Sulisoqarnermi Inatsisilerinermilu allaffimmi pisortaq- piffissamut aalajangersimasumut atorfik
Aningaasaqarnermut Sulisoqarnermullu Aqutsisoqarfik (ASA) allaffimmi pisortassamik ataatsikkut ataatsimoortumik takunnissinnaasumik aamma atorfinitsitsisarnermut suliassaqarfimmi sukumiisumik immikkuualuttunik suliaqartarsinnaasumik pissarsiorpoq. Atorfik ukiumi ataatsimi atorfiussaaq.
Allaffimmi pisortatut ASA-mi sulisunut siunnersortit taakkulu suliassanut suliarininninnerat, inatsisilerinermi allaffimmi pisortaq qanimut suleqatigalugu, pingaarnertut akisussaaffigissavatit. Ataatsimoorlusi immikkoortortaqarfimmi aqutsinermi aammalu suliassanik ataatsimoorussanik isumaginnittuussaasi, tassunga ilanngullugit suleriaatsinik aaqqissuussinerit immikkoortortaqarfimmillu ineriartortitsineq. Siulleq sulinngippat allaffimmi pisortap aappaata Sulisoqarnermi Inatsisilerinermilu aqutsinermi suliassat isumagissavai Atorfik pilersinneqaqqammerpoq ingerlatsineq, pitsaassutsimik- ineriartornermillu anguniagaqarneq qitiutillugit, tassunga ilanngullugit immikkoortortaqarfiit atorfinitsitsisut Namminersorlutik Oqartussat aamma Peqqinnissaqarfik suleqatigalugit piffissaalluartillugu atorfinitsitsinermut isumaqatigiissutinik suliaqarneq.
Sulisoqarnermi aamma Inatsisilerinermi siunnersortit 11-upput taavalu sulisoqarnermut inatsisilerituut 3-4-t. Aaqqissuussaanikkut, suliassatigut ikorfartoqatigiinnikkullu immikkoortortaqarfinnut allanut ASA-p iluani avataanilu qanimut attuumassuteqarpoq, tamanna pillugu uani paasisaqarnerugit www.asa.gl
Immikkoortortaqarfimmi suliassat ilaatigut tassaapput:
Namminersorlutik Oqartussanut taakkulu ataanni immikkoortortaqarfinnut suliassat sulisunut tunngasut, siunnersuinerit aqutsisunillu ikorfartuinerit
Isumaqatiginninniarnerit atuuttussanngortitsinerillu
Namminersorlutik Oqartussanut kommuninullu isumaqatigiissutinik nassuiaanerit
Atorfinitsitsinerni isumaqatigiissusiornerit akissarsianillu eqqortunik innersuussisarnerit
Inatsisit malillugit atorfinitsitsisarnernik ilinniartitsinerit ilitsersuusiornerillu
Immikkoortortaqarfimmi sulinernik attuumassuteqartunik ikiuunnerit
Allaffimmi pisortap suliassai:
Sulisoqarnermi immikkoortortaqarfimmik ingerlatsineq ineriartortitsinerlu, tassunga ilanngullugit suliassanik agguaanerit. isumaginninnerit pingaarnersiuinerillu.
Namminersorlutik Oqartussani kommuninilu immikkoortortaqarfinni immikkoortortaqarfinnullu suleriaatsinik ataqatigiissaarinerit, pitsanngorsaanerit taavalu aaqqissuinermut ikorfartuineq.
Immikkoortortaqarfimmut attuumassuteqartunik aqutsisunut ilisimatitsisarnerit
Inatsisilerituut allaffimmi pisortaallu ataqatigiissaarneqartussami immikkoortortani aalajangersimanerusuni akisussaaffeqarneq.
