Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi ilinniartitaanermut immikkoortortaq AC-fuldmægtigimik / Immikkut siunnersortimik pissarsiorpoq
Ulloq sulilerfissaq tassaassaaq 1. november 2024 imaluunniit isumaqatigiissuteqarnikkut pissalluni
Kalaallit Nunaanni ilinniarfinnik pitsaanerusunik pilersitseqataarusuppit? Ilinniartitaanermut suliassaqarfiup ineriartornera annertuumik salliutinneqarpoq, taamaalillunilu ilinniarnissamut periarfissat pitsaanerpaat pilersinneqassapput aamma inuussutissarsiornikkut inuunermut sulisinnaasut piukkunnaatillit qulakkeerneqassallutik. Taamaammat Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik ilinniartitaanerni ingerlaqqiffiusuni, tassa Ilisimatusarfimmi aammalu qitiusumik ilinniarfiit bachelorinngorluni sivikitsumillu ingerlaqqiffiusumik ilinniarnernik neqeroortartuni, sulianik suliarinnittartussamik suleqatissarsiorpoq.
Suleqatigiinnitsinni ileqqoqarpugut kikkut tamarmik aaqqissuussaanermut nutaanik eqqarsaatinik suliassanillu naammassinnittarnermut ilanngussisinnaatillugit. Ammasuuguit, suleqatigiissinnaanermik ilisimasaqarluarlutit ilinniartitaanermullu tunngasunik soqutigisaqarluarlutit, taava illiusimassagunarpoq suleqatissarput nutaaq.
Inuttut pisinnaasatit
AC-fuldmægtigissarsiorpugut/immikkut siunnersortissarsiorpugut, suliamut tunngatillugu soqutiginnittumik, suleqatigiinnut suleqatigiilluinnartunut ilanngunnissamut piumassuseqarlunilu piginnaaneqarluartoq, ineriartortitsinermik qaffasissumik pingaartitsisoq. Peqatigitillugu pissarsiariniarparput suliamut tunngatillugu isumannaatsumik sulinissaminut tulluusimaarutiginnittoq aaqqissuussamillu suliassaminnut pulasinnaasut. Allaffissornermiit ingerlatsinermut naalakkersuinikkullu kiffartuussisarnernik ineriartortitsisunik suliassat siammasissut.
Kissaatigaarput illit:
Kandidatitut qaffasissusilimmik attuumassutilimmik ilinniagaqartutit imaluunniit kandidatinngorniarlutit ilinniagaqartutit.
Aaqqiissutissarsiorsinnaassuseqartutit.
Atorfimmit tassunga assingusumit imaluunniit ilinniartitaanermut suliassaqarfimmi atorfimmit misilittagaqassasutit.
Tatiginneqatigiilersitsisarlutillu suleqateqallaqqissuseqassasutit
Ataatsimut isiginnittariaatsimik pitsaasumik piginnaaseqartutit ulapaarfimmilu sulisinnaalluartutit.
Kalaallit Nunaanni inuiaqatigiit pillugit sukumiisumik ilisimasaqassasutit
Tamakkiisumik isiginnillaqqissuusutit sulianillu ilungersunartunik tamanillu takunnissinnaassuseqarlutit.
Ajornanngippat kalaallisut, nunat avannarliit oqaasiinik tuluttullu oqaatsitigut piginnaaneqarluartutit.
Suliassat pingaarnerit tassaapput:
Politikikkut sullissineq, soorlu allakkialiorneq, nassuiaasiorneq, nalunaarusiorneq, suliassamik nassuiaasiorneq, oqalugiaasiorneq, tusagassiorfinnullu nalunaarutissanik suliaqartarneq
Ilinniartitaanerit ingerlaqqiffiusut pillugit qinikkat §37 naapertorlugu apeqqutaannik (Inatsisartunut ilaasortat Naalakkersuisumut apeqqutaannik) akissuteqarneq
Nalileeqataaneq
Ilinniakkat normussaanik tunniussineq
Inatsisartut oqaluuserisassaannik suliarinninneq
Ilinniarnermik aaqqissuussinermik akuersineq
Naalakkersuisoqarfik aamma ilinniartitaanermut immikkoortortaq pillugit
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup suliassai amerlaqaat - Naalakkersuisumik sullissinermit oqartussaaffimmik aqutsineq ilanngullugu. Suliassaqarfimmi pingaarnertut inuiaqatigiit ilinniagaasa qaffassarnissaat, kulturip nukittorsarneqarnissaa, innuttaasut inuttut inuunerisa qulakkeerneqarnissaat ingerlalluarnissaallu, ilaatigut timersornikkut ilageeqarnikkullu, suliassarineqarput. Naalakkersuisoqarfimmi 45-it missaat atorfeqarput, 15-it missaat ilinniartitaanermut immikkoortortaqarfimmiillutik.
Akissarsiat atorfeqartitaanerlu
Atorfik tassaavoq AC-Fuldmægtigitut atuuffiusussaq. Eqqortunik piginnaasalimmut naammattumillu misilittagalimmut Immikkut siunnersortitut atorfinitsitsisoqarsinnaassaaq. Akissarsiat atorfeqarnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut pisinnaatitaaneq, Kalaallit Nunaanni Namminersorlutik Oqartussat kattuffiillu isumaqatiginninniarsinnaatitaasup akornanni isumaqatigiissutit/isumaqatigiissut atorfininnerup nalaani atuuttut naapertorlugit pissapput.
Paasissutissat allat
Atorfik pillugu paasisaqarnerorusukkuit imaluunniit Namminersorlutik Oqartussani sulineq qanoq innersoq pillugu apeqqutissaqaruit immikkut siunnersorti Carl Egede Bøggild attavigisinnaavat, oqarasuaatikkut: +299 34 57 40 imaluunniit mailikkut: cegb@nanoq.gl. Naalakkersuisoqarfimmi imaluunniit Ilinniartitaanermut Immikkoortortami sulineq pillugu paasisaqarusukkuit immikkoortortami pisortaq Trine Egede attavigisinnaavat oqarasuaatikkut: +299 34 51 47 imaluunniit mailikkut: treg@nanoq.gl.
Atorfimmut atatillugu sulisutut ineqarnissamut innersuussinertaqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareersimaguni sulisutut inissiamik innersuussivigineqarnissamut pisinnaatitaaffik attatiinnarneqassaaq. Sulisutut inigisaq atorfeqarnermut tunngavoq, atorfeqarnerullu uninnerani qimanneqassalluni.
Qinnuteqaat, imminut ilisaritinneq, ilinniarsimanermut aamma pikkorissarsimanermut uppernarsaatit aamma pappiaqqat attuumassutillit "Qinnuteqaat nassiuguk" toorlugu nassiutikkit. E-mail aqqutigalugu qinnuteqaatit nassiussat tiguneq ajorpagut.
Qinnuteqarnissamut piffissaliussaq: 22. september 2024 .
Sapaatip akunnerani 39-mi 40-milu atorfinitsitsinermi oqaloqatigiinnerit inissinnissaat sulissutigineqarpoq.