Ilinniartitsisoq imaluunniit adjunkti ilinniartitaanermik ilisimatusarnermik samminnittumik atuartitsinermut tunngasumik atuarfinni ilinniartitsinermut tunngasumik.
Ilisimatusarfiup Ilinniartitsinermik Ilisimatusarfia meeqqat atuarfianni nalinginnaasumik atuartitseriaaseq qitiutillugu perorsaanermik ilisimatusaatini lektorissarsiorpoq imaluunniit adjunktissarsiorpoq.
Atorfimmut qinnuteqartuni toqqarneqartoq Ilinniartitsinermik Ilisimatusarfiup Ilinniartitsineq Ilinniartitaanerlu pillugit Ilisimatusarfiani ilisimatusartoqatigiit suleqatigilissavai, tamatumanilu Kalaallit Nunaanni tunngaviusumik atuarfik pillugu ilisimatusarnerup piusup ineriartoqqinnissaanut suleqataassaaq, tassani nalinginnaasumik atuartitseriaaseq qitiutinneqarluni. Qinnuteqartoq toqqarneqartoq naatsorsuutigineqarpoq namminersorluni ilisimatusarluni suliniuteqarnikkut, aamma instituttip ilisimatusartui allat suleqatiginerisigut, ooqattaarinertigut misilittakkatigullu paasisat tunngavigalugit ilisimatuutut misissuisinnaassasoq taamaasillunilu Kalaallit Nunaanni meeqqat atuarfianni tamannalu pillugu ilisimasanik katersuivimmik ineriartortitsinermut tapersiissaaq.
Atorfiup 2025-mi februaarip aallaqqaataani, imaluunniit isumaqatigiissuteqarnikkut, inuttalerneqarnissaa kissaatigineqarpoq.
Ilinniartitsinermik Ilisimatusarfik ilisimatuutut misissuinermi aamma ilinniartunut assigiinngisitaartumik avatangiiseqartitsivoq 160-t missaannik ilinniartulik, 25-nik piffissaq tamakkerlugu sulisulik arlalinnillu ph.d.-nngorniartulik. Ilinniartitsinermi bacheloritut ilinniakkamik (ilinniartitsisunngorniarnermik), atuartitseriaasimi, kulturit naapinneranni allanngoriartornernilu masteritut ilinniakkamik, kiisalu meeqqat atuarfianni aamma immikkut atuartitsinerni fagini aalajangersimasuni piginnaanngorsaanernik institutti neqerooruteqarpoq.
Ilisimatusarfimmi ilinniartitsinerit kalaallisut, qallunaatut tuluttullu ingerlanneqarsinnaapput.
Piginnaassusissanik piumasaqaatit
Ph.d.-tut qaffasissusilimmik ilisimatusarfimmi naleqquttumik ilinniagaqarsimaneq, imaluunniit perorsaanermik suliassaqarfiup iluani assingusumik ilinniagaqarsimaneq, tamatumani tunngaviusumik atuarfimmi nalinginnaasumik atuartitseriaaseq immikkut qitiutinneqarluni
Adjunktitut lektoritulluunniit qaffasissusilimmik ilisimatusarnermik, ilinniartitsinermik aamma paasissutissiortarnermik piginnaasaqarneq
Teoriitigut suliassaqarfimmi siammasissumi pitsaassuseq aamma annertussuseq aallaavigalugit ilisimatusariaatsinik ilisimasaqarneq misilittagaqarnerlu iluaqutaassaaq
Nalinginnaasumik atuartitseriaaseq pillugu ilinniartitsisunngorniarfimmi ilinniartitsinermik misilittagaqarneq
Tuluttut saqqummersitsisinnaaneq, aamma kalaallisut qallunaatullu, imaluunniit Skandinaviamiut oqaasiini allani, ilinniartitsisinnaaneq.
Nunat tamalaat akornanni ilisimatusarsimaneq.
Suliassat
Nalinginnaasumik perorsaanermik suliassaqarfiup iluani ilisimatusarnerup saniatigut suliassatit pingaarnerit nalinginnaasumik atuartitseriaaseq qitiutillugu perorsaanermik ilisimatusaatini ilinniartitsinermut tunngassuteqarnerussapput. Ilinniartitsisunngorniarfimmi ilinniartitsinermut atatillugu meeqqat atuarfiata fagiisa akornanni suliassaqarfimmi aalajangersimasumi ilinniartitsisinnaanissaq aamma iluaqutaassaaq.
Erseqqinnerusumik oqaatigalugu suliassat ukua pineqarput:
Ilinniartitsisunngorniarfimmi (BA), masterinngorniarfimmi aamma kandidatitut ilinniartitsissutissaasussani ilinniartitsinerit.
Ilisimatusarluni suliniutinik nutaanik ineriartortitsineq, Kalaallit Nunaanni ilisimatusarnermut attuumassutilinnik.
Ilinniartunik bachelorinngornianik, kandidatinngornianik ph.d.-nngornianillu ilitsersuineq soraarummeersitsisarnerlu.
Instituttimi atorfillit allat suleqatiginerisigut ilinniakkamik ineriartortitseqqiineq.
Atuagassianut suliatigut paasisimasalinnit nalilersorneqarsimasunik imalinnut, aammattaaq nunatsinni tusagassiuutinut ilisimatusaatinik inuinnarnut paasiuminarsagaasunik, kiisalu politikkikkut qaffasissusilinnik, ilisimatusarnermik tunngaveqartunik ilisimasanik paasissutissiortarneq.
