfimmut saaffiginnilluni pissarsiariniarneqarnissaa innersuussutigi-neqarpoq.
Piginnaasaqarfigisassatit:
- Suliffimmi politikkikkut aqunneqartumi misilittagaqartuuneq.
- Teknikkikkut piginnaasaqalerfiusumik ilinniagaqarneq, soorlu ingeniør-itut.
- Tassunga attuumassuteqartumik ilinniaqqissimasuuneq, aqutsineq, pilersaarusiornermi aqutsineq aamma periusissanik aqutsineq ingammik matumani pineqarput.
- Pisortat aamma/imaluunniit namminersortut suliffeqarfiutaanni sulinermik aqutsinermillu misilittagaqarneq.
- Kalaallit Nunaanni pissutsinik ilisimasaqarneq; kommunemi najugaqarfiit 27-t siammasissumik inissisimammata immikkut ittumik unammillernartuusarlutik ilisimasaqarnissaq pingaaruteqarpoq.
- Kalaallit Nunaanni inatsisinik attuumassuteqartunik ilisimasaqarneq.
- Kulturimik inuttullu paasinnittarneq; inuiaqatigiinni marluinnik oqaaseqartuni tamanna immikkut ittumik pigissallugu pingaaruteqarpoq.
- Kalaallisut, tuluttut danskisullu oqaaseqarneq.
- Attaveqaqatigiillaqqissuuneq, suliffeqarfiup avataanut aamma suliffeqarfiup iluani.
- Immikkoortortaqarfinni tamani sulisunik suleqatigissinnaaneq.
- Nuannaartuuneq aamma qiimasuuneq.
Akissarsiat aamma atorfeqarnermi atugassat:
Akissarsiat aamma atorfeqarnermi pissutsit, atorfininnermi soraarnermilu angalasinnaatitaaneq kiisalu pequtit nuunneqarneri pillugit Naalakkersuisut kattuffiullu isumaqatigiinniussisinnaatitaasup akornanni atorfininnerup nalaani isumaqatigiissutaasut atuuttut naapertorlugit tamakkua isumagineqassapput.
Atorfiup qanoq ittuunissaannut tunngassuteqartut maannakkut suliaralugit ingerlanneqarput.
Atorfimmut tunngatillugu inissaqartitsisoqarpoq, taamaammat malittarisassat atuuttut naapertorlugit depositumimmut / inimut akiliuteqartarnerit pisassapput.
Atorfik pillugu itinerusumik paasissutissat Avannaata Kommuniani allaffissornikkut pisortaanermut Nick Nielsen oqarasuaat 38 76 05-mut imaluunniit mailimut nick@avannaata.gl–mut saaffiginnilluni pissarsiarineqarsinnaapput.
Qinnuteqaatit ilinniarsimanermik siusinnerusukkullu suliffigisimasanik paasissutissartallit, ilinniarsimanermik uppernarsaatip assinganik ilalerlugit sulisoqarnermut immikkoortortaqarfimmeeriissapput kingusinnerpaamik 14. marts 2025.
Qinnuteqaatit ilinniarsimanermut uppernarsaatitallit aamma suliffigisimasamit oqaaseqaatitallit nassiunneqassapput
Qinnuteqarnissamut killissarititaasoq: marsip 14.-at, 2025