Qanoruumi Aaqqissuisoq
KNR soqutiginnilluarluni siumukartitsiuartumillu sulisinnaasumik 1. April 2025 erseqqinnerusumilluunniit isumaqatigiissuteqareernikkut sulilersussamik Qanoruumik aaqqissuisussarsiorpoq.
Kalaallit Nunaanni siunissami tusagassiisarnissamik ilusilersueqataarusuppit?
Aaqqissuisussarsiorpugut makkunannga piginnaanilimmik:
- Tusagassiortutut assingusumilluunniit ilinniarsimasoq
- Suliaminut tunniusimasoq, nikerartumik naleqqussarsinnaassusilik isumagissaartuartorlu
- Pissutsinik apeqqusiisinnaassusilik
- Pisortatut aqutsinermik TV-kullu tusgassiinermik misilittagaqarluartoq
- Kalaallisut qallunaatullu oqalussinnaallunilu allassinnaasoq
Uagut pilluta:
Qanorooq ullut tamaasa TV-kut nutaarsiassiisarpoq sapaatip-akunneranullu ataasiarluni eqikkaasumik minutsit 30-t missaanni DR-mut aallakaatitassiortarluni.
Nutaarsiassat pitsaanerpaat, pingaarnerpaat eqqornepaallu saqqumminnissaat pingaartilluinnarparput, TV-kullu oqariartuuteqariaatsit nutaaliaasut atorlugit saqqummertarluta. Aaqqissuisutut aqutseqatigiinnut aaqqissuisunik marlunnik inuttaqartunut ilaalissaatit, ataatsimoorlusilu tamatigut pitsaassuseqarluartumik saqqummiinissaq qularnaassavarsi. Aammattaaq illit nammineerlutit aallakaatitassiortarnissat merserissanngilat.
Ineqarneq:
Atorfinnut atatillugu inissaqartitsisoqanngilaq. Qinnuteqartut atorfimminnut atatillugu ineqartinneqareersut imaluunniit kommunimit Namminersorlutilluunniit Oqartussanit pigineqartumik ineqareersut, malittarisassat atuuttut naapertorlugit atorfimmut atatillugu inigisartik najugaqarfigiinnarsinnaavaat
Atorfimmut atatillugu inigisaq, atorfimmut atavoq, taamaammallu atorfeqarunnaarnermi qimanneqartussaalluni.
Aningaasarsiatigut atorfinitsitaanermilu atugassarititaasut
Namminersorlutik Oqartussat aamma Tusagassiunermik suliallit Peqatigiiffiata/Dansk Journalistforbundip akornanni isumaqatigiissutit naapertorlugit inissisimassapput.
Atorfininnermi suliunnaarnermilu akiliunneqarluni angalaneq nuunnermilu pisattat angallannerat malittarisassat atuuttut naapertorlugit pissapput.
Atorfik pillugu paasissutissat erseqqinnerusut piniarneqarsinnaapput Pipaluk Høegh
+299 36 46 38, irj@knr.gl imaluunniit Nutaarsiassaqarfimmi pisortaq Irene Jeppson
+299 36 45 58, bna@knr.gl. saaffigalugit.
Qinnuteqaammut ilanngunneqassapput CV aamma ilinniarsimanermut allagartat aammalu siornatigut suliffigisimasanut takussutissat.
ulloq qinnuteqarfissaq kingulleq 14. februar 2025.
KNR aamma Nuuk Illoqarfia pillugu
Kalaallit Nunaata Radioa “KNR” – Kalaallit Nunaanni nuna tamakkerlugu tamanut tusagassiivik – pilersinneqarpoq 1958-imi taamanimiillu nunami tusagassiuteqarnikkut qitiulluinnarluni inissisimajuarluni.
KNR Kalaallit Nunaanni illoqarfimmi pingaarnermi, Nuummi 23.994-it missaannik inoqartumi, inissisimavoq. Nuuk illoqarfiuvoq uummaarissoq, atortorissaarutit nutaaliaalluinnartut pinngortitarsuullu naliitsup akuleriiffigisaat. Maani niuertarfiit alutornartut alakkarterneqarsinnaapput, kulturip illorsua Katuaq isersimaarfigineqarsinnaavoq, katersugaasivimmi eqqumiitsuliat alutorsaatigineqarsinnaallutik illoqarfiulluunniit filmertarfiani filmimik isiginnaartoqarsinnaalluni.
Pinngortitaq avatangiiserisaq Nuummi inuunermut ilaalluinnarpoq. Illoqarfik qaqqarsuarnik kangerlunnillu qinngortuunik avatangiiseqarpoq, ukiullu kaajallakkiartortarnera ersarissumik malunnaateqartarluni – misigisaq kalaallinik nunamut atassuteqalersitsisoq. Ilutigisaanik Nuummi sutorniartarfiit eqqissisimaarfiusinnaapput kissartumik kaffisorfiullutik mamarluinnartunilluunniit neriffiullutik, illoqarfimmilu inooriaaseq inuttut kialaarnermik allanngujuissutsimillu ilisarnaquteqarluni. Nuuk illoqarfiuvoq ileqqutoqqat nutaaliornerullu naapiffigisaat, timimut tarnimullu uummaarinnartumik.”
Qinnuteqarnissamut killissarititaasoq: februaarip 14.-at, 2025