NunaGreen A/S Qeqertarsuup tunuani sanaartornissamut suliniummi aqutsisussarsiorpoq

”Suliniutinik aqutsinermik misilittagaqarlutillu uagutsituulli mingutsitsinngitsumik ingerlatsilernissaq kissaatigaajuk?”

Suliffeqarfimmi nukissamik mingutsitsinngitsumik, piujuartitsinermik, nunani tamalaani periarfissanik kiisalu sanaartukkanik annertuunik ukkatarinniffiusumi sulerusuppit, taava una ilinnut periarfissatsialaasinnaavoq! 

Atorfik

Sanaartornissanut annertuunut suliniummi aqutsisussamik pikkorissumik qaammatit marluk pingasulluunniit iluanni atorfinissinnaasumik sulisussarsiorpugut.

NunaGreenimi suliniutinut aqutsisutut Kalaallit Nunaanni nukissiorfinnik nukissamik piujuartitsisumik pilersuisunik sanaartornissamut qitiusutut inissisimasinnaavutit. Kalaallit Nunaanni sanaartukkat annersaasa ilaat, matumani Qasgiannguani Aasiannilu Qeqertarsuup tunuani inissisimasuni erngup nukinganik nukissiorfimmik sanaartorneq suliffigissavatit. Suleqatigut misilittagallit maanna sanaartugassagut pillugit suliarinnittussarsiuussinernik suliaqartut suleqatigissavatit.

Suliassat pingaarnerit

• Suliniutinik aqutsineq: Ulluinnarni suliniutinik aqutsineq sanaartukkatsinnillu aqutsineq, kiisalu suliniutinik aqutsinermi suleqatinik avitseqateqarneq.
• Isumaqatigiissutinik isumaqatigiinniarneq: Pilersuisut sanaartortartullu isumaqatiginiarneri, atugassarititaasut pitsaasut qulakkeerlugillu suliniutip ingerlanerani isumaqatigiissutinik eqquutsitsinerup nakkutiginissaa.
• Nalorninartunik aqutsineq: suliniutini nalorninartuusinnaasut suussusersillugillu annikillisarnissaanut peerneqarnissaannullu periusissanik pilersaarusiorneq.
• Oqartussanik sullissineq: Oqartussanik suleqateqassaatit, najukkami nunamilu malittarisassat malinneqarnissaat qulakkiissavat suliniutinullu akuersissutit pisariaqartut pissarsiarissavatit.
• Avatangiiseq: Suliniutit tamarmik avatangiisinut inatsimmik eqquutsitsinissaat kiisalu suliniutit avatangiisinut sunniutaanni nalorninarsinnaasut annikinnerpaaffissaaniitinnissaat qulakkiissavat.
• Sullivimmi avatangiisit: Inatsisit malinneqarnissaat suliniutillu sullivimmi avatangiisini isumannaatsuni peqqinnartunilu naammassineqarnissaat qulakkiissavat. Tamanna sullivimmi avatangiisinut periutsit politikkillu atuutilersinnerisigut nakkutilliinikkullu qulakkiissavat.
• Nalunaaruteqarneq: Suliniutit killiffii pillugit nalunaarusiat, saqqummiinerit il.il. sanaartornermi ingerlatsisumoortut ataavartumik piareersartassavatit.

Piginnaasatit tunuliaqutillu

Sanaartornermi suliniutinik aqutsisutut, ajornanngippat nukissiuteqarnermi attavilersuuteqarnermilu, misilittagaqarluarnerit pingaartinneqarpoq. Sanaartornerit annertunerusut annertuulluunniit misilittagaqarfigigukkit iluaqutaassaaq.

Ilinniakkatigut ingeniøritut, suliffeqarfissuarni innaallagisserisutut, innaallagisserisutut, mistalitut, konstruktøritut assigisaanilluunniit tunuliaqutaqassaatit. Suliniutinik aqutsinermi ilinniakkamik akuerisaasumik ilinniarsimaguit iluaqutaalluinnassaaq.

Namminersorlutit sulisinnaassaatit, iliuuseqarsinnaallutillu suliassat suleqatillugu naammassisaqarnissaq siunertaralugu namminersuutigisinnaassavatit.

Sulininnut tunniusimaguit, attaveqarluarsinnaaguit kiisalu nammineq inuttut naleqatitatit NunaGreenip mingutsitsinngitsumik atuinissamik takorluugaanut naleqquttutut isigisinnaagukkit iluaqutaassaaq.

Isumaqatigiissutit tuluttut allanneqartarnissaat naatsorsuutigineqarpoq, taamaammat tuluttut oqalussinnaaneq allassinnaanerlu pikkoriffigissagitit piumasaqaataavoq.

Neqeroorutigaagut

Suliffeqarfimmi nukissamik ataavartumik mingutsitsinngitsumillu atuilernermi siuttuulersussamik ineriartortitsinermi atorfimmik pissanganartumik NunaGreen neqerooruteqarpoq. Sullivimmi avatangiisit peqqinnartut suleqatillu persuarsiorpalaanngitsut akornaniilissaatit. Atorfik qullersaqarfitsinni Nuummiittumi inissisimavoq (isumaqatigiinnikkut Qeqertarsuup tunuanut inissinneqarsinnaavoq) Allaffissornermilu ingerlatsisoq toqqaannartumik qullersarineqassaaq.

Apeqqutissaqaruit Sanaartornermi ingerlatsisoq Erlingur Leifsson oqarasuaammut +299 363652-imut sianerfigissallugu tikilluaqqusaavutit.

Qinnuteqaatit CV-talik mailikkut Sulisoqarnermut immikkoortortatsinnut nassiuguk: tek@nunagreen.gl.

Oqaloqatigiinnerit tulleriaarlugit ingerlanneqassapput.

NunaGreen A/S naatsumik oqaatigalugu

NunaGreen suliffeqarfiuvoq nutaajusoq nukissamillu ataavartumik mingutsitsinngitsumillu atuilernermi Kalaallit Nunaanni siuttunngornissarput anguniagaraarput. NunaGreenimi erngup nukinganik nukissiorfiit allinissaat sananeqarnissaallu, kiisalu nukissamik mingutsitsinngitsumik pilersuinissamut periarfissat allat ujartornissaat tunniusimalluta suliniutigaarput.

Kalaallit Nunaat nukissamik ataavartumik annertuumik peqarnermigut periarfissanik mingutsitsinngitsunik immikkuullarissunik neqerooruteqarnissaminut periarfissarpassuaqarpoq, anguniagaqarlunilu nutaaliornikkut inerisaanikkullu periarfissat taakku akisussaassusilimmik piujuartitsisumillu atorluarnissaat pingaarnertut anguniagaraarput. Erngup nukinga nukissarlu ataavartoq mingutsitsinngitsumik atuilernissami pingaaruteqarput.

NunaGreenip avatangiisinut sunniuteqarneq nutaaliaasoq pitsaasorlu, nunallu innuttaasuinut iluaqutaasoq pilersikkumavaa.