Qarasaasialerinermut Digitaliseriinermullu Pisortaq
Aaqqissuussaanermi anguniagaqarfiusumi digitalinngortitsineq qarasaasialerinerlu ilungersuussamik ingerlakkusuppigit? Ingerlatitsilluartarpit aamma digitalikkut allanngortitsisarnerup qarasaasialerinermillu ingerlatsisarnerup iluani patajaatsumik aqutsinissamik misilittagaqarpit? Peqatigitillugulu periusissat tungaatigut eqqarsaatersortartuuguit, teknologinut tunngatillugu piginnaasaqarluartuuguit isumaqatigiissutsinillu aqutsinermi pitsaasumik maluginiaallaqqissuuguit, taava immaqa atorfik ilinnut soqutiginassooq.
Atorfik pillugu:
Qarasaasialerinermut Digitalinngortitsinermullu Pisortatut Kommuneqarfik Sermersuumi digitalinngortitsinerup iluani nutaanik sammisunik atuutilersitsinissamut aqutsinissamik pingaarnertut inissisimassaatit. Akisussaaffitit assigiinngitsorpassuupput – qarasaasiaqarnermi attaveqaasersuinermi patajaatsumik qularnaatsumillu aaqqissuussinissamik qulakkeerinninnermiit digitalinngortitsinermi malitassanik anguniagaqarfiusunik piviusunngortitsinissaq ilanngullugu. Sulianni ukkatarineqassapput, nutaalianik isumassarsianik nutaanik aaqqiissutissanik siuarsaanissaq, suleriaatsinik pitsanngorsaaneq aamma suliffeqarfik akimorlugu paasissutissatigut aalajangiinernik ingerlatsinernut tapersiineq .
Piffissami pissanganartumiippugut, matumani tegnologiit soorlu robotsit atorlugit aaqqiissutit namminerlu isumagisunngortitsinerit kommunimit suliaasuni ilaatinneqalissallutik. Suliassatit tassaassapput, piginnaasanik inerisaaneq kommunillu digitalimut piareersimaneranut sunniuteqarluarsimaneranullu aaqqiissutinik nukittorsaasunik nassaarneq.
Suliassanni akisussaaffigisanni pingaarnerpaat ilagaat, avataani qarasaasianik pilersuisunik suleqateqarnerit pitsaanerpaamik ingerlanissaannut qulakkeerinninnissat. IT-supporti suleqammit avataaneersumit ingerlanneqarpoq, illillu piumasarisani immikkoortitaartut pisariaqartinneqartut pillugit, isumaqatigiissutsinillu isumaqatigiinniarnissamut erseqqissuliorsinnaassaatit aamma tunniussinerit pitsaanerpaanissaannut qulakkeerinnillutit. Aammattaaq isumaqatigiissutit malinnaaffigissallugit akisussaaffigissavat, kommunilu malitsitsineq pillugu paasissutissanillu isumannaatsuutitsinissamut piumasaqaataasunik eqquutsitsinissaanut qulakkeerinninnissamut akisussaasuussaatit.
Immikkoortortamut nutaajukannersumut, matumani suliffeqarfimmut ataatsimut qarasaasialerinermik digitalinngortitsinermilu ataatsimoortitaasumut aqutsisuussaatit. Tamanna malitsigissavaa immikkoortortap kulturianik, ilusiligaaneranik ingerlatsineranillu immikkuullarissumik periarfissinneqarneq. Aqutsisutut suliffeqarfik akimorlugu suleqatiginnilluarnermik pilersitsissaatit kiffartuussinermilu sulisunut innuttaasunullu atuisunut tulluartunik aaqqiissuteqarnissamut qitiutitsisumik patajaatsumik kultureqarnissamut qulakkeerinnissallutit.
Ilinnut tunngasut:
Aqutsisuuvutit paasissutissiillaqqissoq aamma suleqatiginnikkumassuseqartoq, sulisuppillu akornanni tatiginnilersitsisinnaasoq tunniusimalersitsisinnaasorlu. Pilersaarusiornissaq pingaartillugu eqqarsartariaaseqarputit avatangiisinilu pisariusuni soqutigisaqaqatigiippassuaqartuni ilorrisimaartuuvutit. Peqatigisaanillu niuernikkut paasisimasaqarluartuuvutit isumaqatigiissutsinillu aqutsinermut aamma aningaasaqarnikkut isumaqatigiissutsinik pitsanngorsaanissamut tapitsuullutit.
