Ilinniartitsinermut, Nukissiuuteqarnermut, Nunalerinermut aamma Silap Pissusianut Avatangiisinullu inatsisilerituut
Kalaallit Nunaata mingutsitsinngitsumut allanngoriartortitsinera pingaarutilimmik suleqataaffigerusuppiuk?
Erngup nukinganik suliariumannittussarsiuussinermut, Pisortat nukissiuteqarnikkut pilersuinerannut, Nunalerinermut aamma Silap Pissusianut inatsisilerituunik
Ulloq atorfiniffissaq: 1. marsi 2025 isumaqatigiissuteqarnikkulluunniit.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik inatsisilerituutut Fuldmægtiginik marlunnik / Immikkut siunnersortumik / Siunnersortaanermik, Nunalerinermut, Nukissiutinut Silallu Pissusianut immikkoortoqarfimmi atorfinittussanik sulisussarsiorpoq.
Atorfik pillugu
Inatsisitigut oqartussatut suliassanut aamma ineriartortitsinermik suliassanut nukissiutinut, silap pissusianut nunalerinermullu immikkoortortaqarfimmi kivinneqartussanut tunngatillugu inatsisitigut tamatigoortumik suliaqartussatut qitiusumik inissisimassaatit.
Suliassatit naleqqussarneqassapput piginnaaneqarfigisannut tulluarsakkanik suliaqartussanngorlutit. Suliassat ilaatigut tassaapput:
Nukissiutinut ataavartunut, nunalerinermut aamma silap pissusianut politikkikkut suliniutinut atatillugu inatsisitigut siunnersuinermik misissueqqissaarnermillu suliaqarneq
Kalaallit Nunaanni erngup nukinganik isumalluutinut suliariumannittussarsiuussinermut aamma Parisimi isumaqatigiissummut ilanngunnissamut, kiisalu nunalerinermut suliassaqarfimmi ineriartortitsinermut atugassanik inatsisitigut misissueqqissaarnerit
Immikkoortortaqarfiit oqartussallu allat akimorlugit ataqatigiissaariffiusumik atuuffeqarnerit, tassunga ilanngullugit Nukissiorfiit aamma NunaGreen
Politikkikkut sullissineq, tassunga ilanngullugit saqqummiussassanik suliassat, soorlu assersuutigalugu tusagassiorfinnut nalunaarusiornerit, oqalugiaasiornerit aamma paasititsiniaanernut ilanngussassat allallu.
Nukissiutit
Nukissiuteqarnermut suliaqarfimmi suleqatitit peqatigalugit Nukissiorfinnut nukissiuteqarnikkut pilersuinermik pilersaarusiorlunilu ingerlatsisumut, aammalu NunaGreenimut, Nuup aamma Qasigiannguit Aasiaallu eqqaanni erngup nukinganik nukissiorfinnut suliniutinut angisuunut marlunnut sanaartornermik ingerlatsisussamut, atassuteqaataassaasi.
Aamma suleqatigiit Tasersiap aamma Tarsartuup Tasersuani Kalaallit Nunaanni erngup nukinganik pisuussutit annersaannik suliariumannittussarsiuussinissamik suliaqartut suleqataaffigissavatit. Namminersorlutik Oqartussat suliariumannittussarsiuussinermut allagaatinik tamarmiusunik suliaqartuupput, oqartussatullu suliassaq taanna immikkoortortaqarfimmi suleqatitit aamma Namminersorlutik Oqartussani naalakkersuisoqarfiit allat qanittumik suleqatigalugit suleqataaffigissavat.
Silap pissusia
Silap pissusianut suliassaqarfik tiguneqarnikuuvoq immikkoortortaqarfillu nunami namminermi silap pissusianut periusissiamik ukiuni aggersuni suliaqartussaavoq, tamatumalu kingorna Kalaallit Nunaata annikillisaanissaanut anguniakkanik arlalinnik aalajangersaasussaalluni politikkikkut aalajangiiffigisassanngortitassanik.