Ilisimasanik inuiaqatigiinni avitseqateqarneq aamma tamanut ammasumik oqallinnerni peqataasarneq.
Suliatigut nalilersuisarneq.
Allaffissornikkut suleqatigiillu akornanni suleqatigiinnerni peqataaneq.
Aningaasaateqarfinnut qinnuteqarnernut aamma nunat tamalaat attaveqaqatigineranni eqeersimaartumik peqataaneq suliaqaqataanerlu.
Modulini ilitsersuinermik, ilinniartitsinermik ataqatigiissaarinernillu misilittagaqartut salliutinneqassapput, pingaartumik ilinniartitsisutut ilinniakkami tunuliaqutillit, tamannali piumasaqaataanngilaq. Tamatuma saniatigut Kalaallit Nunaat aamma Issittoq pillugit ilisimasaqarneq naleqqulluinnarpoq, tamannali piumasaqaataanngilaq.
Ilisimatusarnikkut, ilinniartitsinikkut aamma suleqateqarnikkut Issittumik ineriartortitsinermi peqataasutut ilisimatusarfimmi immitsinnut isigaagut. Ilisimatusarfik Nuummiippoq, nunanit tamalaanit sunnerneqarsimasumik sumiiffimmilu mikisumiinnermik misigisaqartitsisoq. Ilisimatusarfik mikivoq, tamannalu ulluinnarnut iluaquteqartitsivoq. Sullivimmi avatangiisit eqqissisimasut neqeroorutigaagut, tamatumani immikkoortortaqarfiit akimorlugit immitsinnut nalunngisariillutalu ilinniartuutivut nalunngilagut. Tamannali aamma ima isumaqarpoq, qinnuteqartup allaffissornikkut suliassat ataasiakkaat isumagiumasinnaassavai.
Inuiaqatigiit assigiinngiiaassusaat ilisimatusarfiup aamma ersersikkusuppaa piukkunnaatillillu tamarmik qinnuteqarnissaannut tikilluaqquai, tamatumani inuiaassuseq, inuttut tunuliaqut imaluunniit upperisaq apeqqutaatinneqanngillat.
Adjunktitut imaluunniit lektoritut atorfinitsinneqarneq piginnaasat misilittakkallu aallaavigalugit pissaaq; ilanngussaq 8 takuuk.
Qinnuteqaat
Tunngaviusumik atuarfimmi atuartitseriaaseq qitiutillugu perorsaanermik ilisimatusaatini lektoritut imaluunniit adjunktitut atorfininnissamut qinnuteqaat, qallunaatut/skandinaviamiutut allaganngorlugu qinnuteqaatip annerpaamik 2-nik quppernillip saniatigut, ukuninnga imaqassaaq:
Ilanngussaq 1: Curriculum Vitae
Ilanngussaq 2: Soraarummeersimanernut uppernarsaatit.
Ilanngussaq 3: Oqaaseqaatinik aallerfiusinnaasut inuit pingasut attaviginissaannut paasissutissat.
Ilanngussaq 4: Tamakkiisumik normulersukkamillu saqqummersissimasat allattorsimaffiat.
Suliarisimasat nassiunneqartut (Ilanngussassaq 8 naleqq.) saqqummersissimasat allattorsimaffianni *-mik nalunaarsorneqassapput.
Ilanngussaq 5: Maannamut ilisimatusaatigisimasat naatsumik allaaserineri kiisalu siunissami
lisimatusaatiginiakkap(-kat) takussutissartaat. Ilisimatusaatiginiakkat tuluttut nassuiarneqassapput.
Ilanngussaq 6: Teaching portfolio ilinniartitsinermik piginnaasanik ilisimatusarfimmi pædagogikum-imik
assigisaanilluunniit sammisaqarsimanermik takussutissartalik, kiisalu maannamut siunissamilu ilinniartitsinermik eqqarsaatersuutinik takussutissiaq.
Ilanngussaq 7: Ilisimatusaatinik siammarterinermut takussutissiaq.
Ilanngussaq 8: Saqqummersissimasat kapitalitut allaatigisatulluunniit takissusillit tallimat tikillugit amerlassusillit. Nalilersorneqarnissamut immikkut attuumassutilinnik lektoritut qinnuteqartoq saqqummersissimasaminik amerlanerpaanik tallimanik toqqaasinnaavoq, adjunktitullu atorfininnissamut qinnuteqartoq saqqummersissimasaminik amerlanerpaanik pingasunik toqqaasinnaavoq.
Attavissat/paasissutissat:
Atorfik pillugu paasisaqarnerorusukkuit lektori Lars Demant-Poort attavigisinnaavat oqarasuaammut: +299 385712, imaluunniit instituttip pisortaa Britta Lohmann oqarasuaammut +299 385602.
Ilisimatusarfik pillugu paasisaqarnerorusukkuit ugguuna atuarnerusinnaavutit: www.uni.gl
Naliliisarneq atorfinitsitsisarnerlu, adjunktinut lektorinullu atorfinnut
Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.
Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq.
Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat.
Ilisimatusarfik pillugu
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
Ilisimatusarfik sisamanik instituteqarpoq:
Ilinniartitsinermik Ilisimatusarfik
Inuiaqatigiilerinermik, Aningaasaqarnermik Tusagassiornermillu Ilisimatusarfik
Kulturimik, Oqaatsinik Oqaluttuarisaanermillu Ilisimatusarfik
Peqqissaanermik Pinngortitamillu Ilisimatusarfik
Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.