Kalaallit Nunaanni suliffeqarfinni sullivinni avatangiisinik nakkutilliisoq
Peqataarusuppit qulakkeerniarlugu Kalaallit Nunaanni suliffeqarfiit peqqinnartumik isumannaatsumillu sullivinni avatangiiseqalersikkumallugit aammalu Kalaallit Nunaanni Sullivinnik Nakkutilliisoqarfiup suliassaqarfia ineriartortitseqataaffigiumallugu? Taava immaqa Sullivinnik Nakkutilliisoqarfiup Kalaallit Nunaanni immikkoortortaqarfiani nakkutilliisutut atorfik soqutigisinnaavat.
Sullivinni avatangiisit eqqortup tungaanut nikisitseriaqataagit
Nakkutilliisutut suliassaraat Kalaallit Nunaanni suliffeqarfinni sullivimmi avatangiisinik nakkutilliinissaq, aammalu sullivimmi avatangiisit pillugit ajornartorsiutit assigiinngitsorpassuit isummerfigisinnaassavatit. Atortut naqitsinermik ingerlatillit elevatorillu pillugit nakkutilliinissamut pisinnaasalimmik immikkut qinerlerpugut, aammali suliassaqarfitta iluani suliassanik allanik suliaqarsinnaassaatit, assersuutigalugu ajutoornerit, sulitilluni timip eqqortumik atornissaa, akuutissat, nipi aamma tarnikkut sullivimmi avatangiisit. Isumaqarluartumik, akisussaaffilimmik unammillernartumillu suliffittaassaatit, ulluinnarni suliassat suussusiinik imarisaanillu assut nikerarfiusumi. Suleqatigiinnut suliassaqarfimminnik ilisimasaqarluartunut pimoorussisunullu suleqataalissaatit. Sulineq nammineerfiusorujussuuvoq Kalaallit Nunaannilu angalangaatsiarfiusarluni.
Nakkutilliisutut ilaatigut makku suliassarissavatit:
· suliffeqarfinni sanaartorfinnilu nakkutilliineq
· naqitsinermik naqinneqartunik sanaartukkanik elevatorinillu nakkutilliineq
· nakkutilliiartornissamik piareersarneq, assersuutigalugu suliffeqarfiup ilisarnaatai oqaluttuassartaalu
· nakkutilliiartorsimanerit kingornisigut suliassartaannik suliaqarnerit, soorlu allaffissornikkut, nalunaarusiornikkut piumaffiginninnernillu allagaqaasiornerit
· suliffeqarfinni saqqummiussassannik suliaqartassallutit saqqummiiartortassallutillu
Allaffimmi nakkutilliisut aamma suliarisarpaat Kalaallit Nunaanni Sullivinni avatangiisinut ilinniartitaanerup ingerlanneqartarnera. Tamatumani pineqarluni Kalaallit Nunaanni sullivinni isumannaallisaanerup tungaatigut sinniisussanik atuartitsineq. Taamaattumik naatsorsuutigissavat suliamik tamatuminnga isumaginnissinnaanissat siunertaralugu ilitsersuunneqarlutillu ilinniartinneqarnissat.
Atorfeqalernerpit aallaqqaataani sanileriilluni ilinniartinneqassaatit sullivinni avatangiisit pillugit.
Kalaallit Nunaanni allaffeqarfimmi suleqataasut arfiniliuvugut kredschef-ilu, qitiusumillu allaffipput Nuummiippoq. Suleqatitta ilaat ataaseq Sisimiuni najugaqarpoq.
Peqqinnartumik uummaarissumillu suliffeqarneq anguniarparput
Sullivinnik Nakkutilliisoqarfik sullivinni avatangiisit pillugit kalaallit qallunaallu oqartussaasoqarfigivaat. Anguniarparput Kalaallit Nunaanni sulliviit peqqinnartumik, isumannaatsumik ineriartorfiusumillu sullivinni avatangiiseqalernissaat. Nakkutiginnittuuvugut suliffeqarfiit sulisuminnut avatangiiserissaartitsillutik suliffeqartitsinissaat, inuit nungullarsannginnissaat, ajoqusinnginnissaat uippakajaannginnissaallu siunertaralugu. Tamanna pissarsiaqaataassaaq sulisunut, suliffeqarfimmut inuiaqatigiinnullu. Taamaattumik suliffeqarfinnut qanittumik attaveqarneq pingaaruteqarpoq anguniakkatsinni iluatsitsissagutta.
