Nuummi Kammagiinni tullersorti
Suliffeqarnermut Isumaginninnermullu Ingerlatsivimmi Innarluutilinnut aamma Tarnikkut nappaatilinnut immikkoortoqarfik Nuummi Kammagiinni tullersortimik pissarsiorpoq
Kammagiit pingasunik immikkoortortaqarpoq. Sammisassaqartitsivik, café oqilisaassivillu. Sulisut katillugit aqqaniliupput.
Sammisassaqartitsivik aamma café innuttaasunut innarluutilinnut aammalu qaratsakkut eqqarsartaatsikkullu nappaatilinnut immikkoortuupput.
Oqilisaassivik innuttaasunut timimikkut tarnimikkullu piginnaasakillisimasunut neqeroorutaavoq nutaaq. Oqilisaassisarfik Sammisassaqartitsivimmi Kammagiinni inissisimavoq, ulloq unnuarlu ammasarpoq, weekendtillu allortarlugit matoqqasarluni. Innuttaasut qanigisaasut paaqqutarinnittuusut oqilisaallugit utaqqiissaasumik paaqqutarineqarnissaminnik pisariaqartitsisut sullinneqartarput.
Tullersortitut aqutsisoq qanimut suleqatigissavat taassumalu peqannginnerani illit aqutsisumut paarlattaasassaatit immikkoortoqarfimmi aqutsisut allat tapersersortigalugit.
Suliassat:
∙Aqutsisoq qanimut suleqatigalugu aqutsinermik ingerlatsinermillu suliassat
∙Sumiiffimmik toqqissisimanartumik nuannersumillu, innuttaasut ataasiakkaat isumassorneqartarfissaannik paasineqarsinnaaffissaannillu pilersitsinissamut najoqqutassioqataaneq
∙Suliassaqarfiit assigiinngitsut akornanni suleqatigiinnikkut piginnaasareriikkanik atuutsitsiinnarneq nukittorsaanerlu
∙Suliassat allanngorarsinnaasut piareersimaffigisinissai.
∙Sap. akun. 40 tiimit suliffik, suliffiit nalinginnaasumik nal ak. 7-16 iluanni.
∙Aqutsisorlu paarlakaalluni vagtiusarneq (rådighedsvagt)
Ilinnut naatsorsuutigineqartut:
∙Aqutsisoq suleqatigalugu sulisunut ersarissumik assigiimmik anguniagaqarsinnaasutit
∙Innuttaasumut allannguineq pingaaruteqartoq pilersinneqarniassammat, ineriartorusussuseqartutit
∙Suliffeqarfimmi ilisimasanik avitseqatigiiffiusumik, suleqatigiiffiusumik oqaloqatigiiffiusumillu kulturilimmi sulinissamut kajumissuseqartutit
∙Naleqqussarsinnaassasutit, ulluinnarnilu naatsorsuutaanngitsumik pisoqarfiusumi sulineq nuannaralugu
∙Suleqatitaatit peqatigalugit innuttaasunut Kammagiinni toqqissisimanartumik aalajaatsumillu pilersitsinissannut sapinngitsutit
∙Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.
Neqeroorutigissavagut:
∙Suleqatigiilluarnermik kiisalu suliatigut inuttullu ineriartornissamik pingaartitsisoq
∙Innuttaasunut uatsinnik pisariaqartitsisunut allanngueqataanissamut periarfissalik
∙Suliffiup pitsaasumik avatangiiseqarnissaanik pingaartitsiviusoq
∙Sunniuteqaqataaffiginissaannut periarfissaq
Uagut pilluta:
Innarluutilinnut aamma Tarnikkut nappaatilinnut immikkoortoqarfik Immikkoortoqarfiuvoq arfineq-pingasunik najugaqatigiiffeqartoq, najugaqatigiiffiit allat tallimat, sammisassaqartitsinermut ataatsimooqateqartitsinissamullu neqeroorutit marluk kiisalu tapersersorteqarfinnut pingasut Nuummi, Tasiilami Paamiunilu agguataarsimasut. Ineriartortitsinermik annertuumik ilaatigut sulisunik nutaanik sukumiisumik ilitsersuussisoqartarnissaanik, ingerlaavartumik siunersiuisoqartarnissanik suliatigullu ataatsimoorfeqarnissaanik imaqartumik ingerlatsivugut. Immikkoortortap ineriartornera tulluusimaarutigaarput
Soqutiginnilersimaguit sulilu paasisaqarusullutit, attaveqarfiginissatsinnut tikilluaqqusaavutit.
Pineqaatissinneqarsimannginnermut uppernarsaat:
Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.
Atorfinititsineq qaammatini pingasuni misiliutitaqassaaq.
Naatsorsuutigaarput atorfininnissamut oqaloqateqassalluta sap.ak. 10-mi.
Inissaq:
Atorfininnermut atatillugu inissiamik innersuussisoqarsinnaanngilaq.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Aqutsisoq Aviaaja Olsen, oqarasuaat +299 54 26 75 imaluunniit e-mail: avol@sermersooq.gl imaluunniit Driftsleder Malina Andersen, oqarasuaat +299 482331 imaluunniit e-mail: mlna@sermersooq.gl
Qinnuteqaat:
Qinnuteqaat qulequtserlugu Atorfiup ilisarnaataa 142-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: marsip 3.-at, 2025