Suliffeqarnermut Isumaginninnermullu sullissivimmut siunnersorti
Kommuneqarfik Sermersooq aalajangerpoq Suliffeqarnermut Isumaginninnermullu sullissivik, Suliffeqarnermut Isumaginninnermullu Ingerlatsiviup ataani immikkoortortatut ataatsimuulissasut, taamaalilluni Ingerlatsivik aaqqissuussaanermik nalimmassaallunilu suliniutinik susassaqarfiit akimorlugit ingerlatsisussanngorluni, taamaammat tunniussimasumik pikkorissumillu siunnersortissarsiorpugut Ingerlatsivimmi immikkoortortaqarfiup ineriartorteqqinnissaani peqataasinnaasumik aammalu Ingerlatsivimmi immikkoortortanilu assigiinngitsuni aqutsisut suleqatigalugit aguniagaasunik piviusunngortitsiniaqataarusussuseqarlunilu kivitsisinnaasumik. Atorfininnissaq 1. marts 2025 pissasoq kissaatigineqarpoq imaluunniit tamatuma kingorna piaarnerpaamik. Qinnuteqarnermi pingaaruteqarpoq atorfimmut kajumissuseqarnerup ersersinneqarsimanissaa.
Atorfik Kommuneqarfik Sermersuup Suliffeqarnermut Isumaginninnermullu Ingerlatsiviani inissisimavoq, tassani Suliffeqarnermut isumaginninnermullu sullissivimmi fagchefiusoq pingaarnertut aqutsisuuvoq. Siunnersorti toqqaannaq fagchefimut attaveqartuussaaq.
Siunnersortaasup fagchefi suleqatigalugu Suliffeqarnermut isumaginninnermullu sullissivimmi ingerlatsineq nakkutigisarissavaa tamatumani ilaatigut pineqarlutik missingersuutinik nakkutiginninneq, ineriartornermik ingerlatsinermillu suliat, allallu fagchefi immikkoortortanilu aqutsisut peqatigalugit susassaqarfimmi suliassat, taamaasilluni naatsorsuutigineqarluni susassaqarfiit akimorlugit suleqatigiinnikkut ineriartorneq pitsaasoq, attaveqatigiilluarneq suleqatigiilluarnerlu annertuumik uukkatarineqartoq piginnaasaralugu sulineq ingerlanneqarsinnaassasoq.
Suliassaqarfimmi akisussaaffigineqarput; Majoriami aqqutissiuussineq, atuagarsornikkut piginnaanngorsaaneq, kiisalu suliffeqalersitsiniaanermut tunngasut, aamma Isumaginninnermut sullissineq tassani akisussaaffigineqarluni innuttaasut saaffiginnittut sullinneri, pensionisiat, pisartakkat kiisalu angerlarsimaffeqanngitsunut tunngasut.
Atorfimmi suliassat:
∙Innuttaasunik sullissinerup pitsanngortikkaluttuinnartinnissaanut fagchef aaqutsisullu suleqatigalugit ineriartortitsineq
∙Ineriartornermik ingerlatsisoqarneranik, suleriutsit sinaakkuserneqarsimanerinik malinnittoqarneranik, kiisalu periusissiat isumaqatigiissutit suliniutillu kommunimit immikkoortunut pilersaarutitigut politikkikkut missingersuusiornermi isumaqatigiissutitigut suliakkiutigineqarsimasut malinneqartarnissaannik qulakkeerinninnissaq
∙Immikkoortortani aqutsisuusut siunersiueqatigineqartarnissaannik qulakkeerinninnissaq
∙Suliassaqarfiit akimorlugit suleqatigiinnerulernissaannik ineriartortitseqataaneq
∙Fagchef suleqatigalugu missigersuutinik nakkutiliineq missingersuusiornerlu
∙Fagchef suleqatigalugu suliffeqarneq pillugu immikkoortumut pilersaarummik piviusunngortitsiniaanermi ineriartortitsineq, atuutilersitsineq kiisalu sulianik uterfiginnittarneq
∙Fagchef suleqatigalugu Namminesorlutik Oqartussanut Majoriat pillugit Naammassisassatut isumaqatigiissutip imarisaanik piviusunngortitsiniaanermi sulianik uterfiginnittarneq
∙Sulianik politikkikkut ataatsimiititaliamut saqqummiussassanik suliaqarnermi peqataanissaq
∙Sulianik tassanngaannaq takkuttunik suliaqaqataasinnaassuseqarnissaq
Naatsorsuutigisat:
∙Ilinniagaqarsimasuunissat, neriuppugut allaffissornikkut qaffasinnerusumik
∙Ilinniartitaanermut suliffeqarnermullu isumaginninnermullu tunngasuni inatsisinik ilisimasaqartutit
∙Missingersuusiornermik naatsorsuusiornermillu ilisimasaqartutit
∙Pitsaasumik angusaqarusuttuusutit sunniuteqarluarusuttuusutillu
∙Pisuni qanoq ikkaluartuni malinnaasinnaasutit
∙Aallarnisaasinnaasutit isummersuisinnaallutillu
∙Qanilaartumik, akuersaarinnittumik pitsaasumillu suleqatiginneriaaseqartutit
∙Suliasaqarfimmut tunngasutigut kissaatigisanik pisariaqartitanillu qulaajaanermut peqataasinnaasutit
∙Kalaallisut danskisullu oqalussinnaanermik allassinnaanermillu piginnaasaqartutit
∙Inuiaqatigiit piorsarsimassusaannik ingerlanneqarnerannillu ilisimasaqarlutillu soqutigisaqartuusutit
Neqeroorutigaavut:
Suliffik pissanganartoq unammillernartunillu suliassartalik, imarisassaanik nammineq sunniuteqarfigineqarsinnaasoq suliffeqarfimmilu angisuumi ineriartortinneqartuartumi allanngorartuartumilu annertuumik akisussaassuseqarfiusoq. Suliffimmut suliffeqarfimmullu iserluartinneqarnissaq pingaartipparput aamma aqutsisut qanimut immersoqatigiiffigalugit suleqatigilluartarnissaq kiisalu aallartitsinissamut nutaaliornissamullu inissaqartitsinissaq anguniartuarparput.
Pineqaatissinneqarsimannginnermut uppernarsaat:
Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.
Atorfinititsineq qaammatini pingasuni misiliutitaqassaaq.
Inissaq:
Atorfininnermut atatillugu inissiamik innersuussisoqarsinnaanngilaq.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Direktøri Ejnar Grønvold, oqarasuaat +299 36 81 60 imaluunniit e-mail: ejgr@sermersooq.gl (Piffissami uani 20. januar - 4. februar) imaluunniit uunga: Fagchef Bea Mølgaard Lennert, oqarasuaat +299 36 81 35 imaluunniit e-mail: bmle@sermersooq.gl (Piffissami uani 5-19. februar)
Qinnuteqaat:
Qinnuteqaat qulequtserlugu Atorfiup ilisarnaataa 65-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: februaarip 19.-at, 2025