Inuttassarsiuussaq: Ilinniartitaanermi pisortaq
Inuttassarsiuussaq: Ilinniartitaanermi pisortaq
Suliffik: Peqqissaanermik Ilinniarfik
Sumiiffik: Nuuk
Atorfiniffissaq: 1. oktober 2024
Uagut:
Peqqissaanermik Ilinniarfik suliffeqarfittut eqeersimaartuuvoq nutaaliorfiullunilu, ilinniartitaanernik inerisaanernillu qaffasissumik pitsaassusilinnik, peqqinnissakkut sullinneqarnermik qaffasissumik pitsaassusilimmik, pisariaqartitsineq innuttaasuni annertusiartuinnartoq tunngavigalugu inerisarneqartuartunik tunniussinissamik ukkassiviusoq. Pimoorussinerput avatangiisillu inuttut ilinniakkatigullu pitsaasunik periarfissiisut, ilinniartitaanerillu inerisaqqinnissaannut suleriaatsinik isumassarsiviusunik takorluuilersitsinissamik anguniagaqartuunerput ilinniarfittut ilisimaneqaatigaagut. Taamaammat ilinniartitaanernut pisortassamik pimoorussisumik iliuusissanillu siunniusinermik eqqarsartariaasilimmik -ilinniartitaanernik aqutsisoq forstanderilu suleqatigalugit ilinniartitaanernik, ilinniaqqinnernik pikkorissaanernillu aqutsisussamik inerisaaqqittussamillu pissarsiorpugut.
Suliffik:
Ilinniartitaanernut pisortatut ilinniartitaanermut pikkorissaanernullu immikkoortortatsinnik aqutsineq akisussaaffigissavat, ilinniartitaanernullu najoqqutassatta nutaaliorfiunissaat, naapertuunnissaat ilinniagaqassutsikkullu qaffasissumi inissisimanissaat qulakkiissallugu. Iliuusissatut siunniussanik suliniutinillu nutaanik, anguniagassatut takorluukkatsinnik anguniakkatsinnillu ikorfartuisunik inerisaanermi pingaarutilittut inissisimassaatit.
Akisussaaffiit:
Ilinniartitaanernut aqutsisoq forstanderilu suleqatigalugit ilinniartitaanermi pikkorissaanermilu immikkoortortanik aqutsineq.
Allaffissornikkut sulianik ingerlatsineq soorlu pikkorissaanermut immikkoortortami allaffimmi fuldmægtigi suleqatigalugu pikkorissaanissanik pilersaarusiorneq, suliaqarneq inerisaanerlu.
Forstanderi, ilinniartitaanernut aqutsisoq ilinniartitsisullu suleqatigalugit ilinniartitaanerit ingerlatatta ilinniartitsinermi periusissaannik tunngavissaannillu suliaqarneq.
Forstanderi suleqatigalugu anguniagassatut takorluukkanik inerisaaneq atuutilersitsinerlu, ilinniartitaanernilu nalinginnaasuni pikkorissaanernullu immikkoortortami neqeroorutinik pilersaarusiorneq.
Ilinniartitaanerni ilinniartut amerlasuut naammassisarnissannik qulakkeerineq.
Aqutsisoqatigiit susassaqaqatillu ilutsinneersut avataaneersullu suleqatigalugit ilinniartitaanernik nutaanik suussusersillunilu inerisaaneq.
Peqqissaanermik Ilinniarfimmi ilinniartitaanerit pitsaassusaannik qulakkeeriuarneq naliliiuarnerlu, tunngaviusumik ilinniartitaanerni inuussutissarsiutinut sammititani anguniagassatut aalajangersakkanik pitsaassutsinillu eqquutsitsinissamik qulakkeerineq.
Pisortap peqannginnerani tullersortitut atuunneq.
Piginnaasat:
Naapertuuttumik masteritut imal. kandidatitut qaffasissumik ilinniagaqarneq.
