Nuna Tamakkerlugu Katsorsaavik Siunnersuisarfillu pinngorartitsillaqqissumik attaveqaqatigiinnermut sulisussarsiorpoq
Isumaginninnermi tunngasut anersaaqarfigaagit, innuttaasut tarnikkut atugarliortut allanngueqataanissamut akisussaaffigalugit, nuna tamakkerlugu katsorsaavik siunnersuisarfillu kalaallit nunaanni pilersinneranni peqataallutit?
AC-fuldmægtigissarsiorpugut attaveqarnermik piginnaasalik, atorfik Nuna Tamakkerlugu Katsorsaavik Siunnersuisarfissami inissisimavoq, siornatigut aqqa Inulerinermut immikkoortortaqarfik, Isumaginninnermi Aqutsisoqarfiup ataani. Inulerinermut immikkoortortaqarfiup ilaatigut suliarivaat tarnikkut katsorsaanerit taamaasilluni toqqaannartumik innuttaasunik sullissisarlutik, ilutigisaanik sinerissami kommunini isumaginninnermik suliallit qanimut suleqatigineqartarlutik. Inulerinermut immikkoortortaqarfimmit tarnikkut katsorsaanikkullu sullissinerit ilaatigut makkuupput; inersimasunut katsorsaasut angalasartut, soorlu inersimasut kinguaassiuutimikkut atornerlunneqarsimallutik kingunerlutitsisimasunik sullissisarput, meeqqanut katsorsaasut angalasartut kiisalu Klinik Killiliisa, tassani inuit meeqqat aamma inuusuttut kinguaassiuutaasigut kanngutsaattuliorfiginnillutik pissusilersortartut, imaluunniit kanngutsaatsuliornissaminnut eqqarsaatersortartut katsorsarneqartarput.
Suliassat tamatigoortuupput, aamma suliassaqarfiit assigiinngitsut ataatsimoorlutik suleqatigiinnerisa akuuffigisarnissaat piumasaqaataavoq, kiisalu suliakkiutigineqartunut namminersorluni akisussaaffeqarsinnaaneq piumasaqaataalluni. Meeqqat, inuusuttut ilaqutariillu pillugit suliaqarfimmi sineriak tamakkerlugu pitsaaliuinikkut katsorsaanikkullu suliassat immikkoortortaqarfimmit ingerlanneqartarput, taamaalillunilu kommunini sulianik suliallit attaveqaqatiginerisigut suliaqarnissarput aamma pingaaruteqarluni, aammali najukkani inuiaqatigiit oqaloqatigisarnissaat pingaaruteqarluni.
Inulerinermut immikkoortortaqarfimmi attaveqaqatigiinnermik suliaqartutut illit immikkoortortaqarfimmi suliaqarfinni assigiinngitsuni sulisut pitsaaliuinermik katsorsaanermillu pingaarnertut suliallit suleqatigisassavatit. Atorfimmi suliffiup iluani kiisalu avataani attaveqaqatigiinnikkut suliassat ingerlaavartumik ineriariartortittarnissaat qitiutillugit suliassaasassapput. Immikkoortortaqarfik ilaatigut suleqatigalugu inuit attaveqaqatigiittarfiini aamma nittartakkami nutarterisassaatit, kiisalu paasissutissat ilaalu ilanngullugit ingerlaavartumik inerisartarlugit.
Sammisat nutaat sukkasuumik pulaffigisinnaasassavatit aamma eqinnaatsuussaatit, kiisalu suliffeqarfimmi suliassanik minnerusunik annertunerusunillu ataatsikkut ingerlatsiviusumi, ilaatigut ulluinnarni ulapaarfiusinnaasuni sulinermik nuannarisaqartuussaatit. Attaveqaqatigiinnermik sulialittut Kalaallit Nunaanni meeqqat aamma inuusuttut pillugit suliaqarfimmi immikkoortortaqarfimmi suliniutit ingerlanneqartut annertuumik akisussaaffeqarfigilissavatit, aamma suliniaqataaffiginissaannut periarfissaqalissaatit.