Pinaveersaartitsinermik ilitsersuinermillu tunngaveqartumik suliaqarnerput suliassaqarfimmi paasisat kingulliit najoqqutaralugit ingerlanneqartarpoq - suleqatigiit suliassaminnut piginnaasaqarluartut isummersoqatigiittarnerisigut.
Annerusumik paasisassarsiorfigisinnaavatsigut ukunani www.at.gl aamma www.at.dk
Suleqatitaarisigut
Imaattuusutit takorloorpatsigit:
· allattariarsornermi oqaluttariarsornermilu tamakkiisumik kalaallisut qallunaatullu oqaatsinik atuisinnaaneq
· ilinniagaqarputit ingeniøritut, maskinmesteritut, sanaartornermi siunnersortitut, allatulluunniit teknikkikkut tunuliaqutaqarlutit
· elevatorinik atortunillu naqitsinermik atuiffiusuni nakkutilliinissamut soqutigisaqarneq
· suliassaqarfiit akimorlugit sullivinni avatangiisini ajornartorsiutaasinnaasunik soqutiginnittuussallutit, soorlu ajutoornernik pinaveersaartitsineq, imaluunniit suliffigissaanermi timip qanoq nungullarsaataanngitsumik atorneqarnissaanut periarfissarsiuussinernik tarnimut tunngasunik aamma kemi il.il.
· annertuumik nammineersinnaallutit ilusilersungaalluartumik suliamik isumaginnissinnaassaatit, taamaakkaluartorli suleqatigiinni suleqataalluarsinnaassallutit
· IT-mik atuisinnaassuseqarluartuussaatit, Sullivinnik Nakkutilliisoqarfimmi suleriutsit amerlanersaat digital-isererneqarnikuummata
· kalaallisut qallunaatullu atuartitsisinnaanermik piginnaasaqassaatit, misilittagaqarlutit soqutiginnittuullutilluunniit
· tatiginartumik kiinnersinnaassaatit oqaloqatiginnillaqqissuullutillu
Akissarsiat atorfeqarnermilu atugassarititaasut
Atorfik piffissaq tamakkerlugu atorfiuvoq, sapaatip akunneranut akunnerni 40-ni suliffiusartoq. Kissaatigaarput 1. februar 2025 aallartissinnaanissat.
Nakkutilliisutut atorfinitsinneqassaatit isumaqatigiissutit atuuttut naapertorlugit.
Atorfeqarnermut atatillugu Nuummi inissaqartitsisoqarsinnaavoq maleruagassat atuuttut tunngavigalugit akilersorneqartussamik.
Immikkoortortaqarfik aaqqissuussaanikkut Københavnip kangiani Nakkutilliisoqarfimmut atavoq, taamaattumillu piffissap ilaani Danmarkimut angalasarnissaq pisariaqassalluni.
Apeqqutit qinnuteqaallu
Apeqqutigiumasinnaasatit tamakkerlugit akissutissarsinngitsoorpigit? Taava tikilluaqquatsigit Immikkoortortami Kalaallit Nunaanni pisortaq Inúnguak Abelsen attaviginissaanut, oqarasuaat +299 55 26 00.
Akissarsiat atorfeqarnermilu atugassarititaasut pillugit apeqqutissaqaruit, taava tikilluaqquatsigit Sulisoqarnermut ministeriaqarfimmi HR-partner Lone Clausen attaviginissaanut, oqarasuaat +45 72 20 52 75.
Sullivimmi assigiinngiiaartunik tunuliaqutaqarneq nukittussutsitut isigaarput soqutiginnittullu tamaasa kaammattorpagut atorfik qinnutigeqqullugu, apeqqutaatinnagu inuttut qanoq tunuliaqutaqarneq.
Qinnuteqaat, cv ilinniarsimanermullu uppernarsaatit ilanngullugit nassiutikkit, kingusinnerpaamik ataasinngornermi 6. december 2024 qallunaat nalunaaqutaat najoqqutaralugu unnuap qeqqartinnagu.
Naatsorsuutigaarput sapaatip akunnerani 50-mi atorfinitsitsiniarluni oqaloqatigiinnerit ingerlannissaat.
Qinnuteqarniarluni immersugassamut link: