Kinaavit siunissami aqutsisussarput, kujataani illoqarfinnut nunaqarfinnullu angallassinermik pilersitsisinnaasoq?
Ineqarnermut Attaveqaasersuutinullu Naalakkersuisoqarfik AC-fuldmægtig-imik imaluunniit Immikkut siunnersortimik Kiffartuussinermut Isumaqatigiissutinik suliaqartussamik pissarsiorpoq. (Allagarsiuteqqitaq)
Nuna tamakkerlugu angalasussanut angalanissamut periarfissanik pilersitsinissaq, innuttaasunut periarfissanik nutaanik ineriartortitsinissaq aammalu sullissisut malinnaaffigineqarnissaannik qulakkeerinissaq pilerigigukku atorfik manna immaqa ilinnut naleqquppoq!
Sulinermi sullissinissamut isumaqatigiissutit atsiorneqartussanngornerini nassuiarneqartussanngornerinilu inatsisilerinermut aningaasaqarnermullu piginnaasaqarnissaq pisariaqarpoq. Tamatuma saniatigut politikkikkut suleriaatsinik paasisimasaqarnissaq, aammalu kommunit, najukkani inuussutissarsiornermut siunnersuisoqatigiit innuttaasullu suleqatigiilluarnissaannut piginnaasaqarneq pisariaqartinneqarput.
Suliassat ilaatigut tassaassapput:
Kalaallit Nunaata kujataani ilaasunik angallassineq pillugu kiffartuussinissamut isumaqatigiissutinik nutaanik suliaqarneq
Ilaasunik angallassineq pillugu kiffartuussinissamut isumaqatigiissutini nutaamik eqqarsarnissaq
Kiffartuussinissamut isumaqatigiissutini malitseqartitsineq, ilaatigut angallassisunik ataatsimeeqateqarneq aamma isumaqatigiissuteqartarnerit pillugit inatsisinut tunngatillugu suliassat
Aningaasanut inatsisiliornermi isumassarsiuissutinik tunniussisarneq
Kiffartuussinissamut isumaqatigiissutinut tunngatillugu innuttaasut saaffiginnissutaannik suliaqartarneq
Naalakkersuisutsinnik, Naalakkersuisunik Inatsisartunilu ilaasortanik politikkimut tunngasunik sullissineq
Nunatsinni naalakkersuinermi angallannermik pilersaarusiornerup annertunerulerneranik kinguneqarsinnaasumik misissueqqissaarnernik, allakkianik aaqqiissutissatullu siunnersuutinik suliaqartarneq.
Air Greenland, Disko Line aamma Norland Air ukiumut 195 mio. koruunit missaannik missingersuuteqarfiusumik kiffartuussinissamut isumaqatigiissuteqarfigaagut. Tamatuma saniatigut Greenland Airports ukiumut 102,5 mio. koruunit missaannik missingersuuteqarfiusumik Kalaallit Nunaanni mittarfiit ingerlanneqarneri pillugit kiffartuussinissamut isumaqatigiissuteqarfigaarput.
Suliffik ulapaarfiuvoq, tassanilu suliamik nuannarinninneq akisussaaffeqarnerlu ataqatigiipput, aammalu tulluusimaarutigisinnaasatsinnik pitsaasunik angusaqartarluta.
Ulluinnarni ulapaarfiusuni amerlanertigut sulineq qiimasumik ingerlanneqartarpoq. Suliffeqarfiuvugut kiffaanngissuseqarfiusoq, suleqatitigut ataatsimoorussilluarfiusoq aamma sulinerup ilaqutariinnerullu ataqatigiinnissaannik ataqqinniffiusoq. Suliassat pillugit siunnersorneqarnissamut periarfissaqarluartitsisoqarsinnaavoq.
Naatsorsuutigaarput illit
Piumasaqaataavoq:
Inuiaqatigiilerinermi, aningaasaqarnermi imaluunniit inatsisilerinermi qaffasissumik ilinniarnertuujussasutit.