Naatsorsuutigaarput:
∙Suliamut attuumassutilimmik ilinniagaqarsimassasutit.
∙Aqutsinermik misilittagaqassasutit.
∙Suliffeqarfimmi politikkikkut aqunneqartumit imaluunniit assingusumik avatangiisilimmik pisariusumit misilittagaqassasutit.
∙Periusissanik atuutilersitsinissap iluani piginnaasaqassasutit aamma pilersaarutit aalajangersimasunik angusassanngortitsisinnaassasutit.
∙Qarasaasiatigut attaveqaatit, tegnologiip ineriartornera digitalikkullu allanngortitsineq pillugit paasisimasaqassuseqassasutit.
∙Tegnologiimut tunngasunik nutaanik soorlu AI namminerlu isumagisunngortitsinernik misilittagaqassasutit aamma suliffeqarfimmut naleqartunngortissinnaassasutit.
∙Piumasaqaatinik ersarissaasinnaassasutit, nioqqutissanillu pilersuisut isumaqatigiissutaannik atuarsinnaassasutit isumaqatigiinniuteqarsinnaassasutillu aamma isumaqatigiissutsinik malinnaaffiginninnissamut qulakkeerinnissinnaassasutit.
∙Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.
Peqataatitserusuttuullutit aqutseriaaseqarputit, atugarissaarnissamut suliatigullu ineriartornissamut sinaakkusiisarlutit. Peqatigalugulu attaveqarsinnaassuseqarluarputit pilersaarutinillu pisariusunik paasissutissiillaqqissuullutit, taamaaliornikkut sulisunut suleqatigisartakkanullu ingerlanneqariaannanngorlugit paasinarsisillugillu.
Qarasaasialerinermut immikkoortortaq pillugu:
Qarasaasialerinermut immikkoortortamut nutaajukannersumut sisamat missaaniittunik sulisulimmut siuttuussaatit. Immikkoortortaq suleriaatsinik nutaalianik pilersitsinissamut aamma Kommuneqarfik Sermersuumi tegnologiip tungaatigut ineriartornermik nukittorsaanermik pingaarnertut suliaqartuuvoq.
Aaqqissuussaanermi immikkoortortaqarfik Suliffeqarfiup iluani Kiffartuussivimmiippoq, vicekommunaldirektørilu Marie Fleischer qaninnertut pisortaralugu. Atorfiup malitsigaa, Kommuneqarfik Sermersuup digitaleqarnikkut siunissaa suliffeqarfimmillu siunissami unammilligassanut piareersimasumik pilersitsinissamut sunniisinnaaneq.
Pineqaatissinneqarsimannginnermut uppernarsaat:
Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.
Atorfinititsineq qaammatini pingasuni misiliutitaqassaaq.
Inissaq:
Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfineqqarnermi sulisutut ataavartumik initaarnissamut innersuussisoqarsinnaanngippat, sulisumut utaqqiisaasumik ineqartinneqarsinnaasoq inimik vakantboligmik neqeroorfigineqarsinnaavoq, siuliani taaneqartoq naapertorlugu ineqarnermut, atuinermut il akiliuteqartoqartassaaq. Ineqarnermut atuinermullu akiliutigineqartartut pillugit annertunerusumik paasisaqarusukkuit www.iserit.gl qimerloorneqarsinnaavoq.
Sulilernissamut piffissaliussaq sulisutut ataavartumik initaarnissamut neqeroortoqarnissaa qaqugukkut pissanersoq apeqqutaajumaarpoq. Inatsisit atuuttut tunngavigalugit sulilernissamut atatillugu angalasoqassappat angalaneq akilerneqassaaq aammalu pisattat tikinnissaannut akiliunneqartussaalluni.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Vicekommunaldirektør Marie Fleischer, oqarasuaat +299 36 70 02 imaluunniit e-mail: mafl@sermersooq.gl
Qinnuteqaat:
Qinnuteqaat qulequtserlugu Atorfiup ilisarnaataa 1305-24-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: januaarip 24.-at, 2025