Marlunnik sulisoq Erhverv- aamma Niuerneqarfimmut
Kalaallit Nunaanni inuussutissarsiornerup ineriartornissaanut, piujuarnissaanullu pitsaasunik sinaakkutisseeqataarusuppit? Inuussutissarsiutinik nutaanik ineriartortitsineq, assigiinngissitaarnerusumillu aningaasaqarnissap sulissutiginissaa soqutiginartippiuk? Suliniutinik piujuartitsisussanik aallartisaaqataarusukkuit, aallarnisaanernullu tunngavisseeqataarusukkuit, Inuussutissarsiutinut aamma niuernermut immikkoortortami atorfininnissat isumaliutigisariaqarpat.
Kinaaninnut, piginnaasatigullu neriuuteqarfigut…
Inuussutissarsiutinut aamma niuernermut immikkoortortami akimortumik suleqatigiippugut, sulisulli ataasiakkaat suliaqarfimmut ataatsimut, arlalinnulluunniit namminneerlutik annertuumik akisussaaffeqarlutik. Taamaattumik suleqateqarsinnaasariaqassaatit, aammali akisussaaffimmik nammineq tigusillutit suliassat namminersuutigisinnaassallugit.
Atorfiit arlallit inuttassarsiuuppagut, neriuutigalugulu ilaatigut nassaarissallutit...
llit, inuussutissarsiutitigut ineriartortoqarnissaanik soqutigisalik, najukkamilu inuussutissarsiutitigut ineriartortoqarnissaanut tapersiinissaq, aammalu inuussutissarsiutillit, inuussutissarsiornermik siuarsaanissamut Namminersorlutik Oqartussat ingerlatseqatigiiffiutaa Nalik Ventures, kommunini inuussutissarsiornermi siunnersuisoqatigiit, allallu soqutigisaqaqatigiit akimorlugit suleqateqarnissaq pikkoriffigisinnaassallugu eqqarsartartoq.
illit, inuussutissarsiorfiusinnaasumik nutaamik, sermimillu aamma imermik avammut nioqquteqarnissamik takunnissinnaasoq, ingerlannissaanullu sapiissusilik, sermersuarmiillu avatammut nioqquteqarsinnaanermut periarfissaasunik kivitsisinnaasoq. Imaassinnaavoq aamma aningaasaqarnermut, attaveqaasersuutinut imaluunniit allarluinnarnut tunngasunik tunuliaqutaqartutit imaluunniit paasisimasaqartutit.
Inuttassarsiuunneqartuni suliassat soqutiginartinngikkaluarlugit suliarisartakkatsinnik allanik suliaqaqataanissat suli kissaatigigukku, neriuppugut qinnuteqarnissaq eqqarsaatigeqqissagit.
Neriuutigaarput tulliuttumi piginnaasanik arlalinnik piginnaasaqassasutit:
Attuumassuteqartumik ilinniarsimassasutit, ajornanngippat kandidatitut, taamaakkaluartoq allamik ilinniagallit imaluunniit tunuliaqutallit qinnuteqarnissaannik aamma kaammattorneqarput
Aaqqissuussami politikkikkut aqunneqartumi aamma/imaluunniit namminersorluni inuussutissarsiornerup iluani misilittagaqartutit
Inuussutissarsiornermut, niuernermullu politikkimut ilisimasaqarluartutit
Inuussutissarsiornermi aningaasaqarnermut ilisimasaqartutit aamma/imaluunniit inuiaqatigiinni aningaasaqarnermut ilisimasaqaruit iluaqutaassaaq
Kalaallit Nunaanni inuiaqatigiinnut, inuussutissarsiornermullu tunngasunik ilisimasaqartutit
Kalaallisut, qallunaatut, tuluttullu oqaaseqaruit iluaqutaassaaq, piumasaqaataanngilarli
Kikkuuvugut, suliagullu…
Inuussutissarsiutinut aamma niuernermut immikkoortortaq Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfiup marlunnik; Atuisartoqarnermut aamma Unammilleqatigiinnermut Aqutsisoqarfimmik kiisalu Aatsitassanut Aqutsisoqarfimmik aqutsisoqarfeqartup ataaniippoq.
Inuussutissarsiutinut aamma niuernermut immikkoortortami sulisut assigiinngitsunik tunuliaqutaqarlutalu, piginnaasaqartugut 13-iuvugut. Suliassarpassuatsinnik kivitseqatigiilluta ataqatigiilluarpugut, nuannisaqatigiittarlutalu.
Nunami inuussutissarsiornermut aamma niuernermut politikki, takornarialerineq, sermimik imermillu avatammut nioqquteqarneq, Kalaallit Nunaanni inuussutissarsiutitigut periarfissaasunik avammut siuarsaaneq, uumassusillit sananeqaataasigut kingornuttagaasunik isumalluutit kiisalu inuussutissarsiornermut aamma niuernermut tunngasunik nunani avannarlerni, nunallu tamalaat akornanni suleqateqarnerit suliatta ilagaat. Tassunga ilaatillugu Kalaallit Nunaanni inuussutissarsiutilinnut, naalakkersuisoqarfinnut allanut, kommuninut, soqutigisaqaqatigiinnut, nunat tamalaat akornanni oqartussanut, suleqatigisanut il.il. akimorlugit immikkoortortaqarfik suleqateqarpoq.
Maani ulluinnaat assigiinngillat, ulluinnarnilu ilaatigut suliarisartakkagut tassaallutik:
Sulianik suliaqarneq, politikerinullu sullissineq, matumani Naalakkersuisut isummernissaannut tunngavissaliornerit, tunuliaqutaasunik allakkiornerit, oqalugiaasiornerit, § 37 naapertorlugu apeqqutinut akissuteqaasiornerit, tusarniutinut akissuteqaasiornerit allallu ilanngullugit.
Suliassaqarfitta iluani inuussutissarsiutitigut, niuernermilu suliniutinik nutaanik ineriartortitsineq, atuutsilersitsinerlu
Naalakkersuisoqarfiit allat, oqartussat, soqutigisaqaqatigiit, inuussutissarsiutillillu suleqatigalugit akimortumik suliniutit
Nunat tamalaat akornanni niuerfinni Kalaallit Nunaanni inuussutissarsiutinik nittarsaaneq
Ilaatigut Visit Greenland, Nalik Ventures, Great Greenland, Greenland Visitor Center, najukkami inuussutissarsiornermi siunnersuisoqatigiit, kommunit il.il. peqatigalugit ineriartortitsinerit, suleqatigiinnerillu.
Atorfininnissaq pillugu…
Atorfiit 2024-mi decemberip aallaqqaataani imaluunniit isumaqatigiissuteqarnikkut inuttalerneqarusupput.
Piginnaasat, misilittakkallu nalilerneqarnerisigut fuldmægtigitut, immikkut siunnersortitut imaluunnit siunnersortaanertut atorfinitsisoqassaaq.
Oqaloqatiginninnerit ataavartumik ingerlanneqassapput.
Apeqqutissaqaruit…
Atorfik pillugu annerusumik paasisaqarusukkuit, Inuussutissarsiutinut aamma niuernermut immikkoortortami pisortamut Marte Lona-mut mailimut uunga mlon@nanoq.gl imaluunniit oqarasuaammut +299 346568-imut attaveqarnissannut tikilluaqqusaavutit.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.