Saqqummiuteqqitaq Tusagassiortoq nutaarsiassaqartitsivimmi
Ullormut nutaarsiassat pingaarnerpaat assitalersorluakkat tv-kkut tusagassiarerusukkukkit KNR-ip nutaarsiassaqartitsiviani suleqatitaarerusuppatsigit.
KNR-ip nutaarsiassaqartitsivia tusagassiortumik sulisussarsiorpoq, April-ip aallaqqaataani 2025 imaluunniit isumaqatigiissuteqarnikkut atorfinitsitsisoqassaaq.
KNR-ip nutaarsiassaqartitsiviani tusagassiortut ilanngutassiaminnik allaaserisaminnillu radiokkut, tv-kkut nittartakkakkullu saqqummiussuimmata, tusagassiuutit assigiinngitsut arlallit atorlugit sulinissat piareersimaffigissavat.
Atorfilli una tv-kkut nutaarsiassiornermik toqqaannarnermillu annerusumik suliaqarfiuvoq.
Qanorooq ullormut ataasiarluni tv-kkut nutaarsiassiisarpoq, sapaatillu akunneranut pingaarnersiukkanik eqikkaalluni minutsit 30-it missaanik sivisussusilimmik sapaatip akunnerata naanerani KNR-ikkut DR-ikkullu aallakaatitassamik aallakaatitassiortarpoq.
Suliffeqarfimmi ulapaarfiusumi suleqatigiilluarfiusumilu tusagassiortut nutserisullu peqatigalugit sulissaatit.
Nunatsinni nutaarsiassat, kalaallisut danskisullu suliarilluakkat aaqqissuisoqarfimmi kujataani ataatsimik avannaanilu ataatsimik aamma tusagassiortulimmi suliarissallugit pingaartipparput.
Ilinnit naatsorsuutigaavut:
tusagassiortutut assigisaanilluunniit ilinniagaqarsimanissat
isorinnissinnaassuseqarnissat inuiaqatigiinnilu pissutsinik ilisimasaqarluarnissat
tunniussimasuunissat eqaatsumillu suleriaaseqarnissat
suleqateqallaqqissuunissat isumagissaartuunissalu
kalaallisut oqallorissuunissat toqqaannarnermillu nuannarisaqarnissat pingaartipparput
Suleriapallannermik ullormullu sammisanik allanngorartunik nuannarisaqarnissat pingaaruteqarpoq. Oqaluttuatsialammik pissutsinik piviusumik tunngavilimmik takunnissinnaassaatit saqqummiussisinnaassallutillu.
Suleqateqallaqqillutillu namminersullaqqissuunissat pingaartippavut.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isuma- qatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Ineqarneq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Ini atorfeqarnermut tunngavoq atorfeqarnerullu unitsinnerani qimanneqassalluni.
Paasissutissat sukumiinerusut nutaarsiassaqartitsivimmi pisortaq Irene Jeppson +299- 36 46 38, irj@knr.gl imaluunniit aaqqissuisoq Pipaluk Høegh +299- 36 45 79, pih@knr.gl
Qinnuteqarfissaq kingulleq 14. februar 2025.
KNR aamma Nuuk Illoqarfia pillugu
Kalaallit Nunaata Radioa “KNR” – Kalaallit Nunaanni nuna tamakkerlugu tamanut tusagassiivik – pilersinneqarpoq 1958-imi taamanimiillu nunami tusagassiuteqarnikkut qitiulluinnarluni inissisimajuarluni.
KNR Kalaallit Nunaanni illoqarfimmi pingaarnermi, Nuummi 23.994-it missaannik inoqartumi, inissisimavoq. Nuuk illoqarfiuvoq uummaarissoq, atortorissaarutit nutaaliaalluinnartut pinngortitarsuullu naliitsup akuleriiffigisaat. Maani niuertarfiit alutornartut alakkarterneqarsinnaapput, kulturip illorsua Katuaq isersimaarfigineqarsinnaavoq, katersugaasivimmi eqqumiitsuliat alutorsaatigineqarsinnaallutik illoqarfiulluunniit filmertarfiani filmimik isiginnaartoqarsinnaalluni.
Pinngortitaq avatangiiserisaq Nuummi inuunermut ilaalluinnarpoq. Illoqarfik qaqqarsuarnik kangerlunnillu qinngortuunik avatangiiseqarpoq, ukiullu kaajallakkiartortarnera ersarissumik malunnaateqartarluni – misigisaq kalaallinik nunamut atassuteqalersitsisoq. Ilutigisaanik Nuummi sutorniartarfiit eqqissisimaarfiusinnaapput kissartumik kaffisorfiullutik mamarluinnartunilluunniit neriffiullutik, illoqarfimmilu inooriaaseq inuttut kialaarnermik allanngujuissutsimillu ilisarnaquteqarluni. Nuuk illoqarfiuvoq ileqqutoqqat nutaaliornerullu naapiffigisaat, timimut tarnimullu uummaarinnartumik.”
Qinnuteqarnissamut killissarititaasoq: februaarip 14.-at, 2025