Sulisunut siunnersorti Isumaginninnermut Aqutsisoqarfimmi Allattoqarfimmut
Naalakkersuinikkut aaqqissuussami malinnaallutit ilaanissat aammalu Isumaginninnermut Aqutsisoqarfiup aqutsinerani qitiunissamut periarfissaqarnissaq soqutigilluinnarpiuk? Aqutsinikkut allattoqarfittullu suliassanik siammasissunik, immikkoortortaqarfiit tamarmik akornanni atassutaallutit unammilligassaqarnissannut piareersimavit? Piffissaliussat iluanni suliat naammassisinnaavigit, suliffeqarfimmi pitsaalluinnartumik aamma sutigut tamatigut sullissilluarnissannik tapersiisinnaavit? Taamaappat Isumaginninnermut Aqutsisoqarfimmi immaqa suleqatissaraatsigit.
Atorfik pillugu
Sullissillaqqilluinnartumik pingaartumik aaqqissuussami naalakkersuinikkut aqunneqartumi aqutsinikkut patajaatsunik piginnaasalimmik, Aqutsisoqarfimmik ingerlatsinermut pingaaruteqarluinnartunik suliassanik aaqqiipallassinnaasumik suleqatissarsiorpugut. Suliassanik annertuunik annikitsunillu, Aqutsisoqarfimmi pisortamut tapersersuisumik isumagisaqartarnermut tunngatillugu namminersorlutit ujartuisumillu sulisinnaassaatit aqutsisoqarfiullu immikkoortortaanut ulluinnarni unammilligassanik isumaginnissinnaassallutit. Atorfimmut naleqquttuussaguit ilikkajasuussaatit, aaqqissuussamik suleriaaseqassaatit, naammagittartuussaatit, allanngortoqarnissaanut piareersimassaatit tamanillu attaveqarsinnaassallutit.
Suliassatit ilaatigut makkuussapput:
isumasioqatigiinnerni, workshoppini, aaqqissuussinerni nalinginnaasumik suliassanik ataqatigiissaarineq kiisalu oqaluuserisassanik, qaaqqusissutinik aammalu pingaartumik kommuninik ataatsimiititalianillu ataatsimeeqateqarnernut imaqarnilianik suliaqarneq
ulluinnarni apeqqutinik aammalu avataani suleqatigisanik attaveqarnissamut pisariaqartitsinerni aqutsisunut suleqatinullu siunnersuineq
aqutsisoqarfimmi pisortamik, naalakkersuinikkut ilisimatitsissutinut, ataatsimiinnernut, § 37 naapertorlugu apeqqutinut tunngatillugu sullissineq, Inatsisartut ataatsimiinnissaannut il.il. paasissutissanik piareersaaneq.
inissanik nuunnissamullu inniminniissutinik isumaginninneq, tassunga ilanngullugu sulisunik nutaanik ataqatigiissaarineq atuisunillu pilersitsisarneq
sulinngitsoornernut takussutissamik, oqarasuaatit normuisa allattorsimaffiannik attavigisartakkallu allattorsimaffiannik nutarterisarneq
pisattanik pisarialinnik, IT-kkut atortorissaarutinik, ulluinnarni ingerlatsinermut nioqqutissanik inniminniisarneq kiisalu pisattat allattorsimaffianik suliaqarneq
Isumaginninnermut Aqutsisoqarfiup inissiaataasa inunnit eqqortunik sullinneqarnerannik qulakkeerinnittarneq, taamaalilluni suliffeqarfik tulluarsagaaniassammat, eqqiluitsuuniassammat immikkoortortaqarfiullu pisariaqartinneqartut eqqortinneqarniassammata
aqutsisoqarfiup mailianik toqqorsisarnermut systemimi F2-mi sukkasuumik, isumannaatsumik eqqortumillu agguataarisarneq
Suliassat allat takkussortut
Naatsorsuutigaarput, illit imaattuusutit:
naleqquttumik ilinniagaqartutit kiisalu qallunaatut kalaallisullu oqaluttariarsornikkut allattariarsornikkullu piginnaasaqarluartutit
sullisserususussuseqarluartuusutit, namminersortuusutit, pisussaaffinnik eqqortitsisartutit, ikiuerusussuseqartutit suliartornissamullu aalajaatsuusutit
Toqqorsisarnermut systemitsinnik, onlinekkut inniminniisarnermut systeminik nalinginnaasunik, ataatsimiigiaqqusissutinik aamma inissanik nuunnissamullu inniminniissutinik suliaqarsinnaallutit IT-mut paasisimasaqartutit
sulianik amerlasuunik ataatsikkut takunnissinnaasutit aammalu sulinermi tatisimaneqarneq apeqqutaatinnagu aperineqarsinnaasutit
Ima neqeroorfigisinnaavatsigit:
atorfik qitiusoq aqutsisoqarfimmi piginnaasannik naleqartitsisoq pisariaqartitsisorlu, tamatigoortoq assigiinngitsunik pissanganartunik suliassaqarfiusoq
Suliffeqarfik suleqatigiilluarfiusoq atugarissaarnermillu qitiutitsisoq
meeqqanut inuusuttunullu suliassaqarfimmi naalakkersuinermik suliallit suliniutaannik assut paasisimasaqarneq
aqutsisoq suliamut tunngasunik piginnaasannut tatiginnittoq, piviusorsiortunik piumasaqaateqartartoq ineriartornissannillu salliutitsisoq
persuarsiorpasinngitsumik ataqqinnittumillu pissusilersortarneq, aamma ulapikkaangatta
Atorfik Allattoqarfimmi inissisimavoq, tassani Isumaginninnermut Aqutsisoqarfiup ingerlanneqarnera, suleriusai aamma suliffeqarfiup iluani avataanilu attaveqaqatigiinneq pitsanngorsaaffigalugit sulisoqartarpoq aamma illit akisussaaffimmik angisuumik tunineqassaatit kiisalu saaffiginnittarfimmi sulisunut ilaallutit suliassat akimorlugit annertuumik akisussaaffeqassallutit.
Meeqqanut, inuusuttunut ilaqutariinnullu naalakkersuisoqarfiup ataani Isumaginninnermut Aqutsisoqarfik arfineq-marlunnik makkunannga immikkoortortaqarpoq: Pitsaaliuinermut immikkoortortaq Paarisa, Aningaasaqarnermut immikkoortortaq, Meeqqanik inuusuttunillu ulloq unnuarlu paaqqinnittarfiit aamma inissititerinermut immikkoortortaq, Innarluutilinnik sullissivik, Sullissisunut siunnersuisarfik, Innuttaasunut toqqaannartumik sullissivik aamma Allattoqarfik.
Ulloq atorfiniffissaq
Ulloq 1. januaari 2025 isumaqatigiissuteqarnikkulluunniit
Qinnuteqarnissamut killiliussaq: marlunngorneq 17. decembari 2024 nal. 12.00 (Kalaallit Nunaanni nalunaaqutaq malillugu)
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Paasissutissat allat
Atorfik pillugu itinerusumik paasisaqarnerorusukkuit Allattoqarfimmi pisortaq Mikkel Cuarteros-Hansen saaffigisinnaavat uunga oqarasuaammut: +299 34 66 07 sianerlutit imaluunniit mail-ikkut uunga mikch@nanoq.gl allallutit.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.