Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoqarfimmi inatsisilerinermut immikkoortortaqarfimmi sisamik suleqatissarsiorpugut.
Aqagu piginnaasaqarnerulersimanissarnik anguniagaqartuuit? Sulianik ingerlataqaannaavikkusuppit? Susassaaleqerusunngilatit? Taamaakkuni illit immaqa suleqatissaraatsigit.
Immikkoortortaqarfik pillugu
Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoqarfimmi inatsisilerinermut immikkoortortaqarfik nutaajuvoq suli inerisarneqartoq. Immikkoortortaqarfik maannamut suleqatigiinnik tallimaniik-arfinilinnut inuttaqassaaq, tassani immikkoortortaqarfimmi pisortaq ataaseq suleqatigiillu sisamaniit-tallimanut amerlassusillit pineqarlutik.
Immikkoortortaqarfik kiffartuussinikkut immikkoortortaqarfiuvoq Naalakkersuisoqarfimmi pisortaanermut kiisalu maannamut immikkoortortaqarfinnut sisamaasunut; Isumaginninnermut- aamma ilaqutariinnut immikkoortortaqarfimmut, Suliffeqarnermut immikkoortortaqarfimmut, nunamut namminermut immikkoortortaqarfimmut Nakkutilliinermullu immikkoortortaqarfimmut inatsisitigut siunnersuinikkut patajaallisaaqataassalluni.
Immikkoortortaqarfik sunik suliassaqarpa?
- Inatsisissatut missingersuutinik suliaqarneq,
- Nalunaarusianik inatsisillu pillugit nalunaarusianik suliaqarnikkut inatsisinik atuuttunik nutarsaanikkut ingerlatsineq
- Naalakkersuisoqarfimmi immikkoortortaqarfinnut allanut inatsisitigut apeqquteqaatit pillugit qulaajaanerit,
- Naalakkersuisoqarfimmi sulianut tunngatillugu immikkoortortaqarfinnut inatsiseqarneq pillugu siunnersuineq isummersoqataanerlu,
- Tusarniaanermi akissuteqaatinik suliaqarneq,
- Isumaqatigiissutit pillugit isumaqatiginninniarnerni isumaqatigiissutinillu atuutsitsilernerni isummersoqataanerit,
- Naalakkersuisoqarfiup suliassaqarfiisa iluani sukumiisumik inatsisilerinermik suliassanik isumaginninneq.
Kinaavit?
- Pisortat ingerlataanni politikkikkut inatsisitigullu ataqatigiissaareqataallutit suliaqarnissamik soqutiginnittuuvutit,
- Naalakkersuisoqarfiup suliassaqarfiata iluani inatsiseqarnermik soqutiginnittuuvutit, matumani isumaginninnermut inatsiseqarnermut, suliffeqarnermut, kommuuninut soorunalumi aamma ingerlatsinermut inatsiseqarnermut,
- Angorusutatit nukittoqutigaatit. Ullut tamaasa piginnaasaqarnerulernissat soqutigisaraat,
- Uninngaannartuunissat soqutigisarinngilat. Taamaattumik ulapaarfiusumik allanngorartunik suliassaqarfiusumik avatangiiseqarlutit sulinissat pitsaanerutippat,
- Inoqatinnut ataqqinnittuuvutit naligalugillu naapittarnissaat pingaartillugu,
- Ersarissumik paasinartumillu attaveqariaaseqarputit,
- Suleqatigiiaani suleqateqallaqqissuuvutit, taamaakkaluartoq nammineq inuttut akisussaaffinnik nammineersinnaassutsikkullu tunniussassatit tunulliuttartuunagit,
- Inissaqartitsisuuvutit, naapikkuminartuullutit ileqqorisanullu assigiinngitsunut suleqatiginnissinnaanermut ataqqinnittuullutit,
- Suleqatitit ikiorneqarnissamik pisariaqartitsigaangata piareersimajuaannarputit,
- Nunami pinnersumi pinngortitap illoqarfimmilu inooqataanerup oqimaaqatigiissumik inuuffigineqarnerani innuttaaqataaneq naleqartitarivat,
- Iluaqutaassaaq piumasaqaataananili kalaallinut inuiaqatigiinnut- aamma kalaallisut oqaatsinut ilisimasaqaruit.