Tamatumunnga peqatigitillugu Kalaallit Nunaat Silap pissusianut nunani tamalaani isumaqatigiissutip ataani nunat tamalaat silap pissusia pillugu isumaqatigiinniarnerinut peqataavoq, Kunngeqarfillu Danmark suleqatigalugu nunani tamalaani silap pissusia pillugu isumaqatigiinniarnerni Kalaallit Nunaata soqutigisaata isumagineqarnissaat immikkoortortaqarfimmit qulakkeerneqartussaavoq. Suliaqarfimmut tunngasunik inatsisilerinikkut ingerlaavartumik suliassaqassaaq.
Nunalerineq
Nunalerinermut suliaqarfiup aamma Kalaallit Nunaanni imminut pilersornerulernissap ataatsimut isigalugu nukittorsarneqarnissaat politikkikkut pingaartinneqarluni kissaatigineqarpoq. Immikkoortortaqarfiup suliniutit assigiinngitsut nunalerinermik ineriartortitsisussat, imminut pilersornerulersitsisussat nunalerinermillu aningaasarsiornikkut tunisassiornikkullu piujuartitsinissamik tunngaveqarnerusumik pilersitsisussat sulissutigai.
Illit piginnaaneqarfigisatillu pillugit
Inatsisilerinermut tunngasunik suliaqartussamik suleqatissarsiorpugut, nukissiutinik ataavartunik aamma silap pissusia pillugu politikkimik aammalu nunalerinerup ineriartortinnissaa pillugu politikkikkut sulinermut qanittumik suliaqarusuttumik. Aaqqissuussaanermi politikkikkut aqunneqartumi sulinermik misilittagaqaruit iluaqutaassaaq, aqutsinermut inatsisinut aamma oqartussatut suliassanut tunngatillugu – iluassaarlu Kalaallit Nunaanni taama sulisimaguit – aammalu nukissiutit ataavartut imaluunniit silap pissusianut tunngasut paasisimasaqarfigigukkit.
Nutaanik sammisaqarusussuseqarluassaatit suliassanillu qanoq inerneqarnissaannik siumut ilisimanngisatsinnik suliaqarneq nuannaralugu. Suliatigut piginnaasaqarluarneq pingaaruteqarpoq, suliat nutaat iserfigisinnaassagakkit aaqqiissutissarsioqataallutillu, naak siornatigut misilittagaqarfiginngikkaluarlutigit. Aamma ulluinnarni naammassisassanik suliassaqarfiujuartumi, suliassavit pilersaarusiornissaannik aaqqissornissaannillu piumasaqaateqarfiusumi sulinissat nuannarissavat.
Ilinnut naatsorsuutigisagut:
Kandidatitut ingerlaqqiffiusumik inatsisilerinermik ilinniagaqarneq (cand.jur assingusumilluunniit)
Aaqqissuussaanermi politikkikkut aqunneqartumi sulinermik misilittagaqarneq tamatumunngaluunniit paasisimasaqarneq, tassungalu ilanngullugu politikkikkut aalajangiinerit ingerlanneqartarnerinik paasisimasaqarneq
Nunalerinermut, nukissiutinut silallu pissusianut suliaqarfinnik soqutigisaqarneq, aamma misilittagaqarfigigaanni iluassaaq
Ajornartorsiutinik pisariusunik erseqqissumik paasiuminartumillu saqqummiussillaqqinneq, allattariarsornikkut oqaluttariarsornikkullu
Namminersorluni sulisinnaaneq, aaqqiissuteqarnissamik pingaartitsineq suliniutinullu angisuunut tamakkiisumik isiginnissinnaaneq
Allanngorartunik suliaqarneq nuannarineqassaaq, aamma pisariaqarpat ukkatarineqartut allanngortinneqarsinnaassapput
Ajornartorsiutinut aaqqiissuteqarniarnermi eqaatsumik, peqqissaartumik misissueqqissaartumillu suleriuseqarneq
Oqaatsit arlallit atorlugit saqqummiussillaqqissuuneq, kalaallisut, danskisut tuluttullu
Kalaallit kulturiannut, nunarsuup sinneranut paasisimasaqarneq aammalu suleqataasunik avataaneersunik assigiinngitsorpassuarnik paarlattuanik soqutigisaqarsinnaasunik tatiginartumik akunnaallisaarillunilu suleqateqarsinnaaneq
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik pillugu
Naalakkersuisoqarfimmi sulisut 45-t missaanniippugut, Nunalerinermullu, Nukissiutinut Silallu pissusianut Immikkoortortaqarfimmi sulisut qulit missaanniillutik. Tamatuma saniatigut pisortat nukissiuteqarnikkut pilersuisutut suliffeqarfiat Nukissiorfiit, Innaallagissiornermut oqartussat, Pinngortitaleriffik aamma Asiaq naalakkersuisoqarfiup ataani immikkoortortatut inissisimapput.