Pingaarnertut suliassatit tassaapput
- Meeqqanut, Inuusuttunut Ilaqutariinnullu Naalakkersuisoqarfik suleqatigalugu tusagassiassanik suliaqarneq ataqatigiissaarinerlu
- Tusagassiorfinnut nalunaarusiorneq aamma allakkiorneq
- Attaveqaqatigeeriaatsinik inerisaaneq
- Innuttaasunut immikkoortortaqarfimmi paasissutissiinikkut suliat pitsaassusaanik qulakkeerinninneq
- Nittartagassamut aamma inuit attaveqatigiittarfiinut akisussaaffeqarneq
- Sullitat assigiinngitsut siunnerfeqartumik attaveqaqatigisarnissaannik qulakkeerinninneq, matumani kommunit, innuttaasut aamma suliallit attuumassutillit allat ilanngullugit
- Innuttaasut paasiuminartumik paasissutissiivigineqarnissaannik qulakkeerinninneq
- Suliassat takkussuuttut
Illit piginnaasatit
- Attaveqaqatigiinnerup iluani ilinniarsimasuuvutit imaluunniit tassunga attuumassutilimmik ilinniarsimasuullutit
- Attaveqaqatigiinnikkut suliniutinik anginerusunik suliaqarnissamik nuannarisaqartuuvutit
- Innuttaasut pitsaasumik oqaloqatigineqartarnissaannut pitsaasunik isumassarsiaateqarputit
- Attaveqaqatigiinnermik suliaqarnissat uummateqarfigaat aamma oqaluttuat nuannersut oqaluttuarerusuttarlugit
- Tusagassiassanik aamma tusagassiorfinnut nalunaarutinik allanneq misilittagaqarfigaatit
- Sullarissuuvutit, tunniusimasuuvutit aamma ineriartortitsinissamik soqutigisaqartuullutit
- Inuiaqatigiinni kalaallit atugaat kulturiallu pillugit ilisimasaqarluartuuvutit
- Kalaallisut danskisullu marluinnik oqaaseqartuuvutit
- Aaqqissuulluakkamik suleriuseqarputit, suliaqarfiillu assigiinngitsut suleqatigiiffiini suleqataarusussuseqarlutit, minnerunngitsumik piffissap ilaani suliassarpassuarnik ataatsikkut suliaqarnissannut sapiissuseqartutit
Makkua neqeroorutigisinnaavavut
- Immikkoortortaqarfik ineriartupiloortoq suleqataaffigilissavat
- Suleqatigiit suliaminnut pikkorilluartut isumasioqatigisinnaasatit suleqatigilissavatit
- Suliffeqarfik kiffaanngissuseqarfiuvoq sulisullu pitsaasunik atugaqarnissaannik pingaartitsisuuvoq
- Atorfik suliatigut inuttullu ineriartornissamut periarfissagissaartoq
Qinnuteqarnissamut killiliussaq tassaavoq tallimanngorneq 11.Februar 2025. nal. 12.00 (Kalaallit Nunaanni nalunaaqutaq malillugu)
Atorfinitsitsinissamut oqaloqatiginninnerit tamatuma kinguninngua ingerlanneqarnissaat naatsorsuutigineqarpoq.
Ulloq atorfiniffissaq
1. Marts 2025 isumaqatigiissuteqarnikkulluunniit.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Piffissaq suliffiusussaq aallaaviusumik tassaavoq sapaatip akunneranut akunnerit 40-t. Piffiit ilaani angalangaatsiartarnissaq naatsorsuutigineqarsinnaavoq, Kalaallit Nunaata ilarujussuata takunissaanut periarfissaqalissaatit suliamillu ingerlatsisut assigiinngisitaaqisunik ulluinnaqartut naapittassallugit.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.
Paasissutissat sukumiinerusut
Atorfik pillugu paasisaqarnerorusukkuit immikkoortortaqarfimmi pisortaq Naja Lund Kielsen oqarasuaataanut uunga attaviginissaanut tikilluaqqusaavutit. +299 34 60 64 imaluunniit e-mailimut nalk@nanoq.gl
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job