Suleqatissatit kalaallisut oqaaseqartuunngitsut sulisitsisup innersuussarisaanut kalaallisut oqaatsit pillugit pikkorissarnermut peqataasinnaapput sulisitsisup akiligaanik.
Ilinniarsimassutsikkut tunuliaqutarisat suua?
- Inatsisilerinermi tulluartumik kandidatitut- imaluunniit bacheloritut merc.(jur.) imaluunniit inuiaqatigiilerinermi tulluartumik assersuutigalugu naalagaaffiit pissusiinik ilisimatusarsimanermik ilinniagaqarsimassaatit.
- Ilinniarlutit naammasserlaajusinnaavutit imaluunniit ukiuni arlalinni misilittagaqareerlutit.
Immikkoortortaqarfik sumik ilinnut neqerooruteqarsinnaava?
- Killiffiit aallaavigissavaa,
- Piginnaasaqarfigeriikkatit naleqartissavai,
- Suliavit pitsaanerpaamik suliarisinnaanissaat eqqarsaatigalugu ilikkagaqarfigerusutatit tapersersussavai. Ilikkagaqarnerunissaq immikkoortortaqarfiup iluani pikkorissaanermik ingerlatsinikkut sanilerisamilluunniit ilitsersuunneqarluni ingerlasinnaavoq,
- Suliffik suliassaq assigiiaanngisaannartut,
- Suliffeqarfik suleqatigiinnikkut nuannersumik avatangiisilik, inuit nuannersut, inuppalaartut isumassuisullu suleqatigalugit.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni ”Namminersorlutik Oqartussat kattuffiullu isumaqatiginniarsinnaatitaasup” 3. september 2024-meersumi imaluunniit attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Fuldmægtigitut atorfinitsinneqassaatit. Kandidatit misilittagaqarnikkut naapertuuttunik uppernarsaateqartut immikkut siunnersortitut imaluunniit pisortatut siunnersortitut isumaqatigiissutit atuutsinneqartut naapertorlugit innersuunneqarsinnaapput. Immikkut siunnersortitut- imaluunniit pisortatut siunnersortitut akissarsiatigut ilassuteqartoqassappat tamanna Namminersornerullutik Oqartussat Aningaasaqarnermi- aamma Sulisoqarnermi aqutsisoqarfianit akuersissutigineqaqqaassaaq.
Ineqarneq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Paasissutissat annertunerusut
Atorfik pillugu paasissutissanik annertunerusunik pissarserusukkuit, immikkoortortaqarfimmi pisortaq Mehdi Shams, oqarasuaatikkut +299 345402-imut, imaluunniit e-mailikkut mehs@nanoq.gl-imut saaffigalugu pissarsisinnaavutit. (Kalaallit Nunaanni = Qallunaallu nunaanni nalunaaquttap nikinganera – 3 tiimit) eqqumaffigikkit.
Qinnuteqaat
Suleqatissatsitut imminut isigiguit tunuarsimaarnak qinnuteqaatit maanna nassiuguk. Oqaloqateqarnerit ataavartumik ingerlatissavagut. Atorfinitsitsinissamullu inaarutaasumik aalajangiineq qinnuteqarfissatut piffissaliussap qaangiusimalernerani aatsaat tiguneqassaaq.
Qinnuteqaat, CV, ilinniakkanut pikkorissarnernullu uppernarsaatit, kiisalu allagaatit attuumassutillit “Qinnuteqaat nassiuguk” toorlugu nassiunneqassapput.
Qinnuteqarnissamut piffissaliussaq 21. november 2024 nal. 23.59 kalaallit nunaanni nalunaaqutaq malillugu killeqarpoq.
Kingusinnerpaamik sapaatip akunnerani 49-imi oqaloqateqarnerit tamaasa ingerlassimanissaat naatsorsuutigaarput.
Atorfinitsitsineq 15. januar 2025 pissaaq. Atorfininnissaq isumaqatigiinneq aallaavigalugu ulluliussaq sioqqullugu kingoqqulluguluunniit pisinnaavoq.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job