Meeqqanut ilaqutariinnullu ingerlatsivik Siunnersuinermut ilaqutariinnullu katsorsaanermut sullissiv
Kommuneqarfik Sermersooq Meeqqanut Ilaqutariinnullu Ingerlatsivik.
Nuummi Meeqqanut Ilaqutariinnullu Ingerlatsivik Siunnersuinermut Ilaqutariinnillu Katsorsaanermut Sullissivik
Meeqqanut Ilaqutariinnullu Ingerlatsivik Siunnersuinermut Ilaqutariinnillu Katsorsaanermut Sullissivik ineriartortitsinermut siunnersortimik pikkorissumik soqutiginnittumillu piaarnerpaamik isumaqatigiissuteqarnikkut atorfinittussarsiorpoq.
Sullissivimmi ilaqutariit, meeqqat inuusuttullu tamakkiisumik isiginnittaaseqarluni sullinneqarput inooqatigiinnikkut ajornartorsiutinik unammilligassanillu assigiinngitsunik suliarinninnissaminnik kissaateqartut.
Atorfiup imaa:
Ineriartortitsinermut siunnersortissarput immikkoortortami piginnaatitsinermut pilersaarummik atuutsitsilissaaq. Taanna ukiut tamaasa nutarterneqartassaaq aamma sulisut ingerlaavartumik pikkorissarnernut ilinniaqqinnernullu naleqquttunut neqeroorfigineqartassapput piginnaatitsinermut pilersaarut atuuttoq naapertorlugu. Taamaaliornikkut qulakkeerneqassaaq, suleqatigiit assigiinngitsut aamma sulisut ataasiakkaat tamarmik suliamut piginnaasaminnik ingerlaavartumik ineriartortitsinerat, kommunip innuttaasunut neqeroorutaa pisariaqartitsineq naapertorlugu pitsanngorsarneqarsinnaaqqullugu.
Immikkoortortaqarfeeqqat tassaapput:
1. Team 1 - terapi aamma katsorsartinneq
2. Team 2 - eqimattatut neqeroorut taassuma iluani ilaqutariinnut mikisunik meerartalinnut najugaqartunut katsorsaanermik neqeroorut
3. Team 3 - siunnersuineq ilitsersuinerlu.
Ineriartortitsinermut siunnersortitut akisussaaffigaatit:
Piginnaatitsinermut pilersaarummik atuutsitsilerneq, missingersuutaasup iluani. Ilinniarfinnut aamma pikkorissartitsinernik neqerooruteqartunut attaveqartassaatit. Ineriartornermut periarfissat aamma neqeroorutit assigiinngitsut pillugit paasisassarsiortuassaatit taakkuninngalu ilisimasatit suleqatinut naapertuuttunut ingerlateqqissavatit. Taassuma saniatigut immikkoortortaqarfiup pikkorissarnermut ukiumut ullorsiutai, pikkorissartitsivinnik inniminniineq aamma peqataasussat nalunaarsorsimaffiisa attatiinnarnissaat akisussaaffigissavatit. Pikkorissartitsinernik aaqqissuussinermik ingerlatsisassaatit taakkununnga ilanngullugit nerisaqartitsineq, angalanernik inniminniineq il.il..
Atorfimmut atasumik suliassat assigiinngitsut pinngitsoorani suliarineqartussaapput ilanngullugit:
∙Piginnaanngorsaqqinnermut missingersuusiorneq: missingersuutinik missingersuutinillu malittarinninnernik suliaqarnerit, kiisalu ineriartortitsinermik ilinniartitaanermullu suliassaqarfimmi naatsorsuutinut oqaaseqaatit.
∙Aaqqissuussanik suleriaatsinillu pitsaasunik ineriartortitsineq teamsit aamma suliamik ingerlatsisut assigiinngitsut suliamik ineriartortitsinerannut atasumik, soorluttaaq sullissinermik assigiissaartumik qulakkeerinninneq.
∙Suliassaqarfimmut nutaatut isumassarsianik ineriartortitsinernik suliaqarneq
∙MUS-imik oqaloqatiginnereernerup kingorna ineriartornermut pilersaarutip malittarineqarneranik qulakkeerinninneq.
∙Teamsit assigiinngitsut sulianut tunngasunik ineriartortinnerannik suliaqarneq.
Qinnuteqartumut naatsorsuutigisat:
Naatsorsuutigaarput illit ilinniagartuujusutit imaluunniit akunnattumik sivisussusilimmik aqutsinermik, supervisionimik, aqqutissiuussinermik imaluunniit siunnersuinermik ilinniagaqarsimasutit, ajornanngippat aaqqissuussinermik aamma suliassanik ataqatigiissarinermik suliamit misilittagaqartutit. Tamakkiisumik isiginnissinnaavutit, aaqqissussaasumik sulisinnaasoq aamma siumut pilersaarusiullaqqissoq.
Qinnuteqartoq pikkorissarnernik, ilinniakkanik assigiinngitsunik neqerooruteqartunik ilisimasaqalernissani kajumigissavaa aamma ilisimasaminik siammarterillaqqissuussaaq. Isumaginninnermut suliassaqarfimmik immikkut ilisimasaqarneq iluaqutaassaaq.
Pingaaruteqarpoq qinnuteqartoq allakkatigut oqaatsitigullu attaveqallaqqissuussasoq.
Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.
Aammattaaq pingaartipparput, qinnuteqartoq:
∙Ineriartortitserusussuseqartoq alapernaatsuusorlu.
∙Namminersorluni suliaqallaqqissoq, kisianni kiffaanngissuseqarani
∙Suleqatigiuminartoq
∙Nutaaliorsinnaasoq, oqaloqateqarnermik pingaartitsisoq tusarnaarsinnaassuseqartorlu
NeqeroorutigaagutSuliffik unammillernartoq atorfiup imarisaanik sunniuteqarnissamut periarfissalik kiisalu aaqqissuussaanermi ineriartortumi allanngorartumilu akisussaaqataanissaq.
Suliffimmut suliffeqarfimmullu iserluartinneqarnissaq pingaartipparput aamma aqutsisut qanimut immersoqatigiiffigalugit suleqatigiilluarnissaq kiisalu aallartitsinissamut nutaaliornissamullu inissaqartitsinissaq anguniartuarparput.
Pikkorissarnernut peqataasarneq aqqutigalugu sulisut ilinniagaqaqqinnissamut periarfissaqartinnissaat pingaartipparput.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Pisortaq Cecile Jeremiassen, oqarasuaat +299 367331 imaluunniit e-mail: ceje@sermersooq.gl
Pineqaatissinneqarsimannginnermut aamma meeqqanut pinerliisimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.
Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.Atorfinititsineq qaammatini pingasuni misiliutitaqassaaq.
Inissaq:
Atorfininnermut atatillugu inissiamik innersuussisoqarsinnaanngilaq.
Qinnuteqaat:
Qinnuteqaat qulequtserlugu Atorfiup ilisarnaataa 802-24-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: aggustip 21.-at, 2024