Naalagaaffinngornissamut immikkoortortaqarfik AC-fuldmægtigimik imaluunniit immikkut siunnersortimik pissarsiorpoq
Naalagaaffinngornissamut piareersaanermik aamma inatsit tunngaviusussamik suliaqarnermillu suliaqarusuppit? Nunatta siunissaa pillugu innuttaasut ilusilersueqataanerunissaat pillugu suleqataarusuppit? Naalagaaffinngornissaq pillugu pitsaanerpaamik piareersartoqarnerani qulaajaaqataallutillu nassuiaaqataarusuppit?
Taamaappat Naalagaaffinngornissamut Nunanullu Allanut Naalakkersuisoqarfiup Naalagaaffinngornissamut immikkoortortaqarfianut AC-fuldmægtigissatut imaluunniit immikkut siunnersortitut qinnuteqarsinnaavutit.
Suliassat
Naalagaaffinngornissamut Nunanullu Allanut Naalakkersuisoqarfik naalakkersuinikkut naalagaaffinngornissamut immikkoortortaqarfimmut akisussaasuuvoq. Naalagaaffinngornissamut Innuttaasut akuutinneqarnissaannik naalagaaffinngornissallu oqallisigineqarnissaata qulakkeernissaa immikkoortortaqarfimmi suliassaapput pingaarutillit. Naalagaaffinngornissamik anguniagaqarnerup innuttaasuni tamani ataatsimut anguniarneqarnissaa, aammalu innuttaasut piginneqataanissaat, naalagaaffinngornissallu tungaanut suliniutinut akisussaaqataasutut misiginissaat pingaaruteqarpoq. Suliassani allani pingaarutilik tassaavoq, pissutsit naalagaaffinngornissap angunissaanut attuumassutillit arlallit paasiniarnissaat, taakkununngalu siunissami paasissutissiiviusumik tunngaveqarluni tamatumunnga aalajangiinissap qulakkeerneqarnissaa ilaavoq.
Naalagaaffinngornissaq amerlasuunik sammisaqarfiuvoq: Inatsit tunngaviusussaq pillugu isumalioqatigiissitat isumaliutissiissutaannik innuttaasunut akuutitsineq, aningaasaqarneq, oqaluttuarisaaneq, kinaassuseqatiginneq, piorsarsimassuseq, imminut pilersorsinnaaneq, nunap avataanut attaveqarnerit, aaqqissuusseqqinnerit, inuiannut naalagaaffimmullu tunngatillugu inatsisilerineq, naalagaaffiit namminersortut akornanni suleqatigiinnerit allaasut ilusiligaanerat pillugu nunanit allanit misilittakkanik aallerneq il.il. Taamaattumik Ilinniagartuutut sulinerpit tamatigoortuunissaa, aammalu Namminersorlutik Oqartussani naalakkersuisoqarfinnik arlalinnik soqutigisaqaqatigiinnillu allanik suleqateqarluarnissat naatsorsuutigissavat.
Naalagaaffinngornissamut immikkoortortaqarfimmi Inatsit Tunngaviusussaq pillugu isumalioqatigiissitat isumaliutissiissutaannik innuttaasunik peqataatitsinissat aaqqissuullugillu akisussaaffigineqarput. Taamaattumik eqinnaatsumik takorluuisinnaassuseqartumillu innuttaasunik peqataatitsinermi akuutitsisinnaasumik, tunngaviusumillu inatsisissap ineriartortinnissaanut isumassarsiaqarlunilu tunniussisinnaasumik, immikkoortortaqarfimmi suleqatissarsiorpugut. Tamanna innuttaasunik attaveqarluarnermik, akuutitsilluni sammisaqartitsillunilu ingerlatsinermik suliassaqarfiussaq.
Suliffik pillugu
Naalagaaffinngornissamut Nunanullu allanut Naalakkersuisoqarfik 30-t missaannik sulisoqarpoq, immikkoortortanut arlalinnut Sinniisoqarfinnullu agguarneqarsimasunik, soorlu nunanut allanut politiki, issittoq, Illersornissaq upalungaarsimanerlu, nunanik allanik suleqateqarneq, ilisimatusarneq Naalagaaffinngornissarlu.
Naalakkersuisoqarfimmi pingaarnertut suliassaavoq Nunanut Allanut Naalagaaffinngornissamullu naalakkersuisumut siunnersuinissaq.
