Nuummi Inuttalersuinermut immikkoortortaqarfimmi Imarsiortunut sulisoqarnermi siunnersortinngorit
Imarsiornermik suliaqarfik soqutigisariviuk imaluunniit sulisoqarnermut tunngasunik suliaqarneq misilittagaqarfigiviuk? Aaqqissuulluakkamik suleriaaseqarnissaq ataatsimullu isiginninnissaq ulluinnarni sulinermut ilaatillugit suliassanik soqutiginartunik allanngorartunillu suliaqarnissat pilerinartippiuk? Taamaappat illit Royal Arctic Linemi Inuttalersuinermut immikkoortortaqarfimmi suleqatitaarerusuppatsigit! Inuttalersuisarnermi aamma umiarsuarni inuttat sulisoqarnikkut sullinneqartarnerini allanngueqataanissannut periarfissaqassaatit – Nuummi sullivik immikkuullarissoq suleqataaffigalugu.
Kikkuuvugut?
Royal Arctic Line niuffagiutinik qulinik ilaasartaammillu ataatsimik umiarsuaateqarpoq.Inuttalersuinermut immikkoortortaqarfik Nuummiittoq inuttalersuisarnerup pitsaasumik ingerlanneqarnissaanut sulisuttalu imarsiortut akornanni atugarissaartoqarnissaanut qitiusumik inissisimavoq. Aammattaaq ilinniartoqarnermut aaqqissuussinerput aqqutigalugu imarsiornermi sulisussat kinguaariit tullinnguuttut ilinniagaqartinnissaat ineriartortinnissaallu pimoorullugu ukkataraarput. Tamannalu umiarsuarni aqutsisut aamma Kalaallit Nunaanni avataanilu ilinniartoqarfiit qanittumik suleqatigalugit ingerlanneqarpoq.
Ilinnut neqeroorutigisinnaasagut suuppat?
Suliffik soqutiginartoq ulluinnarni assigiinngiiaartunik suliassaqarfiusoq suleqatigiillu nukittuut pingasunik inuttallit suleqataaffigilissavatit. Sulisoqarnermut tunngasunik suliaqarnerup aamma imarsiornermik suliaqarfiup iluanni piginnaaneqarfigisavit ineriartortinnissaannut tassani periarfissaqassaatit.
Atorfininnerup kingorna umiarsuaatitta ilaanni piffissami sivisunngitsumi angalaqataanissannut periarfissaqassaatit. Tamanna umiarsuarmi inuunerup immikkuullarissumik paasisaqarfiginissaanut periarfissiissaaq - misigisarlu taanna suliffiup imarisaanik nalissaqanngitsumik paasisaqarfigissavat.
Suliassatit pingaarnerit tassaapput:
• Umiarsuaatileqatigiiffiup oqartussaasullu piumasaqaataannut naapertuuttumik Umiarsuaatileqatigiiffiup umiarsuaataanik inuttalersuisarnerup eqqortumik ingerlanneqarnissaanik qulakkeerinninnissaq.
• Ilitsersuutinik suleriaasissallu nassuiaataannik suliaqarneq.
• Sulisoqarnermut tunngasunik suliaqarneq, soorlu atugarissaarnissaq, sulisunik ineriartortitsineq aamma suliffiup iluani suleriaatsinik pitsanngorsaaneq.
• Umiarsuaatileqatigiiffiup umiarsuaataanit saaffiginnissutinik sulisoqarnermut tunngasunik suliaqarneq
• Pikkorissarnissanut ingerlaavartumik nalunaartoqartarnissaanik qulakkeerinninneq
Kinaavit?
Suleqatissatsinnik aaqqiissutissarsiullaqqissumik suliassanillu siuariartortitsillaqqissumik pissarsiorpugut. Aaqqissuulluakkamik suleriaaseqarputit amerlasuunillu ataatsikkut suliaqaraluarlutit ataatsimut isiginnissinnaalluarlutit.
Taamatuttaarlu:
• Sulisoqarnermut tunngasunik suliaqarneq sulisoqarnikkullu aqutsinerup iluani misilittagaqarputit.
• Sullissillaqqissuussaatit, uummaarissuullutit, kajumilersitsisuullutit inuppalaartuullutillu.
• It-systeminik ingerlatseriaatsinillu suliaqarneq piginnaaneqarfigissavat
• Kalaallit, danskit tuluillu oqaasii piginnaasaqarfigilluassavatit
Neqeroorutigaagut:
• Suliffeqarfik allanngorarfiusoq tunniusimasunik misilittagalinnillu suleqateqarfiullunilu soqutiginartunik unammilligassaqarfiusoq.
• Sulinermi avatangiisit pitsaasut akissarsialluni piginnaasannut naapertuuttut.
• Inuttut suliatigullu ineriartornissamut periarfissaqarneq.
Unammilligassamut piareersimavit?
Atorfik pillugu paasisaqarnerorusukkuit General Manager CREW & HR Hans Peter Poulsen saaffigisinnaavat uunga sianerlutit +299 34 91 80 imaluunniit uunga allallutit hap@ral.gl.
Qinnuteqaatinik e-mailikkoortunik suliarineq ajorpagut.
Atorfininneq: Sapinngisamik piaarnerpaamik, eqqortorli atorfinitsinnissaa salliutinneqassaaq
Qinnuteqaatit: Februaarip 14-iani 2025
Oqaloqatiginninnerit: Oqaloqatiginninnerit ingerlaavartumik ingerlanneqassapput.