Naalakkersuisoqarfimmi suliassat inuiaqatigiinnut pingaarutillit Kalaallit Nunaannut iluaqutaasussanngorlugit suliarisarpagut. Ulluinnarni sulinerput suleqatigiilluartumik kiinnerfiuvoq angusassallu nammineerluni sunniuteqaqataaffiginissaannut inissaqartitsisoqarpoq.
Ineriartortitsinermik suliassat pissanganartorpassuit suliaraagut, suliffinnilu ineriartortutut misigisimanissat pingaartipparput.
Naalakkersuisoqarfimmi aqutsisut atugarissaarnerup nukittorsarnissaanik aalajangiusimanissaanillu pingaartitsisuupput. Naalakkersuisoqarfiup ilisarnaatigaa siumut ingerlasuugatta, angusaqarusussuseqarluta akisussaaffimmillu tigusisarluta. Naalakkersuisoqarfittut ataatsimoortuuvugut, assigiinngissutigullu nukittuffigalugit. Taamaattumik sulinermi avatangiisini taama ittuni ilinnut takusinnaasariaqassaatit tapersersornissaalu suleqataaffigalugu.
Neqeroorutigaagut
- Akisussaaffik annertooq pitsaasumillu allanngueqataanissamut assinganik periarfissaqartitaaneq
- Suliffeqarfik pilerinartoq persuarsiorfiunngitsoq ataqqeqatigiinnermik tatigeqatigiinnermillu pingaartitsiffiusoq
- Suliassaqarfik tamatigoortoq pissanganartorlu nunami namminermut aamma nunanut tamalaanut annertuumik ukkataqarfiusoq
Akissarsiat atorfininnermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Namminersorlutik Oqartussat kattuffiillu isumaqatigiinniarsinnaatitaasut akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Aalajangersimasumik atorfeqartitaanissamut aammalu piffissami killilimmi atorfeqartitaanissamut pisariarfissaqassaaq.
Piffissaq suliffiusoq tunngaviatigut sapaatit akunnerannut akunnernik 40-nik sivisussuseqarpoq.
Ineqarneq
Atorfimmut killiligaanngitsumik atorfininnermi malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunip inaataanik imaluunniit Namminersorlutik Oqartussat inaataannik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il. apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumilluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.
Sullivik Nuummi inissisimavoq. Illoqarfik periarfissarpassuaqarpoq, soorlu kulturikkut illorsuaq, naluttarfik, timigissartarfiit, cafeet, neriniartarfiit peqatigiiffiillu tamalaat. Nuup eqqaani pinngortitaq periarfissarpassuaqarpoq, sisorartarfeqarpoq golfertarfeqarlunilu, aammalu qajartornissamut, aalisariarnissamut, umiatsiamik angalaarnissamut, pisuttuarnissamut sunngiffimmillu sammisassarpassuarnik allanik periarfissaqarluni.
Qinnuteqartoq Namminersorlutik Oqartussani atorfeqarnini aqqutigalugu sulisunut inissiaqareerpat inigisaq tunniunneqartoq pigiinnarneqarsinnaatitaavoq.
Paasisaqarnerorusuppit?
Atorfik pillugu paasisaqarnerorusukkuit immikkoortortaqarfimmi pisortaq Ane Wraae Nielsen saaffigineqarsinnaavoq, oqarasuaat +299 58 67 89, e-mail: awni@nanoq.gl.
Qinnuteqarnissamut killigititaq
Qinnuteqaatit, CV, ilinniakkanut uppernarsaatit kingusinnerpaamik 2. januaari 2025-mi linki ataaniittoq atorlugu nassiutissavatit. Qinnuteqaatinik e-mailikkut tigusineq ajorpugut.