Nukissiorfiit Kalaallit Nunaanni nukissiuuteqarnermut ingerlatseqatigiiffiannut pisortassarsiorneq
Nukimmik pilersuinermik suliffeqarfik Nukissiorfiit pisortassarsiorpoq
Kalaallit Nunaanni pisortat nukimmik pilersuinerat siuttuuffigerusuppiuk, Nukissiorfiillu pingaarnertut periusissiornikkut ingerlatsinerat piujuartitsinissaq tunngavigalugu ineriartortitsineq ukkataralugu aningaasaqarnikkut, ingerlatsinikkut ingerlatsinerullu naammassisaqarfiulluarnissaa pillugu pingaartitaat akisussaaffigalugu? Taakku tamaasa sulisut piginnaasaqarluartut Nukissiorfinnullu soqutigisaqartut siammasissut qanittumik suleqatigalugit isumagineqassapput.
Illit aqutsisutut piginnaasatit iluatsitsilluarnissamut aqqutissaapput. Taamaattumik tamakkiisumik isiginnittaaseqarputit takorluuisinnaassuseqarlutillu, siulersuisinnaavutit aqqutissiuussillutillu aammalu suliffeqarfiup periusissiaanik, kulturianik, aaqqissuussaaneranik, sulisuinik aqutsisuinillu ineriartortitseqqiisinnaallutit.
Nukissiornermut pisortatut Kalaallit Nunaanni illoqarfiit nunaqarfiillu innaallagissamik, imermik kiassarnermillu ulluinnarni pilersorneqarnerisa isumannaassusia qullersatut akisussaaffigissavat. Misilittakkatit, aammalu teknikkimut aningaasaqarnermullu paasisimanninnerit, Nukissiorfiit pitsaassutsimik pingaartitsilluni isumannaatsumillu ingerlatsilluni Kalaallit Nunaannut tamarmut pilersuisuunissaannik qulakkeerinneqataassapput.
Tamatumunngalu peqatigitillugu Naalakkersuisut suliassaqarfimmut anguniagaat iliuuseqarfigisussaassavat, aammalu ilaatigut erngup, anorip seqerngullu nukinginik ineriartortitsinerup siuarsarneqarnissaanut ingerlatsisut qitiusumik inissisimasut peqataatiinnarneqarnissaat suleqatiginissaallu kiisalu nukissiuteqarnikkut aaqqissuussinerup tamarmiusup pitsanngorsarneqarnissaa qulakkiissavat. Ineriartortitsinermik suliassat ilaat NunaGreen A/S-imit isumagisassatut naalakkersuinikkut aalajangigaapput, Nukissiorfiilli qanimut suleqatigalugit ingerlanneqartussaallutik.
Nukissiornermut pisortatut aningaasaqarnikkut ingerlatsinikkullu qajannaatsumik toqqammavissaqartitsinissaq ukkatariuassavat aaqqissuussaanermullu anguniakkatigullu ataatsimut isiginnissinnaassallutit Nukissiorfiit aaqqissuussaanertut ataatsimoortutut ineriartortillugit.
Nukissiutit ataavartut pisortat pilersuineranni sapinngisamik annertunerpaamik atorluarneqarnissaat Naalakkersuisunit anguniagaavoq.
Tamatumani ilaatigut pineqarput erngup, anorip seqerngullu nukingi kiisalu nukissiuuteqarnermut aaqqissuussinerup tamarmiusup teknikkikkut pitsanngorsarneqarnissaa. Tamatumunngalu atatillugu Nukissiorfinnut pingaarnertut suliassaq tassaavoq Tasiilap pilersorneqarneranut erngup nukinganik nukissiorfiup allilerneqarnissaanik Inatsisartut aalajangiinerannut sunniuteqarluartumik malitseqartitsinissaq qulakkiissallugu. Tamatumunngalu peqatigitillugu Nukissiorfiit NunaGreen A/S-imut, Nuummi erngup nukinganik nukissiorfiup allilerneqarnissaanut aamma Qasigiannguit Aasiaallu pilersorneqarnerinut erngup nukinganik nukissiorfimmik nutaamik sanaartornissamut pingaarnertut akisussaasumut ikiuutissaaq – pisortat nukimmik pilersuineranni nukissiutinik ataavartunik atuinerup 90 %-inngortinnissaa siunertaralugu.
