Sammisassaqartitsinermut Kultureqarnermullu Immikkoortortaq suliniummut suleqataasussaq
Sammisassaqartitsinermut Kultureqarnermullu Immikkoortortaq suliniummut suleqataasussamik - ineriartortitsinermi periusissianilu piginnaasaqarluartumik pissarsiorpoq
Sammisassaqartitsinermut kultureqarnermullu suliassaqarfimmi soqutigisaqarluinnarpit? Kommuneqarfik Sermersuup aamma Kalaallit Nunaanni Timersoqatigiit Kattuffiat (GIF)-ip akornanni suleqatigiinnermik pitsanngorsaarusuppit? Taava atorfik ilinnut naleqquttuuvoq!
Kommuneqarfik Sermersuumit sammisassaqartitsinermut kultureqarnermullu siunnersortitut GIF-imik allanillu suliaqartunik suleqateqarluni timersornermik sammisassaqartitsinermillu pitsanngorsaataasunik suliniutissanik suliniutinillu ineriartortitsinermi pingaarutilimmik atuuffeqassaatit. Immikkoortortami ineriartortitsinermut suliassanik suliaqartassaatit tassunga ilanngullugit periusissiorneq, suleqateqarnerit, peqatigiiffinnut tapersersuineq aaqqissuussinerillu. Atorfik namminersorluni tunniusimallunilu sulisinnaanermik pisariaqartitsiffiuvoq, tassani periusissiugaasumik eqqarsarsinnaasassaatit aamma suliniutissat iluatsinniarlugit suliaqartassaatit.
Immikkoortortaavugut qulinik sulisulik, suliassaqarfimmilu ilaatigut sunngiffimmi atuartitsinerit, peqatigiiffinnut tapiissutit, klubbit, eqqumiitsuliortut, kulturimik isumassarsiorfik, Suialaa Arts Festival kiisalu innuttaasunut aaqqissuussinerit allat suliarisarpagut. Tamatuma saniatigut kommunimi tamarmiusumi immikkoortortaqarfiup ataaniittunik suliffeqarfeqarpoq, soorlu naluttarfik, nipilersornermik ilinniarfiit, timersortarfiit, katersortarfiit, katersugaasiviit, ammeriviit allarpassuillu.
Suliassatit pingaarnerit makkunannga ilaqassapput:
∙Kommuneqarfik Sermersuup aamma Kalaallit Nunaanni Timersoqatigiit Kattuffiat (GIF)-ip akornanni suleqatigiinnermik ataqatigiissaarineq ineriartortitsinerlu.
∙Timersoqatigiinnut kattuffinnik, kulturilerisunik kajumissutsinillu suliniutinik tapersersuineq.
∙Sammisassaqartitsinermut Kultureqarnermullu tunngasuni suliniutinik suliniummik aqutsisuuneq tassunga ilanngullugit pilersaarusiorneq, ataqatigiissaarineq malinnaaffiginninnerlu.
∙Suliniummik nassuiaasiorneq, ukiumut pilersaarusiorneq aamma sammisassaqartitsinermut kultureqarnermullu suliassaqarfimmi suliniuteqarneq.
∙Missingersuutinik pilersaarusiornermi, akiligassat akilernerinik aamma periarfissanut allattorsimaffimmik ataqatigiissaarinermi ikiuineq.
∙Siuariartornermik qulakkeerineq, immikkoortortami assigiinngitsunik aamma avataaniit suleqatigisartakkanik suleqateqarnermut atatillugu ataqatigiissaarineq aaqqissuussinerlu.
∙Immikkoortortami aqutsisoq fagchefilu suleqatigalugit kulturilerinermi sammisassaqartitsinermilu suliassaqarfiit akornanni suleqatigiinnermik tapersersuineq.
∙Immikkoortortami aaqqissuussanut annerusunut ikiuunneq tassunga ilanngullugit pilersaarusiorneq, ataqatigiissaarineq, ingerlatsineq suliassallu.
∙Suleqatigisat attuumassuteqartut suleqatigalugit aaqqissuussinernik sammisaqartitsinernillu pilersaarusiorneq ingerlatsinerlu.
∙Ineriartortitsinissamut periarfissat aningaasaliissutillu pillugit peqatigiiffinnut siunnersuineq tapersersuinerlu.
∙Kommunip immikkoortortaqarfiinik kiisalu avataaniit suleqatigisartakkanik assigiinngitsunik suleqateqarneq.
∙Ataavartumik pitsanngorsaanissaq qulakkeerniarlugu suliniutinik suliniutissanillu malinnaaffiginninneq naliliinerlu.
Naatsorsuutigaarput:
∙Timersornermut, kulturilerinermut, inuiaqatigiilerinermut imaluunniit suliassaqarfimmut attuumassutilimmik ilinniagaqartutit.
∙Ineriartortitsinermut sulianik, suliniummut aqutsinermik imaluunniit peqatigiiffinnik aaqqissuussanik suleqateqarnermik misilittagaqartutit.
∙Kalaallit Nunaanni timersornermik kulturilerinermillu suliassaqarfimmik ilisimasaqartutit.
∙Aaqqissuussaasumik suleriuseqartutit, suliniuteqallaqqissuusutit attaveqatigiinnik suleqatigiinnermillu pilersitsillaqqissuusutit.
∙Oqaatsitigut allattariarsornikkullu attaveqarsinnaalluartutit.
∙Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.
Ilinnut neqeroorutivut:
∙Atorfik pissanganartoq, kommunimi sammisassaqartitsinermut kultureqarnermullu suliassaqarfimmi ilusileeqataaffigisinnaasat.
∙Suliffimmi avatangiiseq suleqatigiinnermik pingaartitsiffiusoq tunniusimasunik sulisulik suleqatigisartagalillu.
∙Periusissianik aamma suliniutinik suliaqarnissamut periarfissalik.
Pineqaatissinneqarsimannginnermut aamma meeqqanut pinerliisimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.
Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.
Atorfinititsineq qaammatini pingasuni misiliutitaqassaaq.
Inissaq:
Atorfininnermut atatillugu inissiamik innersuussisoqarsinnaanngilaq.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Immikkoortortami aqutsisoq Jonas L. Nilsson, oqarasuaat +299 36 75 23 imaluunniit e-mail: jonl@sermersooq.gl
Qinnuteqaat:
Qinnuteqaat qulequtserlugu Atorfiup ilisarnaataa 135-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: februaarip 27.-at, 2025