Nunamut Namminermut Immikkoortortaqarfik – Immikkoortortaqarfimmi pisortaq
Nunamut Namminermut Immikkoortortaqarfik – Immikkoortortaqarfimmi pisortaq
Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik misilittagalimmik pimoorussisumillu Nunamut Namminermut Immikkoortortaqarfimmi pisortassasiorpoq, assigiinngitsunik amerlasuunik akisussaaffeqartoq. Immikkoortortaqarfimmi pisortatut aqutsisoqatigiinni qitiusutut ilaalissaatit toqqaannartumillu naalakkersuisoqarfimmi pisortaanermut nalunaartassallutit. Naalakkersuisoqarfik 35-t missaanni sulisoqarpoq, suleqatigiinneq suliassamullu pikkorissuuneq pingaartinneqarluni. Ammasuuneq eqaassuserlu suleriaaserineqarpoq, naalakkersuisoqarfiup suliassaanik kikkut tamarmik isiginneriaatsinik nutaanik aaqqiissutissanillu nutaaliornissamut inissaqartitsisoq.
Nunamut Namminermut Immikkoortortaqarfik
Nunamut Namminermut Immikkoortortaqarfiup Naalakkersuisut nunamut namminermut politikkiannik ulluinnarni aqutsineq piviusunngortitsinerlu isumagisaraa. Immikkoortortaqarfik assigiinngeqisunik suliassaqarpoq, nunamut namminermut suliassaqarfimmi ineriartortitsinermiit aamma politikkikkut isummernissanut tunngavissianik suliaqarnermiit kommuninik nakkutilliinermut allattoqarfittullu isumaginninnermut. Maannakkut immikkut sammineqarpoq kommunit aaqqissuussaanerat qanimullu oqartussaaqataaneq, aamma Inatsisartunut kommuninullu qinersinermut qalliartortunut piareersarnerit.
Immikkoortortaqarfimmi suliassanut ilaapput aqutsisuni sulisut aamma Nunamut Namminermut Naalakkersuisumik kiisalu naalakkersuisoqarfimmi pisortaanermik sullissinissaq. Immikkoortortaqarfimmi pisortap saniatigut immikkoortortaqarfimmi sisamanik sulisoqarpoq: siunnersortit pisortaat, AC-fuldmægtig, fuldmægtig aamma inatsisileritooq, taanna naalakkersuisoqarfiup inatsisilerinermut immikkoortortaqarfianiilluni.
Atuuffinnut ilaapput immikkoortortaqarfimmi sulisunik aqutsineq, suliniutinik assigiinngitsunik siuarsaaneq kiisalu Naalakkersuisumik sullissineq. Immikkoortortaqarfik mikisuummat naatsorsuutigineqarpoq, illit nammineq suliassanik suliarinnittarnermut peqataassasutit aamma nammineq suliniutit pillugit siuarsarnissaannut akisussaaffeqassasutit.
Illit pillutit
Nangitsillutit ilinniagaqarputit kiisalu suliffimmi politikkikkut aqunneqartumi ukiuni arlalinni misilittagaqarlutik. Iluaqutigissavat kommunit aqunneqarnerannut tunngasut pillugit ilisimaarinninnissat. Aqutsisutut misilittagalittut pitsaasumik avatangiiseqarnissaq suleqatillu pingaartinnissaat salliutippatit.
Kommuninik nakkutilliinermi amerlasuutigut inatsisilerinermut aningaasaqarnermullu suliassat tunngassuteqartarmata, inatsisilerinermut imaluunniit aningaasaqarnermut tunuliaquteqarnissaq iluaqutaassaaq. Suleqatigilluarneqarsinnaaneq atorfimmi iluatsitsinissamut pingaaruteqarluinnarpoq, suliassat kommuninik aamma naalakkersuisoqarfinnik allanik qanimut kinguneqartussamillu oqaloqatigiittarnissaq piumasaqaataammat.
Kalaallisut danskisullu oqalussinnaaguit iluaqutigissavat.
Paasissutissat qinnuteqarnermut tunngasut
Qinnuteqarnissamut piffissaliussaq tassaavoq ulloq 5. december 2024 aamma ingerlaavartumik oqaloqatigiittoqartassaaq. Kissaatigaarput immikkoortortaqarfimmi pisortaq nutaaq piaarnerpaamik sulilersinnaasoq, kisianni qinnuteqartoq eqqortoq utaqqisinnaallutigu.
Atorfik pillugu annertunerusumik paasisaqarniaruit attaveqarfigiuk naalakkersuisoqarfimmi pisortaaneq Martha Abelsen, oqarasuaat 556139, imaluunniit email abma@nanoq.gl.
Akissarsiat atorfeqartitaanermilu atugassarititaasut:
Atorfik akissaateqarfimmi LR 38-mi maanna inissisimavoq.
Akissarsiat sinaakkutaanni 38-mi akissaatit immikkoortui aalajangersimasut ilanngullugit akissarsititsisoqartassaaq, 1. april 2022-mi qaammammut 56.910 kr-niupput ukiumullu 682.930 kr-niullutik.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.
Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.
Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.