Nunatta Katersugaasivia Allagaateqarfialu pingasunik allagaatilerisussarsiorpoq
Oqaluttuarisaanermut oqaluttuarisaanitsinnullu tunngasunik soqutigisaqarpit? Illiunerpa Kalaallit Nunaata ilisimaneqanngitsortaanik ilisimasaqalersitsisussaq? Taamaappat immaqa illiuvoq NKA-mi allagaatilerisunngortussaq.
Allagaatilerisutut oqaluttuarisaanermut tunngasunik immikkorluinnaq ittunik suliaqarnissannut allagaatinillu oqaluttuarisaanermi pingaarutilinnik katersuinissamut, aaqqissuinissamut, toqqortuinissamut nalunaarsuinissamullu imaluunniit allaffissornikkut inatsisitigulluunniit innuttaasunut oqartussanullu pingaarutilinnik toqqortuinissamut periarfissaqarputit.
· Allagaatinik pisortat oqartussaasuineersunik suliffeqarfiutaanneersunillu suliaqarnermi iliuusissanik ineriartortitsineq atortussanngortitsinerlu.
· Pisortat suliffeqarfiutaannit inuinnarnillu tunniunneqartunik tigusineq, passussineq aaqqissuinerlu.
· Ilisimatitsissusiorneq ilitsersuusiornerlu.
· Pisortat suliffeqarfiutaanni oqartussaasuinilu toqqortaatinik nalunaarsuisarnermik toqqorsiveqarnermillu nakkutilliineq.
· Toqqorsisarnermut kasiiliisarnermullu pilersaarusiortarnerit.
· Pisortat suliffeqarfiutaannik oqartussaasuinillu siunnersuineq aamma toqqorsineq, allagaatillu pillugit saaffiginnittoqartillugu akissuteqartarneq.
Allagaatilerisuttaaq suliaqarfimminni ineriartornissaat eqqarsaatigalugu allagaateqarfiup toqqortaataanik aalajangersimasumut tunngassutilinnik immikkut akisussaaffilerneqassapput.
Akisussaaffiit taakku sammisanut pingasunut immikkoortuligaapput:
· Inuussutissarsiorneq atortulersuutillu
· Kulturi ilinniartitaanerlu
· Kalaallit Nunaanni qitiusumik allaffeqarfik kommunillu
Immikkut akisussaaffigisat makkuninnga suliaqarfiusinnaapput:
· ilisimatusartunut allanullu allagaateqarfiup toqqortaataanik allagaatilerisup akisussaaffigisaaniittunik atuerusuttunut ilitsersuineq
· toqqortaatit ilisimatusarfigineqartullu pillugit paasititsiniaaneq, matumunnga ilanngullugu NKA-mi toqqortaatilerisunik nakkutilliisunillu suleqateqarluni paasititsiniutigalugu angisuunik suliaqartarneq
· allagaateqarfiup immikkoortortaata Sanaartukkanut Titartagaateqarfiup toqqortaataanut allagaatinullu piumaneqartunut tunngatillugu saaffiginnittunik sullissineq – ilaatigut titartakkanik nalunaarusianillu teknikkimut tunngassuteqartunik sullissanit assigiinngitsuneersunik kopiiliornermik digitaliseriinermillu ilaqartoq,soorlu teknikkikkut ingerlatsivinneersunik, ingeniørit entreprenørillu suliffeqarfiineersunik aamma inuinnarneersunik.
Ujartugarput tassaavoq ilittut:
· Inuiaqatigiit Kalaallit Nunaannittut, Kalaallit Nunaata oqaluttuassartaa kalaallillu kulturiat pillugit ilisimasaqarluartoq.
· Minnerpaamik BA-tut assingusumilluunniit qaffasissusilimmik humanismemut inuiaqatigiilerinermilluunniit ilisimatusarnermut tunngassuteqartumik ilinniagaqarsimasoq.
· Kalaallisut oqaasilik, naqitatigut oqalunnikkullu qallunaat tuluillu oqaasiinik atuisinnaasoq.
· Pisortatigut aqutsinermik inuiaqatigiinnilu pissutsinik sungiussisimasoq, pingaartumik pisortatigut aqutsinermik.
Tamakkua saniatigut kissaatigaarput qinnuteqartoq:
· Pisortanut tunngasunik sulinermik sullissinermillu misilittagaqassasoq.
· Nalunaarsuinermik toqqortuinermillu misilittagaqassasoq.
· Allagaateqarfeqarneq pillugu inatsimmik ilisimasaqassasoq aalajangersakkallu allagaateqarfeqarneq pillugu inatsimmiittut inatsisinillu attuumassuteqartuni allaniittut, soorlu pisortat ingerlatsinerat pillugu paasitinneqarsinnaatitaaneq pillugu inatsimmiittut, paasissutissat inunnut tunngasut pillugit inatsimmiittut allaniittullu, naapertorlugit sulisinnaassasoq.
· Namminersorsinnaassasoq suleqateqallaqqissuullunilu.
· Allagaatinik allagaatilerinermillu soqutigisaqassasoq, matumunnga ilanngullugu paasissutissanik ujarlernermik.
· Timi atorlugu sulisinnaassasoq. · Paasisaqarusuttuussasoq nutaanillu ilikkagaqarusuttuulluni.
Neqerootigaavut:
· Suliffeqarfimmi allanngorartunik suliaqarfiusumi sulineq pissanganartoq unammilligassaqarfiusorlu.
· Suliffeqarfimmi anginngitsumi pissanganartunilli suliassaqarfiusumi suliatigut ineriartornissamut periarfissaqarneq.
· Suliffeqarfik nammineq suleriaasissiorfiusinnaasoq ataatsimullu suleriaasissiorfiusinnaasoq.
· Suliffeqarfik pikkorissunik suleqateqarfiusoq.
Allagaateqarfiup pisortaa Vivi Noahsen telefonikkut 362336-mut emailikkulluunniit vivi@arkiv.gl-imut attavigalugu paasissutissanik allanik paasiniaasoqarsinnaavoq.
Nunatta Allagaateqarfia pillugu
Nunatta Allagaateqarfia Nunatta Katersugaasivia Allagaateqarfialu (NKA) ilagaa. Marlunnik immikkoortortaqarpoq, Nunatta Allagaateqarfia Ilimmarfimmiilluni Sanaartukkanullu Titartagaateqarfik Paassaasivik 10-miilluni
Allagaateqarfimmi atorfillit arfinilinnut-arfineq-marlunnut naatsorsuussaapput. Taakkualu saniatigut ataatsimik-marlunnik ilinniartunik ikiortaasoqartarpoq. Nunatta Allagaateqarfia nunatsinni allagaateqarfiusuni kisiartaavoq nunatsinniittunillu tamanit toqqorsiviulluni.
NKA pillugu paasissutissat allat nittartakkami nanineqarsinnaapput: www.nka.gl
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job