Ilinniakkatigut imatut tunngaveqarnissat naatsorsuutigaarput:
Cand jur/cand merc jur.-itut ilinniagaqarsimasoq
Aqutsinerup tungaatigut soqutigisalik immaqaluunnit misilittagalik
Inatsisit malillugit atorfinitsitsisarnernik sulisoqarnerlu pillugit inatsisilerinermik ukiuni arlalinni misilittagalik
Pisortat ingerlatsinerannik ukiuni arlalinni misilittagalik, Namminersorlutik Oqartussaniusinnaavoq
Isumaqatiginninniartarnerit pillugit aaqqissussaanermik ilisimasalik
Ilinniartitsinermik misilittagaqarneq
Inuttut piginnaasatit makkununnga tunngappata pitsaanerpaassaaq:
Tatiginartoq, ammasoq, kajumissaarisoq
Suliniuteqallaqqissoq, qasujaatsoq sulianillu ingerlatsillaqqissoq
Suleqatikkuminartuussaatit atuisullu paasinnittariaasiat aallaavigalugu sullissisinnaassaatit
Eqaatsumik sulisinnaavutit ulluinnarnilu allanngorartumi sulilluarsinnaavutit
Inuiaat kalaallit, kulturi aamma kalaallit oqaasiinik ilisimasaqaruit iluaqutaassaaq
Uagut neqeroorutigaagut
Suliffeqarfik Qitiusumik Allaffeqarfissuarmi aamma pisortat suliffeqarfiini tamani ersarissoq.
Suliffik allannguinissanik tusaasoq aamma immikkoortortaqarfimmi sulisunilu ataasiakkaani ineriartortitsinernik qitiutitsisoq.
Aqutsisoqatigiit aqutsisut ataasiakkaat ineriartortinneqarnissaannik qitiutitsisut aamma aaqqissuussaanermi assigiinngitsuni suliffeqarfimmi aqutsinissamut tunngavissamik atulersitsineq.
Attaveqarfissaq:
Frederik Schmidt
+299 34 66 81
Atorfinitsitsinerup suussusaa:
Piffissami killiligaasumi
Atorfinitsitseriaaseq:
Isumaqatigiissutit tunngavigalugit piumasaqaatit
Ulloq atorfiniffissaq
Apriilip 1. 2025 isumaqatigiissuteqarnikkulluunniit.
Qinnuteqarfissamut killigititaq
Ataasinngorneq februaarip 24-at 2025
Atorfinitsitsinissamut oqaloqateqarnissat sapaatip akunnerani 9-ni ingerlanneqarnissaat naatsorsuutigineqarpoq.
Atorfik pillugu annertunerusumik paasisaqarusukkuit, Sulisoqarnermut- taavalu Isumaqatiginninniarnermut pisortaq Frederik Schmidt tikilluaqquneqarputit attavigissallugu email-imut fsch@nanoq.gl immaqaluunnit oqarasuaatikkut. +299 346681
Atorfeqarnermi atugassarititaasut
Atorfik akissaateqarfiit immikkoortuani LR 36-mi massakkut inissisimavoq.
Aningaasarsiat aalajangersimasunik aningaasarsianut immikkoortuini LR 36-mi 1. april 2022-miit qaammammut 47.777 Kr.-upput ukiumullu 573.321.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.
Akissarsianut atorfeqartitaanermullu piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput. Naalagaaffimmi tjenestemandit aamma AC-nut isumaqatigiissutit arlallit, ilaatigut DJØF-ip Finansministereqarfiullu akornanni isumaqatigiissutit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput. Nunamut namminermut ministereqarfiup aammattaaq kommuninut immikkoortortanullu Kalaallit Nunaanni Namminersorlutik Oqartussani atorfinitsinneqarnermi aningaasarsiaqarani sulinngiffeqarnissamut qinnuteqaatit tigulluarneqartarnissaannik innersuussutigisimavaa.
Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut katissimasaannut /aappaannut aamma atuupput.
Aallaavittut sapaatip akunneranut sulineq akunnernik 40-nik sivisussuseqarpoq, aamma ukiumut akunnerni 320-ini qaammatillu pingasuugaangata akunnerni 80-ini suliartoqquneqarsinnaaneq atorfininnermut attuumapput, ullullu sulinngiffiusussat annaaneqarsimasut ajunngitsorsiassaqarfiginissaat pillugu aalajangersakkat atuutinngillat.
Ineqarneq
Atorfimmut atatillugu sulisutut ineqarnissamut innersuussinertaqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareersimaguni sulisutut inissiamik innersuussivigineqarnissamut pisinnaatitaaffik attatiinnarneqassaaq.
Sulisutut inigisaq atorfeqarnermut tunngavoq, atorfeqarnerullu uninnerani qimanneqassalluni.
Qinnuteqaat, imminut ilisaritinneq, ilinniarsimanermut aamma pikkorissarsimanermut uppernarsaatit aamma pappiaqqat attuumassutillit "Qinnuteqaat nassiuguk" toorlugu nassiutikkit.
E-mail aqqutigalugu qinnuteqaatit nassiussat tiguneq ajorpagut.