Kalaallit Nunaanni Namminersorlutik Oqartussani suliffimmi avatangiisinut aqutsisoq
Immikkoortortaqarfimmi eqeersimaarfiusumi pissanganartumilu sulerusussuseqarpit, aammalu suliffimmi avatangiisinik aammalu isumannaallisaanernik suliaqarusuppit?
Ineriartortitsinermut Allaffimmi (HRU) Namminersorlutik Oqartussani suliffimmi avatangiisinut aqutsisutut atorfik ilinnut soqutiginarpa?
HRU aaqqissugaanikkut Naalakkersuisut Siulittaasuata Naalakkersuisoqarfiani inissisimavoq, aammalu suliassaqarfiit assigiinngitsut aqqutigalugit aqutsinerit, piginnaasanik ineriartortitsisarnerit, sulisussarsiortarnerit, atugarissaarnerit tigumminniinnarnerillu Qitiusumik Allaffeqarfimmi tamarmi suliarisarlugit. Allaffeqarfiup sulisui arfineq pingasuusut peqatigalugit Namminersorlutik Oqartussat HR-imut tunngasutigut anguniagaanik akulikitsumik suleqateqartassaatit taakkununnga ilaallutik isumannaallisaaneq suliffimilu avatangiisit. Isumannaallisaanermut - suleqatigiinnermullu tunngasunut akisussaasuussaatit, aammalu atorfinni HRU-mi allanik suleqatinnik ineriartortitsinissamut siunersiueqatigisaqarnissamut periarfissaqassaatit.
Pingaarnertut suliassatit:
- Qulakkiissallugu suliffimmi avatangiisinut tunngasunut inatsisit malittarisassallu atuuttut malinneqassasut ineriartortinneqarlutillu.
- Atugarissaarnernik misissuinernik, suliffeqarfinnillu nalilersuisarnernik (APV) pilersaarusiorneq ingerlatsinerlu , pitsaaliuilluni suliniutit ilaalu ilanngullugit.
Tamakku saniatigut suliassanut attuumassuteqartunik suliassaqartassaaq
- Naalakkersuisoqarfinni, aqutsisoqarfinni immikkoortortaqarfinnilu timikkut/tarnillu suliffimmi avatangiisitigut isumannaallisaanikkullu Ingerlatitseqqinneq, atuartitsineq pilersitsinerlu
- APV-mi allanillu misissuinernik malitseqartitsineq, taakkununnga ilaallutik naalakkersuisoqarfiit, aqutsisoqarfiit immikkoortortaqarfiillu iliuusissanut pilersaarutaannik malitseqartitsisarnernut suliarinnittarnerinik ikiorsiisarnerit
- Tarnikkut timikkullu sulinermi avatangiisinik tunngassuteqartunut tunngatillugu siunnersuineq ilitsersuinerlu
- Pingaarnertut isumannaallisaanermut suleqatigiinnermullu ataatsimiititaliami (HSSU) allattaanertut sulineq
- Allaffissornermik misilittagaqarneq
Suliamut tunngatillugu piginnaasassatit
- Attuumassuteqartumik ilinniarsimasuussaatit imaluunniit suliffimmi avatangiisinik aamma/imaluunniit aaqqissuussaanermik ineriartortitsinermik misilittagaqassaatit
- Suliffimmi avatangiisinut tunngasut iluini ineriartortitsinissanik aammalu pitsaaliuisarnernik soqutigisaqartuuvutit imaluunniit misilittagaqartuuvutit.
- Qarasaasialerillaqqissuuvutit
Inuttut piginnaasat:
- Suliniutit malitsivigalugit nuannarisuuat suliavillu naammassinissaasa tungaanut malinnaavigisassallugit.
- Suleqatigiuminartuuvutit pitsaasumillu suleqatigiinnermillu ingerlatsiumasuullutit
- Allattariarsornikkut oqaluttariarsornikkullu ingerlatitseqqittarnermik piginnaasaqarluartoq
- Tamakkiisumik isiginnissinnaassuseqarputit arlallillu ataatsikkut aqussinnaallugit
- Annikitsualunnik takunnissinnaassuseqarputit aaqqissuussillaqqissuusutillu
- Suliniuteqarumatuujussaatit suleqatigiinnissamullu akuersaartumik akuliuttarlutit.
- Attaveqarfissanik pilersitsillaqqissuuvutit
- Nammineerlutit aammattaaq suleqatit peqatigalugit suliniarsinnaassuseqarputit
- Kalaallisut/danskisut marluinnik oqaatsitigut piginnaasaqarneq
Atorfinitsitsineq:
Suliffimmi avatangiisinut aqutsisumik atorfinitsitsinissaq pissaaq 1. marts 2025.
Kingusinnerpaamik ulloq qinnuteqarfissaq: 24. februar 2025
Apeqqutit qinnuteqaallu:
Atorfik pillugu apeqqutissaqaruit tikilluaqquneqarputit attavigissallugu suliamut tunngasunik aqutsisoq Steen Lynge ugguuna stly@nanoq.gl, oqarasuaatikkut. tlf +299 34 69 63.
Atorfinitsitsiniarnermi oqaloqateqarnerit ingerlaavartumik ingerlanneqartassapput.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job