Nukissiorfiit piffissaq tamakkerlugu 440-t missaannik sulisoqarpoq taakkulu illoqarfinnut nunaqarfinnullu agguataarsimapput. Nuummi qullersaqarfik, aqutsisut qullersat aamma allaffeqarfiup inissisimaffigisaat, 90-it missaannik sulisoqarpoq. Sulisut arlallit illoqarfinni immikkoortortaqarfinni sulisuupput.
Piginnaasassat
Aqutsinermik misilittagaqarneq: Uppernarsarneqarsinnaasumik aqutsisutut atuuffeqarnermik misilittagaqarneq, pilersuinermullu suliaqarfiup imaluunniit suliaqarfiit attuumassuteqartut iluanni misilittagaqaraanni iluaqutaassaaq
Piujuartitsinermut tunngatillugu pisinnaasaqarneq: Piujuartitsinerup aamma mingutsitsinngitsumut allanngoriartortitsinerup itinerusumik paasisimasaqarfiginerat, taakkulu suliffeqarfiup periusissiaanut ataqatigiississinnaallugit
Attaveqaqatigiinneq Isumaqatigiinniarnerlu: Attaveqaqatigiinnikkut isumaqatigiinniartarnikkullu piginnaasaqarluarneq, soqutigisaqartunik katitigaalluartunik isumaginnissinnaaneq misilittagaqarfigalugu
Kulturit assigiinngitsut misilittagaqarfigineri: Avatangiisini assigiinngitsunik kultureqarfiusuni sulinermik misilittagaqarneq; Kalaallit Nunaanni imaluunniit Issittumi nunani misilittagaqaraanni iluaqutaassaaq
Politikkimut paasisimasaqarneq: Politikkikkut atassuteqarfigisat akornanni sulisinnaaneq atassuteqarfigisanillu angusaqarfiusussanik pilersitsisinnaaneq
Inuttut Pissuserisat
Siunnerfilik Misissueqqissaartorlu: Periusissiornikkut misissueqqissaarnikkullu piginnaasaqarluinnartoq, piffissamut ungasinnerusumut pilersaarutinik ineriartortitsillunilu atulersitsisinnaasoq
Nutaaliorluni Eqqarsartaaseqartoq: Nutaaliorluni eqqarsartaaseqarneq periarfissallu ilanngussorfigineqartullu nutaat suussusersinissaat atorluarnissaallu piginnaasaqarfigalugu
Aalajangiisinnaassuseqartoq: Pissutsini katitigaalluartuni ersarissunik tunngavilersorluakkanillu aalajangiisinnaassuseqarneq
Kikkuuvugut
Nukissiorfiit suliffeqarfittut namminersortitatut ingerlanneqarput. Suliffeqarfik Namminersorlutik Oqartussani pisortat ingerlatsinerannut ilaavoq, maleruagassalli immikkut ittut malillugit naatsorsuutinik saqqummiussisussaalluni. Nukissiorfinni pisortaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortamut Natuk Lund Meriemut toqqaannartumik attaveqarpoq.
Nukissiorfiit pillugit paasissutissat amerlanerusut uani atuarneqarsinnaapput: www.nukissiorfiit.gl.
Neqeroorutigaarput
Kalaallit Nunaata nukimmik pilersuinermut suliffeqarfiani atorfik unammilligassaqarfiusoq soqutiginartorlu, inuttut suliatigullu ineriartornissamut periarfissaqartitsisoq. Atorfik Nuummi aalajangersimasumik inissisimavoq.
