Kalaallit Nunaanni Naatsorsueqqissaartarfik kisitsisitigut paasissutissiortussanik marlunnik pissarsiorpoq
Atorfik
Kalaallit inuiaqatigiit pillugit kisitsisitigut paasissutissanik suliaqartussanik aamma inerisaasussanik marlunnik suleqatissarsiorpugut. Suleqatissatta aappaa inunnik tunngaveqartunik kisitsisitigut paasissutissiornermik suliaqassaaq, aappaalu aningaasaqarnermut tunngasunik kisitsisitigut paasissutissiortuussalluni.
Kisitsisitigut paasissutissat tamangajammik pisortaqarfinni allaffissornermit nalunaarsuiffinnit pissarsiarineqartarput. Taamaattumik sulilersussaq ulluinnarni annerusumik programmit SAS, R, SQL aamma Excel atorlugit nalunaarsuutinik suliaqarluni, misissueqqissaarluni saqqummiussilluni suliaqassaaq. Sulilersussaq piginnaasat soqutigisallu aallaavigalungit ataatsimik amerlanerusunilluunniit kisitsisitigut paasissutissiorluni suliaqarfimmik akisussaaffeqassaaq.
Saqqummertussanut pilersaarummi nittartakkami paasissutissanik nutaanik saqqummiussinissat ullulersugaapput. Ingerlatsinermilu suliat taakku ulluinnarni initunerpaasarput, taamaattoq aamma sulianik inniminnikkanik ilisimatusartuniillu misissueqqissaarnernik immikkut ittunik sullissilluni suliaqartoqartarpoq. Taamatuttaaq Naatsorsueqqissaartarfik sammisanik kisitsisitigut paasissiorfissanik nutaanik ineriartortitsinissamut pilersaarummik ingerlataqarpoq.
Suleriaatsit ataatsimoorussat saqqummersittakkat pitsaasuunerat qulakkeertarpaat, pingaartumillu atorfininnermiit ukiup ataatsip ingerlanerani suleriaatsinik pisarialinnik tunniusimalluinnarluni ilinniarnissaq piumasaqaataavoq.
Piginnaasat
Ingerlariaqqiffiusumik ilinniagalinnik nalunaarsuutinillu suliaqarsinnaanermut piginnaasalinnik, ilinniakkap ingerlanerani imaluunniit suliffigisimasamit uppernarsarneqarsinnaasunik, suleqatissarsiorpugut.
Taamatuttaaq iluaqutaassaaq, illit:
- Naleqquttumik inuussutissarsiornermi misilittagaqaruit
- SAS-imi, R-imi, SQL-imilu programminik suliaqarnernik imaluunniit Excel-imik atuinermik misilittagaqarlutilluunniit ilisimasaqaruit
- Kalaallit Nunaanni inuiaqatigiit pillugit ilisimasaqarluaruit
- Kalaallisut, qallunaatut tuluttullu oqalussinnaallutillu allassinnaaguit
Naatsorsueqqissaartarfik pillugu
Naatsorsueqqissaartarfimmi sulisut nittartagaq www.stat.gl, Kalaallit Nunaanni qitiusumik kisitsisitigut paasissutissiorfiusoq, ataatsimoorullugu ingerlappaat. Nittartagaq innuttaasunit soqutiginnittunit atorfilinniillu soorlu tusagassiortunit, politikerinit, ilinniartunit, allaffissornermi sulialinnit ilisimatusartuniillu atorneqarpoq. 2024-mi tabelit 450-init amerlanerusut 100-niillu amerlanerusunik saqqummersitanik tunngavillit nittartakkami saqqummersinneqassapput.
Suleqatigiit 16-iinnaavugut, tamattalu ulluinnarni sulianik naliginnaasunik ineriartortitanillu ingerlatseqatigiittarpugut. Allaffik ataatsimoorussinermik ikioqatigiinnermillu pingaartitsisoq naleqartitsisorlu iserfigissavat.
Paasissutissat allat
Atorfik pillugu annertunerusumik paasisaqarusukkuit Naatsorsueqqissaartarfiup pisortaa Anders Blaabjerg oqarasuaat 34 57 81 imaluunniit e-mail abla@stat.gl atorlugu attavigisinnaavat.
Qinnuteqarneq
Ulloq qinnuteqarfissaq kingulleq 20. oktobari 2024-mut killeqarpoq. Atorfinitsitsinissamut oqaloqatiginninnerit qinnuteqarfissap naanerata kinguninngua ingerlanneqarnissaat naatsorsuutigineqarpoq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartunut kandidatitut ilinniarsimasunut ukiunilu arlalinni naleqquttumik suliffimmik misilittagalinnut specialkonsulentitut atorfininnissaq isumaqatigiissutaasinnaavoq.
Sulineq sapaatip akunneranut akunnernik 40-nik sivisussuseqarpoq.
Inissaqartitsineq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job