Naalagaaffinngornissamut immikkoortortaqarfimmi suliassaq pingaarneq tassaavoq naalagaaffinngornissamut piareersaataareersimasut sukumiisumik suliareqqissaarnissaat, aammalu innuttaasunik peqataatitsinerup oqallitsitsinerullu qulakkeerluarnissaa. Pingaaruteqarluinnarpoq, naalagaaffinngornissamut siunertap patajaatsumik tunngaveqarnissaa, orninneranilu innuttaasut piginneqataallutik akisussaaqataallutillu tamatuminnga misigiffiginninnissaat.Taamatuttaaq pingaaruteqartut allat ilaatigut tassaapput naalagaaffinngornissap angujartornerani qaammarsaanerit arlallit pisariaqartassammata, matumani pineqarlutik siunissamut aalajangerneqartut tunngaviisa erseqqissartuarnissaat, soorlu aningaasaqarnermut nunamullu nammineertumut apeqqutinut tunngasunut.
Suliassat tunniussaqarfigalugillu nakkutigisassatit pingaarnertut makkununnga tunngapput:
- Suliassaqarfiit Naalagaaffimmiit nuutassat misissoqqissaarnissaat
- aningaasaqarnermut tunngasut qulaajarnissaat
- naalagaaffinngornissap angujartornerani pissutsit misissorlugillu qulaajarnissaat
- innuttaasunik akuunerulersitsinissamut tunngatillugu periutsinik ujartuineq
- naalagaaffinngornerup eqqunneqarneratigut kalluarneqarsinnaasut pillugit innuttaasut ilisimatinnissaat
- innuttaasunik pitsaasumik suleqatiginninneq, kattuffiit oqartussallu allat attavigalugit, aammalu Naalagaaffinngoriartornermi ineriartornissaq pillugu nunat allat misilittagaannik paasiniaaneq.
Taamaattumik AC-fuldmægtigitut imaluunniit immikkut siunnersortitut sulineq tamatigoortuunermik piumasaqarpoq, taamaattumillu Namminersorlutik Oqartussani naalakkersuisoqarfiit arlallit soqutiginnittullu allat qanimut suleqatigisassavatit.
Piginnaasat
Naleqquttumik ilisimatusarnerup iluani naammassisimasannik ilinniagaqarsimassaatit aammalu pisortaqarfimmi piumasaqaataanngitsumik politikikkut aqunneqartumi misilittagaqarsinnaavutit.
Naatsorsuutigaatsigit:
- Cand.scient.pol.-tut, cand.oecon.-tut, cand.merc.-tut, cand.jur.-tut, cand.mag.-tut imaluunniit allatut ilinniarsimanissat
- Kalaallit Nunaata politikikkut ineriartornera oqaluttuarisaaneralu aammalu piorsarsimassuseq pillugit ilisimasaqarluarnissat
- inuiaqatigiit ineriartornerat pillugu aammalu misissueqqissaarnermik piginnaasaqarlutillu ilisimasaqarnissat
- oqaatsitigut piginnaasaqarluarnissat; kalaallisut, danskisut tuluttullu
- aaqqissuussaasumik sulisinnaaneq misissueqqissaarnermillu piginnaasaqarnissat
- allattariarsornikkut oqaaseqatigiiliullaqqissuussallutit
- nammineq aallarniisinnaassuseqassaatit, namminersorsinnaassuseqarlutit assigiinngitsorpassuarnillu suliaqarsinnaassallutit
- ilakkuminartuussaatit, aamma ullut tamaasa suliassanik tamalaanik suliassaqarfiusumiikkaluarlutit
- aaqqissuussaalluartumik suleriuseqarsinnaassaatit piffissaliussanullu eqquutsitsilluarsinnaassallutit.
Neqeroorutigisinnaavagut:
- Suliassaqarfimmi ineriartorfiusumi suliffik pissanganartoq politikikkullu eqqumaffigineqarluartoq
- suliffeqarfik ulapaarfiusoq, suleqatitsialannik peqateqarfiusoq ilumoorsaarpallaaranilu oqaloqatiginniffiusinnaasoq
- Suliffeqarfik pissanganartoq suliassanik soqutiginartunik imalik, peqatigiilluni suliffiusoq suliassanullu pikkorissuseqarnissamik annertuumik pingaartitsisoq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Suliffik pillugu saaffigineqarsinnaapput
Suliffik pillugu apeqqutissaqaruit immikkoortortaqarfimmi pisortamut Káte Hansenimut oqarasuaammut uunga saaffigisinnaavat: 34 51 26-mut imaluunniit e-mail: khan@nanoq.gl
Ulloq atorfimmi sulilerfissaq: 1. januar 2025 isumaqatigiissuteqarnikkulluunniit. Atorfimmut qinnuteqarnissamut killigititaq: 8. november 2024.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job