Kikkuuvugut
Nukissiorfiit suliffeqarfittut namminersortitatut ingerlanneqarput. Suliffeqarfik Namminersorlutik Oqartussani pisortat ingerlatsinerannut ilaavoq, maleruagassalli immikkut ittut malillugit naatsorsuutinik saqqummiussisussaalluni. Nukissiorfinni pisortaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortamut Natuk Lund Meriemut toqqaannartumik attaveqarpoq.
Nukissiorfiit pillugit paasissutissat amerlanerusut uani atuarneqarsinnaapput: www.nukissiorfiit.gl.
Neqeroorutigaarput
Kalaallit Nunaata nukimmik pilersuinermut suliffeqarfiani atorfik unammilligassaqarfiusoq soqutiginartorlu, inuttut suliatigullu ineriartornissamut periarfissaqartitsisoq. Atorfik Nuummi aalajangersimasumik inissisimavoq.
Atorfeqartitaanermi atugassarititaasut
Atorfik maannakkorpiaq akissaateqarfimmi 39/40-mi inissisimavoq.
Ukiunut sisamanut aalajangersimasumik sivisussusilerneqartumut allamilu atorfininnissamut qulakkeerinniffiunngitsumut akissarsiat 1. apriili 2022-mi qaammammut kr. 85.478-iupput soraarnerussutisianut akiliutit ilanngullugit (LR39).
Tamatumunnga ilanngunneqassaaq ukiumoortumik sulinngiffeqarnermi ajunngitsorsiassanik katersineq, ukiumoortumik sulinngiffeqarnermi angalanermut tapiissutit kiisalu ukiuni aalajangersimasuni atorfeqartitaanerup nalinginnaasumik atorunnaarnerani atorfeqarunnaarnermi aningaasat ukiuni aalajangersimasumik sivisussusilerneqartuni ukiut atorfeqarfigisat amerlaqataannik qaammammusiat amerlaqataat.
Akissarsiat "Pisortanut Ataatsimut Isumaqatigiissut” 20. oktobari 2020-meersoq malippaat.
Isumaqatigiissutini atugassarititaasut naapertorlugit atorfinitsitsisoqassaaq. Qinnuteqartorlu tjenestemanditut atorfeqareersimaguni Kalaallit Nunaanni pisortani tjenestemandit pillugit inatsit malillugu tjenestemanditut atugassarititaasut naapertorlugit atorfinitsitaasoqarsinnaavoq.
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat. Piffissaq suliffiusussaq tunngaviatigut sapaatit akunnerannut nalunaaquttap akunnerinik 40-nik sivisussuseqarpoq.
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Ineqarneq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunip inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il. apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumilluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.
Qinnuteqarfissap killinga
Ataasinngorneq 28. oktobari 2024
Soqutiginartippiuk?
Atorfik pillugu apeqqutissaqaruit Flies HR-imeersup Partner Dorthe Fliesip oqarasuaatikkut +299 583117-imut, +4560833117-imut imaluunniit e-mailikkut dorthe@flieshr.dk-mut attaveqarfiginissaanut tikilluaqqusaavutit.
Flies HR sulisussarsiornermik isumaginnittuuvoq, taamaammat saaffiginnissutit tamaasa tassunga ingerlateqquneqarput. Qinnuteqartunik piukkunnartunik oqaloqatiginninnissamut ingerlaavartumik aggersaasassaagut.
Atorfik pillugu allanik apeqqutissaqaruit Naalakkersuisoqarfimmi pisortaq Natuk Lund Meire natl@nanoq.gl-imut allaffigalugu saaffiginninnissamut tikilluaqqusaavutit.
Tusarfiginissat qilanaaraarput.
Suliffeqarfik
Nukissiorfiit pillugit paasissutissat amerlanerusut uani pissarsiarisinnaavatit: www.nukissiorfitt.gl