Ilinniartitaanermi aqutsisutut minnerpaamik ukiuni marlunni misilittagaqarneq.
Ilinniartitaanernik inerisaanermik piviusunngortitsinermillu uppernarsaatissartalimmik misilittagaqarneq.
Aqutsisutut piginnaaneqarluarneq sulisunillu kajumissaaralunilu inerisaasinnaaneq.
Attaveqatigiinnermut suleqatigiinnermullu piginnaaneqarluarneq.
Iliuusissatut siunniussassanik eqqarsarsinnaaneq, misissueqqissaartuuneq angusaqarusussuseqarnerlu.
Kalaallit kulturiannik ilisimaarinninneq
Ajornanngippat illugiinnik – danskisut kalaallisullu oqaaseqartuuneq tuluttullu qaffasissumik piginnaaneqarneq.
Neqeroorutigaagut:
Suliffeqarfimmi alliartortumi atorfik pissanganartoq unammillernartorlu.
Ilinniartitaanermut neqeroorutitta ineriartorneranni pitsaasumik sunniuteqarnissamut periarfissagissaartoq.
Ilinniagaqassutsikkut inuttullu ineriartornissamut periarfissagissaartoq.
Sullivimmi avatangiisit uummaarillutillu ikorfartuisut
Aningaasarsiatigut atorfinitsitaanermilu atugassarititaasut
Atorfik maannarpiaq akissaateqarfiup LR 36-ip qaffaseqataani inissisimavoq.
Akissarsiani (LR36)-imi akissarsianut immikkoortut allajangersimasut imatut isikkoqarput: 1. April 2022-imi qaammammut 50.291 koruunit aamma ukiumut 603.496 koruunit.
Tunngaviusumik isumaqatigiissutit tunngavigalugit atorfinitsitsisoqassaaq, tassalu qinnuteqartut Kalaallit Nunaanni pisortani tjenestemanditut atorfillit pillugit inatsisit naapertorlugit tjenestemanditut atorfeqareersut, tjenestemandinut atugassarititaasut tunngavigalugit atorfinitsinneqarsinnaapput.
Akissarsiat atorfeqarnermilu atugassarititaasut, tassungalu ilanngullugit atorfininnermut soraarnermullu atatillugu angalanernut pequtinillu nassiussinermut akiliunneqarnissamut pisinnaatitaaffeqarneq, atorfininnermi Namminersorlutik Oqartussat kattuffiullu isumaqatiginninniarsinnaatitaasup ilaasortaaffigisap akornani isumaqatigiissut atuuttoq naapertorlugu pissapput.
Naalagaaffimmi tjenestemandit aamma AC-mut isumaqatigiissutit arlallit, ilaatigullu DJØF-ip aamma Aningaasaqarnermut Ministereqarfiup akornani isumaqatigiissut malillugit atorfeqartinneqartut, Namminersorlutik Oqartussani atorfeqarnerminnut atatillugu akissarsiaqaratik sulinngiffeqarsinnaatitaapput. Aamma Nunamut Namminermut Ministereqarfik kommuninut nunallu immikkoortuinut inassuteqarpoq, Namminersorlutik Oqartussani atorfeqarnermut atatillugu akissarsiaqarani sulinngiffeqarnissamut qinnuteqartunut akuersaaqqullugit. Sulinngiffeqarnermut aalajangersakkanut aamma Namminersorlutik Oqartussani atorfinittunut aappaasut/inooqataasut ilaatinneqarput.
Piffissaq suliffiusoq tunngaviusumik sapaatit akunneranut nal. ak. 40-nik sivisussuseqarpoq, aammalu atorfeqarnermut atatillugu ukiumut 320-t ukiup sisamararterutaanut 80-t piareersimasussaatitaaneq atuutsinneqarpoq, aammalu ullunut sulinngiffeqarfinnut annaasanut ajunngitsorsiat pillugit aalajangersakkat atuutsinneqanngillat.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.