Suliassanut assingusunik misilittagaqassasutit.
Tamatuma saniatigut pingaartipparput:
Teknikikkut inatsisitigullu ajornartorsiutit paasisinnaassagitit.
Ilisimasanik ajornartorsiutinillu oqaatsit paasiuminartut atorlugit nassuiaasinnaasutit.
Tulleriiaakkamik aaqqissuussamillu sulisinnaasutit.
Danskisut kalaallisullu politikki inatsisillu oqimaaqatigiisinnissaannik paasinnissinnaassasutit.
Ajornartorsiutinik misissueqqissaarsinnaassasutit, taamatullu naleqquttunik aaqqiissuteqarsinnaassasutit.
Immikkoortortami suleqatinut taamatullu nunatsinni Danmarkimilu suleqatinut suleqateqarsinnaassasutit.
Namminersorlutit sulisinnaassasutit, taamaattorli immikkoortortaqarfimmi suleqatinut qaqugukkut avitseqateqarsinnaanermik ilisimaarinnissinnaassasutit.
Suliffeqarfimmi politikikkut aqunneqartumi sulisinnaassasutit.
Uagut pilluta
Attaveqaqatigiinnermut Immikkoortortaqarfik allaffinnut marlunnut immikkoortortaqarluni qulinik sulisoqarpoq. Immikkoortortaqarfik timmisartumik angallannermut, mittarfeqarfinnut, imarsiornermut, umiarsualivimmi angallannermut, angallannermut, allakkanut nalunaarasuartaatitigullu attaveqaatinut pilersaarusiorneq, ataqatigiissaarineq assigiinngitsunillu suliaqartarpoq. Aalajangiinernut tunngavissat tunniuttarnissaannut politikikkullu aalajangikkat piviusunngortinnissaannut politikerit pisariaqartitaannik naalakkersuisoqarfimmi piviusunngortitsinissaq siunertaavoq.
Isumannaallisaanermi akuerineqarsimanissaq
Atorfimmut naleqquttutut ilanngunneqarnissamut tunngatillugu piumasaqaataavoq malittarisassat atuuttut naapertorlugit isumannaallisaanermi akuerineqarsimanissaq. Taamaattumik aallaqqaasiullugu pinerlussimasut nalunaarsuisarfianit pinerliisimannginnermut uppernarsaatip assilineqarnera annillatsinneqarsimasoq ilannguguk. Taanna najukkami politiittut oqartussaasunut aaneqarsinnaavoq imaluunniit ugguuna: www.politi.gl/bestil-straffeattest/privat-straffeattest.
Akissarsianut atorfeqarnermilu atugassarititaasut
Akissarsiat atorfeqarnermilu atugassarititaasut, taakkununnga ilaallutik atorfininnermi soraarnermilu angalanissamut kiisalu pisattat nassiunneqarnerini aalajangersakkat aallaavigalugit Namminersorlutik Oqartussat sulilertussallu kattuffiata isumaqatiginninniarsinnaatitaasup akornanni isumaqatigiissutit naapertorlugit pissapput.
Najugaq
Atorfimmut ataatsimut atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumilluunniit inigisani angisuunik uumasuuteqarsinnaaneq, soorlu qimmeqarsinnaaneq qitsuuteqarsinnaanerluunniit ajornarpoq..
Ulloq atorfiniffissaq
Isumaqatigiissuteqareernermi sapinngisamik piaartumik.
Atorfininnissaq pillugu ulloq oqaloqatiginniffissaq
Oqaloqateqarnerit ingerlaavartumik ingerlanneqassapput.
Qinnuteqaat, CV, ilinniarsimanermut aamma pikkorissarsimanermut uppernarsaatit pappiaqqallu attuumassutillit "Qinnuteqaat nassiuguk" toorlugu nassiutikkit.
E-mail aqqutigalugu qinnuteqaatit nassiussat tiguneq ajorpagut.